30 ఏళ్ల తర్వాత కండరాలపై ఎందుకు శ్రద్ధ పెట్టాలి? బలం పెంచే ఆహారం, వ్యాయామం ఇవే!

Fitness Tips: ఒకే వయసు ఉన్న ఇద్దరిని చూసినప్పుడు ఒకరు ఫిట్‌గా, యంగ్‌గా కనిపిస్తే.. మరొకరు కాస్త పెద్దవారిలా కనిపించవచ్చు. ఇద్దరి జీవనశైలి కూడా దాదాపు ఒకేలా ఉన్నా శరీరంలో ఇలాంటి తేడాలు కనిపిస్తుంటాయి. దీనికి జన్యువులే కారణమని చాలామంది అనుకుంటారు. కానీ శరీరంలో కండరాల పరిమాణం కూడా మనం ఎలా కనిపిస్తాం, వయసు పెరిగేకొద్దీ ఎంత చురుగ్గా ఉంటాం అనే విషయాల్లో కీలక పాత్ర పోషిస్తుందని డాక్టర్ రవి కే.గుప్తా సోషల్ మీడియా ద్వారా వెల్లడించారు.

30 ఏళ్ల తర్వాత మార్పులు..

సాధారణంగా 30 ఏళ్ల వయసు దాటిన తర్వాత కండరాల పరిమాణం నెమ్మదిగా తగ్గే అవకాశం ఉంటుంది. ఈ మార్పు అందరిలో ఒకేలా ఉండదు. శారీరక శ్రమ, ఆహారం, వ్యాయామం వంటి అంశాలు దీనిపై ప్రభావం చూపుతాయి. అందుకే ఈ వయసు నుంచే కండరాలను బలంగా ఉంచుకోవడంపై దృష్టి పెట్టడం మంచిది. ముఖ్యంగా బలాన్నిచ్చే వ్యాయామాలు చేయడం, తగినంత ప్రోటీన్ తీసుకోవడం ఉపయోగపడతాయి.

కండరాలు ఎందుకు ముఖ్యం?

కండరాలు అంటే కేవలం శరీరం అందంగా కనిపించడానికి మాత్రమే కాదు. నడవటం, మెట్లు ఎక్కడం, వస్తువులు ఎత్తడం వంటి రోజువారీ పనులు సులభంగా చేయడానికి కూడా ఇవి అవసరం. కండరాల బలం తగ్గితే చిన్న పనులు చేయడానికి కూడా ఎక్కువ శ్రమ పడవచ్చు. వయసు పెరిగేకొద్దీ శరీరాన్ని అదుపులో ఉంచుకోవడం, చురుగ్గా కదలడం కూడా కష్టమవ్వొచ్చు.

Also Read: షుగర్ అదుపులో ఉండాలంటే అన్నం ఒక్కటి మానేస్తే సరిపోతుందా? నిపుణులు ఏమంటున్నారంటే..

బ్యాలెన్స్‌పై ప్రభావం..

కండరాల బలం తగ్గడం వల్ల శరీర సమతుల్యత దెబ్బతినే అవకాశం ఉంది. ముఖ్యంగా పెద్ద వయసులో నడుస్తున్నప్పుడు తడబడటం, పడిపోతామేమోననే భయం పెరగవచ్చు. అయితే ఎముకల బలంపై కండరాల ప్రభావం ఒక్కటే కారణం కాదు. ఆహారం, ఎముకల ఆరోగ్యం, శారీరక చలనం వంటి అంశాలు కూడా ముఖ్యం.

ఇప్పటి నుంచే జాగ్రత్త..

వయసు పెరగడం సహజం. కానీ మన శరీరాన్ని ఎంత చురుగ్గా ఉంచుకోవచ్చనేది మన అలవాట్లపై కూడా ఆధారపడి ఉంటుంది. సమతుల్య ఆహారం తీసుకోవడం, ప్రోటీన్ ఉన్న పదార్థాలు తినడం, క్రమం తప్పకుండా వ్యాయామం చేయడం మంచి అలవాట్లు. బరువు తగ్గడం లేదా పెరగడం ఒక్కటే ఆరోగ్యానికి కొలమానం కాదు. కండరాల బలం, నడక, రోజువారీ పనులు చేసుకునే సామర్థ్యం కూడా ముఖ్యమే.

వ్యాయామం మొదలుపెట్టే ముందు ఆరోగ్య సమస్యలు ఉంటే.. వైద్యుడి సలహా తీసుకోవాలి. చిన్నప్పటి నుంచే కాదు, ఏ వయసులోనైనా శరీరాన్ని చురుగ్గా ఉంచుకోవడానికి ప్రయత్నించవచ్చు. ఆరోగ్యకరమైన అలవాట్లను కొనసాగించడం వృద్ధాప్యంలో స్వతంత్రంగా జీవించడానికి తోడ్పడుతుంది.

Also Read: దిష్టి ఎలా తీయాలో తెలుసా? వేటితో తీస్తే వెంటనే ఫలితం ఉంటుంది?