ఒత్తిడితో సతమతమవుతున్నారా? స్ట్రెస్ తగ్గించుకోవడానికి ఈ ‘సింపుల్’ చిట్కాలు పాటించండి!

How to reduce stress: ప్రస్తుత లైఫ్ స్టైల్లో ఒత్తిడి అనేది ప్రతి ఒక్కరి జీవితంలో ఒక భాగమైపోయింది. ఉద్యోగ బాధ్యతలు, కుటుంబ సమస్యలు, ఆర్థిక ఇబ్బందులు లేదా భవిష్యత్తు గురించి ఆందోళన.. కారణం ఏదైనా కావచ్చు. ఇది మన శారీరక ,మానసిక ఆరోగ్యంపై తీవ్ర ప్రభావం చూపుతుంది. ఒత్తిడిని సరైన సమయంలో గుర్తించి నియంత్రించకపోతే.. అది బీపీ, షుగర్ , గుండె సంబంధిత సమస్యలకు దారితీస్తుంది. అయితే.. కొన్ని చిన్నపాటి లైఫ్ స్టైల్ మార్పులు, అలవాట్ల ద్వారా ఒత్తిడిని సులభంగా తగ్గించుకోవచ్చు. ఆ చిట్కాలు ఏంటో ఇప్పుడు వివరంగా తెలుసుకుందాం.

1. లోతైన శ్వాస ప్రక్రియ:
మీకు విపరీతమైన ఒత్తిడి లేదా ఆందోళన కలిగినప్పుడు, ఒక చోట ప్రశాంతంగా కూర్చుని లోతైన శ్వాస తీసుకోండి. ముక్కు ద్వారా గాలిని పీల్చుకుని, నెమ్మదిగా వదలడం వల్ల మెదడుకు ఆక్సిజన్ సరఫరా పెరిగి, నరాలు శాంతిస్తాయి. రోజుకు 10 నిమిషాల ప్రాణాయామం లేదా ధ్యానం మీ మనస్సును అదుపులో ఉంచుతుంది.

2. శారీరక శ్రమ, వ్యాయామం:
వ్యాయామం చేయడం వల్ల శరీరంలో ‘ఎండార్ఫిన్లు’ అనే హ్యాపీ హార్మోన్లు విడుదలవుతాయి. ఇవి సహజంగానే ఒత్తిడిని తగ్గిస్తాయి. రోజుకు కనీసం 30 నిమిషాల వాకింగ్ యోగా లేదా నచ్చిన ఆటలు ఆడటం వల్ల మనస్సు ఉల్లాసంగా ఉంటుంది. శారీరక శ్రమ వల్ల రాత్రిపూట నిద్ర కూడా బాగా పడుతుంది.

3. డిజిటల్ డిటాక్స్:
సోషల్ మీడియా , నిరంతర నోటిఫికేషన్లు కూడా ఒత్తిడికి ప్రధాన కారణం. పడుకోవడానికి గంట ముందు ఫోన్‌ను పక్కన పెట్టేయండి. నిరంతరం ఇతరుల జీవితాలతో.. మనల్ని మనం పోల్చుకోవడం వల్ల కలిగే అసంతృప్తిని ఇది తగ్గిస్తుంది. పుస్తకాలు చదవడం లేదా కుటుంబ సభ్యులతో సమయం గడపడం వంటి పనులు చేయండి.

4. సమయ పాలన :
చాలా మంది పనులను వాయిదా వేయడం వల్ల చివరి నిమిషంలో ఒత్తిడికి గురవుతుంటారు. ప్రతి రోజూ ఉదయాన్నే ఒక ‘To-Do List’ సిద్ధం చేసుకోండి. ముఖ్యమైన పనులకు ప్రాధాన్యత ఇవ్వండి. పనులను చిన్న చిన్న భాగాలుగా విభజించుకోవడం వల్ల పని భారం తగ్గినట్లు అనిపిస్తుంది.

5. పోషకాహారం, నిద్ర:
మనం తినే ఆహారం మన ఆలోచనలపై ప్రభావం చూపుతుంది. అతిగా కెఫీన్ (టీ, కాఫీ), జంక్ ఫుడ్ మరియు చక్కెర తీసుకోవడం వల్ల ఆందోళన పెరుగుతుంది. వీటికి బదులుగా పండ్లు, ఆకుకూరలు, డ్రై ఫ్రూట్స్ తీసుకోండి. అలాగే, రోజుకు 7-8 గంటల గాఢ నిద్ర మానసిక స్థితిని స్థిరంగా ఉంచడానికి అత్యంత అవసరం.

6. మీ హాబీలకు సమయం ఇవ్వండి:
రోజంతా పనిలోనే కాకుండా.. మీకు నచ్చిన పనుల కోసం కొంత సమయం కేటాయించండి. అది సంగీతం వినడం, పెయింటింగ్ వేయడం, తోటపని చేయడం లేదా వంట చేయడం ఏదైనా కావచ్చు. సృజనాత్మక పనుల్లో నిమగ్నమవ్వడం వల్ల ఒత్తిడి హార్మోన్లు తగ్గుముఖం పడతాయి.

7. ఇతరులతో పంచుకోండి:
మనస్సులో బాధను దాచుకోవడం వల్ల ఒత్తిడి రెట్టింపు అవుతుంది. మీకు నమ్మకమైన మిత్రులతో లేదా కుటుంబ సభ్యులతో మీ సమస్యలను పంచుకోండి. కొన్నిసార్లు మాట్లాడటం వల్ల సమస్యకు పరిష్కారం దొరకకపోయినా.. మనస్సు తేలిక పడుతుంది. అవసరమైతే ప్రొఫెషనల్ కౌన్సిలర్ సహాయం తీసుకోవడంలో తప్పులేదు.

ఒత్తిడి లేని జీవితం అసాధ్యం కావచ్చు.. కానీ దానిని నిర్వహించడం మన చేతుల్లోనే ఉంది. సానుకూల దృక్పథం, క్రమశిక్షణతో కూడిన అలవాట్లు మిమ్మల్ని మానసిక ప్రశాంతత వైపు నడిపిస్తాయి. మీ ఆరోగ్యం మీ చేతుల్లోనే ఉంది. కాబట్టి చిన్న చిన్న విషయాలకే ఆందోళన చెందకుండా ప్రశాంతంగా ఉండటానికి ప్రయత్నించండి.

Share

• 
• 
• 
• 
• 
•