థైరాయిడ్ ముప్పు ఎవరికి ఎక్కువ? పురుషులకా,స్త్రీలకా?

Thyroid problems: ప్రస్తుత బిజీ లైఫ్‌స్టైల్‌లో చాలా మందిని వేధిస్తున్న ప్రధాన ఆరోగ్య సమస్యల్లో ‘థైరాయిడ్’ ఒకటి. మన గొంతు భాగంలో సీతాకోకచిలుక ఆకారంలో ఉండే ఈ చిన్న గ్రంథి.. శరీర మెటబాలిజాన్ని,శక్తినీ కంట్రోల్ చేయడంలో కీలక పాత్ర పోషిస్తుంది. అయితే ఈ మధ్య కాలంలో వయసుతో సంబంధం లేకుండా చాలా మంది థైరాయిడ్ బారిన పడుతున్నారు. అసలు ఈ వ్యాధి ముప్పు పురుషుల కంటే స్త్రీలలోనే ఎందుకు ఎక్కువగా ఉంటుంది? దీని బారిన పడకుండా ఉండాలంటే ఎలాంటి జాగ్రత్తలు తీసుకోవాలో ఇప్పుడు క్లియర్‌గా తెలుసుకుందాం.

థైరాయిడ్ ముప్పు ఎవరికి ఎక్కువ?
మెడికల్ రీసెర్చ్, గణాంకాల ప్రకారం.. పురుషులతో పోలిస్తే స్త్రీలలో థైరాయిడ్ వచ్చే అవకాశం దాదాపు 5 నుంచి 8 రెట్లు ఎక్కువ.

కారణాలు: ఆడవారి శరీరంలో హార్మోన్ల మార్పులు చాలా వేగంగా, ఎక్కువగా జరుగుతుంటాయి. ముఖ్యంగా పీరియడ్స్ సమయం, గర్భధారణ, డెలివరీ తర్వాత , మెనోపాజ్ (నెలసరి ఆగిపోయే దశ) సమయంలో ఈస్ట్రోజెన్ హార్మోన్ హెచ్చుతగ్గుల వల్ల థైరాయిడ్ గ్రంథి పనితీరు దెబ్బతింటుంది.

ఆటోఇమ్యూన్ సమస్యలు: స్త్రీలలో రోగనిరోధక వ్యవస్థ తన స్వంత కణాలపైనే దాడి చేసే ఆటోఇమ్యూన్ రుగ్మతలు (ఉదాహరణకు హషిమోటోస్ థైరాయిడిటిస్) ఎక్కువగా కనిపిస్తాయి. ఇవి థైరాయిడ్ సమస్యలకు ప్రధాన కారణం.

థైరాయిడ్‌ను నివారించడానికి ఏం చేయాలి?
ఆహార అలవాట్లలో కొన్ని చిన్న చిన్న మార్పులు చేసుకోవడం ద్వారా థైరాయిడ్ సమస్యలు రాకుండా ఈజీగా అడ్డుకోవచ్చు.

1. ఐయోడిన్ ,పోషకాలు సమతుల్యంగా ఉండాలి:
థైరాయిడ్ హార్మోన్లు సరిగ్గా ఉత్పత్తి అవ్వాలంటే శరీరానికి ఐయోడిన్ చాలా అవసరం.

ఏం తినాలి?: ఐయోడైజ్డ్ ఉప్పు, గుడ్లు, సీఫుడ్ , పాల పదార్థాలలో ఐయోడిన్ ఉంటుంది. అయితే ఐయోడిన్ మరీ ఎక్కువైనా, తక్కువైనా సమస్యే.

వీటితో పాటు థైరాయిడ్ పనితీరును మెరు గుపరిచే సెలీనియం, జింక్ వంటి పోషకాలు ఉండే గుమ్మడి గింజలు, నట్స్ (బాదం, జీడిపప్పు), తృణధాన్యాలను మీ డైట్‌లో చేర్చుకోండి.

2. క్రూసిఫెరస్ కూరగాయలను ఉడికించి తినండి :
క్యాబేజీ, క్యాలీఫ్లవర్, బ్రోకలీ, ముల్లంగి వంటి కూరగాయలలో ‘గోయిట్రోజెన్స్’ ఉంటాయి. ఇవి థైరాయిడ్ గ్రంథి ఐయోడిన్‌ను గ్రహించకుండా అడ్డుకుంటాయి.

చిట్కా: వీటిని పూర్తిగా మానేయాల్సిన అవసరం లేదు. కానీ వీటిని పచ్చిగా తినకుండా, బాగా ఉడికించి తినడం వల్ల ఆ గోయిట్రోజెన్ ప్రభావం తగ్గిపోతుంది.

3. ఒత్తిడికి దూరంగా ఉండండి:
నేటి కాలంలో థైరాయిడ్ రావడానికి మానసిక ఒత్తిడి ఒక పెద్ద కారణం. మనం ఒత్తిడికి గురైనప్పుడు శరీరంలో ‘కార్టిసోల్’ అనే హార్మోన్ విడుదలవుతుంది. ఇది థైరాయిడ్ హార్మోన్ల విడుదలను అడ్డుకుంటుంది.

పరిహారం: ఒత్తిడిని తగ్గించుకోవడానికి ప్రతిరోజూ కనీసం 15 నుండి 20 నిమిషాలు యోగా, ధ్యానం లేదా నచ్చిన సంగీతం వినడం అలవాటు చేసుకోండి.

4. శారీరక శ్రమ, వ్యాయామం:
బద్ధకమైన లైఫ్ స్టైల్ వల్ల హార్మోన్ల అసమతుల్యత ఏర్పడుతుంది. ప్రతిరోజూ వ్యాయామం చేయడం వల్ల శరీర మెటబాలిజం రేటు పెరిగి, థైరాయిడ్ గ్రంథి యాక్టివ్‌గా పనిచేస్తుంది.

రోజుకు కనీసం 30 నిమిషాలు వేగంగా నడవడం, సైక్లింగ్ లేదా రన్నింగ్ చేయడం చాలా మంచిది.

5. ప్లాస్టిక్ వాడకాన్ని తగ్గించండి:
ప్లాస్టిక్ బాటిళ్లు, ప్లాస్టిక్ బాక్సులలో ఉండే ‘బిస్ఫినాల్ ఎ’వంటి కెమికల్స్ మన శరీరంలోకి చేరి హార్మోన్ల వ్యవస్థను అస్తవ్యస్తం చేస్తాయి.

వంట వండటానికి.. నీళ్లు తాగడానికి వీలైనంత వరకు రాగి, స్టీల్ లేదా గాజు పాత్రలను వాడటం అలవాటు చేసుకోండి.

థైరాయిడ్ అనేది మనం భయపడాల్సిన అంత పెద్ద జబ్బు ఏమీ కాదు. స్త్రీలలో దీని ముప్పు ఎక్కువగా ఉన్నప్పటికీ.. సరైన ఆహారం, క్రమబద్ధమైన వ్యాయామం, ఒత్తిడి లేని జీవితం ద్వారా దీన్ని సులభంగా నివారించవచ్చు. ముఖ్యంగా 30 ఏళ్లు దాటిన మహిళలు, తమ శరీరంలో అకస్మాత్తుగా బరువు పెరగడం, విపరీతమైన అలసట, జుట్టు రాలడం వంటి మార్పులు కనిపిస్తే.. ఏడాదికి ఒక్కసారైనా T3, T4, TSH బ్లడ్ టెస్ట్ చేయించుకోవడం మంచిది

Share

• 
• 
• 
• 
• 
•