Steel Bottles: ప్లాస్టిక్ కంటే ప్రమాదకరమైన స్టీల్ బాటిల్స్ ఇవే.. తస్మాత్ జాగ్రత్త!

Steel Bottles: ప్లాస్టిక్ బాటిల్స్ వాడకం వల్ల పర్యావరణానికి, ఆరోగ్యానికి హాని కలుగుతుందని గ్రహించిన ప్రజలు వేగంగా స్టీల్ బాటిల్స్ వైపు మళ్లుతున్నారు. అయితే.. ప్లాస్టిక్ నుంచి తప్పించుకుని మనం మరో పెద్ద ముప్పులో పడుతున్నామా? అనే అనుమానం కలగక మానదు. మార్కెట్లో తక్కువ ధరకే దొరికే రంగురంగుల స్టీల్ బాటిల్స్ అన్నీ సురక్షితమైనవి కావు. నాణ్యత లేని లోహాలు, సీసం కలిసిన కోటింగ్స్ మన శరీరంలోకి చేరి దీర్ఘకాలిక వ్యాధులకు దారి తీయవచ్చు. నాణ్యత లేని స్టీల్ బాటిల్స్ వాడటం వల్ల కలిగే అనారోగ్య సమస్యలను గురించిన పూర్తి వివరాలను ఇప్పుడు తెలుసుకుందాం.

మన జీవితంలో నీరు తాగడానికి వాడే బాటిల్ పాత్ర చాలా కీలకం. ప్లాస్టిక్ వల్ల కలిగే మైక్రోప్లాస్టిక్స్ భయం నుంచి బయటపడటానికి మనం ఎంచుకున్న ఉత్తమ ప్రత్యామ్నాయం ‘స్టెయిన్‌లెస్ స్టీల్’. కానీ.. మార్కెట్ అవసరాలను ఆసరాగా చేసుకుని కొన్ని సంస్థలు తక్కువ ధరకే నాణ్యత లేని స్టీల్ బాటిల్స్‌ను విక్రయిస్తున్నాయి. ఇక్కడే అసలు ప్రమాదం పొంచి ఉంది.

1. లోహాల మిశ్రమం, విషపూరితం:
అసలైన సురక్షితమైన బాటిల్స్ ‘304 గ్రేడ్’ (18/8) స్టెయిన్‌లెస్ స్టీల్‌తో తయారవుతాయి. కానీ చౌకమైన బాటిల్స్‌లో క్రోమియం, నికెల్ మరియు మాంగనీస్ మోతాదుకు మించి ఉంటాయి. నీరు బాటిల్‌లో ఎక్కువ సేపు నిల్వ ఉన్నప్పుడు, ఈ లోహాలు నీటిలో కరిగి మన శరీరంలోకి చేరతాయి. ఇది కాలేయం, ఊపిరితిత్తులు, జీర్ణవ్యవస్థపై తీవ్ర ప్రభావం చూపుతుంది.

2. సీసం వాడకం:
చాలా మందికి తెలియని విషయం ఏమిటంటే.. డబుల్ వాల్ ఇన్సులేటెడ్ బాటిల్స్ అడుగు భాగాన్ని సీల్ చేయడానికి తయారీదారులు సీసం ను ఉపయోగిస్తారు. ప్రముఖ కంపెనీలు ఈ సీసం బయటకు రాకుండా పటిష్టమైన కవరింగ్ ఇస్తాయి. కానీ.. లోకల్ బ్రాండ్లు లేదా నాణ్యత లేని బాటిల్స్ కింద పడినప్పుడు లేదా కాలక్రమేణా అరిగిపోయినప్పుడు, ఆ సీసం మన చేతులకు లేదా తాగే నీటికి తగిలే అవకాశం ఉంది. సీసం అనేది శరీరంలోకి చేరితే బయటకు వెళ్లని ప్రమాదకర లోహం.

3. రంగులు, పెయింట్స్:
చూడటానికి ఆకర్షణీయంగా ఉండేలా బాటిల్స్ పైన వాడే పెయింట్స్‌లో కొన్ని సార్లు హానికరమైన రసాయనాలు ఉంటాయి. పిల్లలు బాటిల్స్‌ను నోటిలో పెట్టుకున్నప్పుడు లేదా పెయింట్ పొరలు ఊడిపోయి నీటిలో కలిసినప్పుడు అవి విషంగా మారుతాయి. అందుకే ఎల్లప్పుడూ “పౌడర్ కోటెడ్” లేదా సహజమైన స్టీల్ రంగులో ఉన్న బాటిల్స్‌ను ఎంచుకోవడం మంచిది.

4. అపరిశుభ్రత, బ్యాక్టీరియా:
నాణ్యత లేని బాటిల్స్ లోపలి భాగం గరుకుగా ఉంటుంది. దీని వల్ల నీటిలోని లవణాలు, బ్యాక్టీరియా ఆ గరుకు పొరల్లో స్థావరాలను ఏర్పరచుకుంటాయి. సాధారణంగా కడిగినా ఇవి శుభ్రం కావు. నాణ్యమైన స్టీల్ బాటిల్ లోపలి భాగం ‘ఎలక్ట్రో-పాలిష్’ చేయబడి నునుపుగా ఉంటుంది. దీని వల్ల బ్యాక్టీరియా చేరదు.

Also Read: తరచూ బీపీ చెక్ చేస్తున్నారా ? జాగ్రత్త !

జాగ్రత్తలు: బాటిల్ ఎలా ఎంచుకోవాలి ?
గ్రేడ్ చెక్ చేయండి: బాటిల్ అడుగున ‘304’ లేదా ’18/8′ అని రాసి ఉందో లేదో చూడండి.

బ్రాండ్ ముఖ్యం: కొన్ని రూపాయలు ఎక్కువైనా సరే, సర్టిఫికేషన్ ఉన్న బ్రాండెడ్ కంపెనీలనే ఎంచుకోండి.

వాసన చూడండి: కొత్త బాటిల్ కొన్నప్పుడు వింతైన లోహపు వాసన లేదా కెమికల్ వాసన వస్తుంటే అది వాడకపోవడమే మంచిది.

వేడి నీరు , ఆమ్లాలు: నాణ్యత లేని బాటిల్స్‌లో వేడి నీరు లేదా నిమ్మరసం వంటివి పోయకండి. అవి లోహంతో వేగంగా చర్య జరుపుతాయి.