Nails cutting: రాత్రి పూట గోర్లు ఎందుకు కత్తిరించకూడదు? ఇది మూఢనమ్మకమా లేక సైన్సా?

Nails cutting: రాత్రి వేళల్లో గోర్లు కత్తిరించకూడదని మన పెద్దలు తరచుగా చెబుతుంటారు. ఇది కేవలం ఒక మూఢనమ్మకమా లేక దీని వెనక ఏదైనా శాస్త్రీయ కారణం ఉందా అనేది చాలా మందిని వేధించే ప్రశ్న. పూర్వ కాలంలో విద్యుత్ సౌకర్యం లేకపోవడం వల్ల చీకటిలో గోర్లు కత్తిరించడం ప్రమాదకరంగా భావించేవారు. మరి నేటికీ కూడా ఈ అలవాటును ఎందుకు కొనసాగిస్తున్నారు? ఈ సంప్రదాయం వెనక ఉన్న అసలు వాస్తవాలను, ప్రాచీన, ఆధునిక కోణాల్లో వివరాలను క్లుప్తంగా తెలుసుకుందాం.

మన సంస్కృతిలో అనేక ఆచారాలు, సంప్రదాయాలు ఉన్నాయి. వాటిలో ఒకటి “రాత్రి పూట గోర్లు కత్తిరించకూడదు” అనేది. దీనిని పాటించకపోతే.. దరిద్రం వస్తుందని లేదా లక్ష్మీ దేవి వెళ్ళిపోతుందని పెద్దలు హెచ్చరిస్తుంటారు. అయితే… ఈ నమ్మకం వెనక బలమైన సామాజిక , ఆరోగ్యపరమైన కారణాలు ఉన్నాయి.

1. పూర్వ కాలంలో వెలుతురు లేకపోవడం:
ఈ నియమం ఏర్పడటానికి ప్రధాన కారణం విద్యుత్ లేకపోవడం. పూర్వ కాలంలో రాత్రి వేళల్లో ఇళ్లలో వెలుతురు చాలా తక్కువగా ఉండేది. కొవ్వొత్తులు లేదా నూనె దీపాల వెలుతురులో గోర్లు కత్తిరించుకోవడం వల్ల చేతి వేళ్లు తెగి గాయాలయ్యే ప్రమాదం ఉండేది. అప్పట్లో ఇన్‌ఫెక్షన్లకి సరైన మందులు కూడా అందుబాటులో లేవు, కాబట్టి చిన్న గాయం కూడా ప్రాణాంతకమయ్యే అవకాశం ఉండేది.

2. పరికరాల లభ్యత:
నేటి కాలంలో మనం వాడుతున్న నెయిల్ కట్టర్లు అప్పట్లో లేవు. ప్రజలు కత్తులు లేదా ఇతర పదునైన పనిముట్లను ఉపయోగించి గోర్లు కత్తిరించేవారు. చీకటిలో వీటిని వాడటం అత్యంత ప్రమాదకరమని భావించి, రాత్రి వేళల్లో ఈ పనిని నిషేధించారు.

3. పరిశుభ్రత ,ఆరోగ్యం:
రాత్రి పూట గోర్లు కత్తిరించినప్పుడు, అవి ఎక్కడ పడ్డాయో వెతకడం కష్టం. అవి ఆహార పదార్థాలలో పడితే ఆరోగ్య సమస్యలు తలెత్తుతాయి. అలాగే.. నేల మీద పడిన గోర్లు కాళ్లకు గుచ్చుకుని గాయాలయ్యే అవకాశం ఉంది. రాత్రి పూట ఇల్లు ఊడ్వడం కూడా అశుభంగా భావించేవారు కాబట్టి, కత్తిరించిన గోర్లు ఇంట్లోనే ఉండిపోయి అశుభ్రతకు కారణమవుతాయని పెద్దలు నియమం పెట్టారు.

Also Read: మెంటల్ వెల్నెస్.. ఒత్తిడి సమయంలో మీ మైండ్‌ను ఎలా రీసెట్ చేయాలి?

4. ఆధ్యాత్మిక , జ్యోతిష్య కారణాలు:
హిందూ పురాణాల ప్రకారం.. సాయంత్రం వేళ (సంధ్యా సమయం) లక్ష్మీ దేవి ఇంటికి వచ్చే సమయం. ఆ సమయంలో ఇంటిని శుభ్రంగా ఉంచుకోవాలని, గోర్లు కత్తిరించడం లేదా జుట్టు కత్తిరించడం వంటి పనులు చేయడం వల్ల నెగటివ్ ఎనర్జీ పెరుగుతుందని నమ్ముతారు. అందుకే మన పెద్దలు దీనిని ఒక పద్ధతిగా పెట్టారు.

నేటి కాలంలో దీని ప్రాముఖ్యత ఉందా ?
ప్రస్తుతం మనకు 24 గంటల విద్యుత్ సౌకర్యం, సురక్షితమైన నెయిల్ కట్టర్లు ఉన్నాయి. కాబట్టి రాత్రి పూట గోర్లు కత్తిరించుకోవడం వల్ల శారీరకంగా పెద్ద ప్రమాదమేమీ లేదు. అయితే.. వ్యక్తిగత పరిశుభ్రత దృష్ట్యా, గోర్లు కత్తిరించిన తర్వాత పరిసరాలను శుభ్రం చేసుకోవడం ,చేతులను కడుక్కోవడం ముఖ్యం.