Bad Breath: నోటి దుర్వాసనతో ఇబ్బంది పడుతున్నారా?.. సులభమైన చిట్కాలతో నివారించండిలా!

Bad Breath: నోటి దుర్వాసనతో బాధపడుతున్న వాళ్లు ఎవరితోనైనా దగ్గరగా మాట్లాడాలంటే ఇబ్బంది పడుతుంటారు. దీనివల్ల ఆత్మ విశ్వాసం కూడా తగ్గిపోతుంది. అయితే, నోటి దుర్వాసనకు అనేక కారణాలు ఉంటాయి. ఈ సమస్య నుంచి బయటపడాలంటే రోజుకు రెండుసార్లు బ్రష్ చేయడం, ఎప్పటికప్పుడు నాలుకను శుభ్రం చేసుకోవడం ఎంతైనా అవసరం. దీంతో శ్వాసను తాజాగా ఉంచుకోవచ్చు. ఈ నేపథ్యంలో నోటి దుర్వాసనకు గల కారణాలేమిటి? నివారించే మార్గాలేమిటో చూద్దాం.

నోటి దుర్వాసనకు కారణాలేమిటి?

నోటి నుంచి దుర్వాసన రావడాన్ని హాలిటోసిస్ అంటారు. దంతాలను సరిగ్గా శుభ్రం చేసుకోనప్పుడు, దంతాల ఆరోగ్యం సరిగ్గా లేనప్పుడు, పేగులు ఆరోగ్యంగా లేనప్పుడు, అసిడిటీ, మధుమేహం, ఊపిరితిత్తుల ఇన్ఫెక్షన్, తగినంత నీరు తాగకపోవడం.. ఇలా అనేక రకాల కారణాల వల్ల నోటి దుర్వాసన రావొచ్చు. అలాగే పొగ తాగడం, పొగాకు ఉత్పత్తులు నమలడం, చిగుళ్ల వ్యాధులు, తీవ్ర మలబద్ధకం వంటి కారణాలు కూడా దుర్వాసనకు దారితీస్తాయి. దీంతోపాటు నిద్రపోయే సమయంలో నోటి ద్వారా శ్వాస తీసుకోవడం కూడా నోటి దుర్వాసన కారణం కావచ్చు.

నోటిని శుభ్రంగా ఉంచుకోవాలి:

నోటి దుర్వాసనకు ప్రధాన కారణం పండ్ల మధ్య ఉండే ప్లాక్, ఇరుక్కుపోయిన ఆహారం. ఈ ప్లాక్ అనేది బ్యాక్టీరియా పెరిగే అవకాశాన్ని కలిగిస్తుంది. దాంతో నోరు దుర్వాసన వస్తుంటుంది. కాబట్టి, ఉదయం నిద్రలేచాక, రాత్రి నిద్రపోయే ముందు ఇలా రోజుకు రెండు సార్లు బ్రష్ చేయడం వల్ల నోటి శ్వాసను తాజగా ఉంచుకోవచ్చు.

మౌత్ వాష్ తప్పనిసరి:

నోటి దుర్వాసనకు మౌత్ వాష్ సమర్థవంతమైన సాధనం. ఇది నోటిలోని బ్యాక్టీరియాను క్లీన్ చేయడంలో, నోటి తాజాదనాన్ని పెంచడంలో సహాయపడుతుంది. కొన్ని మౌత్ వాషుల్లో టేట్రా ఫ్లోరిడ్స్, యాంటీబాక్టీరియల్ పదార్థాలు ఉంటాయి. ఇవి నోటి దుర్వాసనకు కారణమయ్యే బ్యాక్టీరియాను నాశనం చేస్తాయి. కాబట్టి.. ప్రతిరోజూ నోటిని మౌత్ వాష్‌తో కడగటం వల్ల క్రమంగా దుర్వాసన పోతుంది.

పేగుల ఆరోగ్యం జాగ్రత్త:

నోటి దుర్వాసన రాకుండా ఉండాలంటే.. పేగులను ఆరోగ్యంగా ఉంచుకోవాలి. ఎందుకంటే మనం రోజూ తీసుకునే ఆహారమే పేగుల ఆరోగ్యాన్ని మెరుగుపరుస్తుంది. అలాగే పళ్లల్లో ఇరుక్కున్న పదార్థాలన్నీ బ్రషింగ్‌తో పోవు. అందుకే రోజులో ఒకసారైనా ఫ్లాసింగ్ చేసుకోవాలి. దారంతో పళ్లమధ్య ఉన్నవాటిని తొలగించుకోవాలి. దీంతోపాటు శరీరానికి సరిపడా నీరు తీసుకోవాలి.

తాజా పండ్లు తీసుకోవాలి:

శ్వాసను తాజాగా ఉంచడంలో ఉపయోగపడే పండ్లు, కూరగాయలను తీసుకోవాలని ఆరోగ్య నిపుణులు సూచిస్తున్నారు. దీనిలో భాగంగా.. యాపిల్స్, క్యారెట్లు, ఆకుకూరలను మీ ఆహారంలో భాగం చేసుకోవాలి. ఈ కూరగాయలు నోటి దుర్వాసను కలిగించే బ్యాక్టీరియాను తొలగించడంలో సహాయపడతాయి. అలాగే నారింజ తీసుకుంటే నోటి దుర్వాసను పోగొట్టడంలో కీలకపాత్ర పోషిస్తుంది.