Amla: ఉసిరికాయ రోజూ తింటే ఏఏ వ్యాధులు రావు? ఎందుకు రావు?

పురాతన కాలం నుంచి వైద్యంలో, ఆహారంలో ప్రత్యేక స్థానం సంపాదించుకుంది ఉసిరికాయ. దీన్ని ఆరోగ్యానికి అద్భుతమైన ఔషధం అని నిపుణులు చెబుతున్నారు. చిన్నదే అయినా ఇందులో ఉండే పోషకాలు శరీరానికి బలాన్ని, రోగనిరోధకతను అందిస్తాయి. రోజూ ఆహారంలో ఉసిరిని చేర్చుకుంటే అనేక రకాల వ్యాధులు దూరంగా ఉంటాయని ఆయుర్వేద గ్రంథాలు కూడా చెబుతున్నాయి. ముఖ్యంగా శీతాకాలంలో రోగనిరోధక శక్తి తగ్గే సమయంలో ఉసిరి తినడం చాలా మంచిదని వైద్యులు సూచిస్తున్నారు. ఇందులో ఉండే విటమిన్ C, యాంటీఆక్సిడెంట్లు, ఖనిజాలు శరీరాన్ని సూక్ష్మజీవుల దాడి నుంచి కాపాడతాయి.

ఈ వ్యాధులు రావు
ఉసిరికాయ సాధారణ జలుబు, దగ్గు, వైరల్ ఇన్ఫెక్షన్లను తగ్గించడంలో అద్భుతంగా పనిచేస్తుంది. మరోవైపు తీవ్ర వ్యాధులను కూడా ఇది నియంత్రించడంలో సహాయపడుతుంది. ఉసిరిలో ఉన్న విటమిన్ C పరిమాణం నిమ్మకన్నా మూడు రెట్లు ఎక్కువ. ఇది శరీరంలో ఇమ్యూనిటీని పెంచి వైరస్, బ్యాక్టీరియా దాడిని అడ్డుకుంటుంది. అందుకే చాలామంది ఉసిరి రసం లేదా ఉసిరి మురబ్బాను రోజూ తింటూ ఉంటారు. ముఖ్యంగా పిల్లలు తరచూ జలుబు, దగ్గు వచ్చే వారు ఉసిరి తింటే ఇలాంటి ఇన్ఫెక్షన్లు గణనీయంగా తగ్గుతాయని పరిశోధనల్లో తేలింది. అలాగే ఉసిరి శరీరంలో వేడి తగ్గించి గొంతునొప్పి, అలసట వంటి సమస్యలను తగ్గిస్తాయి.

గుండెకు రక్షణ
దీనితో పాటు ఉసిరికాయ గుండెకు, జీర్ణక్రియకు మంచి రక్షణగా పనిచేస్తుంది. ఉసిరిలో ఉండే క్రోమియం అనే ఖనిజం శరీరంలో చక్కెర స్థాయిల్ని నియంత్రిస్తుంది. అందువల్ల మధుమేహం వచ్చే అవకాశాలు తగ్గుతాయి. ఇప్పటికే డయాబెటిస్ ఉన్నవారికి కూడా ఉసిరి ఎంతో మేలు చేస్తుంది. అలాగే ఉసిరి రక్తంలో చెడు కొవ్వును (LDL) తగ్గించి మంచి కొవ్వును (HDL) పెంచుతుంది. దీని వల్ల గుండె రుగ్మతలు, బీపీ, హార్ట్‌అటాక్ ప్రమాదాలు తగ్గుతాయి. జీర్ణక్రియ సరిగా జరిగేందుకు కూడా ఉసిరి సహాయపడుతుంది. ఇందులో ఉండే ఫైబర్ ఆహారం త్వరగా జీర్ణమవ్వడంలో, మలబద్ధకం తగ్గడంలో సహకారం అందిస్తుంది. గ్యాస్, అజీర్ణం, బరువు భారంగా అనిపించడం వంటి సమస్యలు తగ్గుతాయి.

ఉసిరి కిడ్నీలు, కాలేయానికి కూడా రక్షకుడిలా పనిచేస్తుంది. శరీరంలో పేరుకుపోయే టాక్సిన్లను బయటకు పంపడంలో ఉసిరి ముఖ్య పాత్ర పోషిస్తుంది. కాలేయం సరిగా పనిచేయడంలో ఇది సహాయపడుతుంది. తరచూ జంక్ ఫుడ్, ఆయిల్ ఫుడ్ తీసుకునే వారిలో లివర్ సమస్యలు వచ్చే అవకాశాలు ఎక్కువగా ఉంటాయి. అలాంటి వారిలో ఉసిరి తీసుకోవడం వల్ల కాలేయం శుభ్రపడుతుంది. అలాగే కిడ్నీల ఆరోగ్యాన్ని కాపాడి రాళ్లు ఏర్పడే ప్రమాదాన్ని తగ్గిస్తుంది. మానసిక ఒత్తిడి, అలసట, బలహీనత, రక్తహీనత సమస్యలకు కూడా ఉసిరి మంచి ఔషధంలా పనిచేస్తుంది. ఇందులో ఉండే ఐరన్, యాంటీఆక్సిడెంట్లు రక్తాన్ని శుభ్రపరచి శరీరానికి తాజాదనం ఇస్తాయి.

చర్మానికి జుట్టుకు…
చర్మం, జుట్టు ఆరోగ్యాన్ని మెరుగుపర్చడంలో కూడా ఉసిరికాయ మంచి ఫలితం ఇస్తుంది. ఉసిరిలో ఉన్న విటమిన్ C వల్ల చర్మం మెరిసిపోతుంది. చర్మంపై వచ్చే మచ్చలు, ముడతలు, వృద్ధాప్య ఛాయలు తగ్గిస్తుంది. అలాగే జుట్టు రాలటం, ముందే తెల్లబడటం, రఫ్‌గా మారటం వంటి సమస్యలకు ఉసిరి ఆయుర్వేద పరిష్కారంగా భావిస్తారు. దీనితో తయారు చేసే ఉసిరి నూనె, ఉసిరి పొడి, ఉసిరి రసం జుట్టును బలపరిచి తల చర్మాన్ని ఆరోగ్యంగా ఉంచుతుంది. రోజూ ఒక ఉసిరి తినడం లేదా కాస్త రసం తీసుకోవడం వల్ల శరీరం మొత్తం దృఢంగా, ఆరోగ్యంగా ఉంటుంది.

మొత్తం చెప్పాలంటే, ఉసిరికాయ చిన్న పండైనా శరీరానికి అందించే ప్రయోజనాలు మాత్రం ఎన్నో. సాధారణ జలుబు నుంచి గుండె రోగాలు, మధుమేహం, జీర్ణ సమస్యలు, చర్మం, జుట్టు సమస్యల వరకు ప్రతి కోణంలో ఉసిరి రక్షణ కల్పిస్తుంది. అందుకే నిపుణులు వారానికి కనీసం రెండు మూడు సార్లు అయినా ఉసిరిని ఆహారంలో చేర్చుకోవాల్సిందిగా సూచిస్తున్నారు. ఉసిరిని శరీరాన్ని రోజూ కాపాడే ప్రకృతి ఇచ్చిన వరం అని చెప్పవచ్చు.