ఆహారం తాజాగా ఉండాలా? అయితే అల్యూమినియం ఫాయిల్‌కు గుడ్ బై చెప్పండి!

Aluminum foil: మనం వండిన వంటకాలు మిగిలిపోతే.. వెంటనే వాటిని ఒక ప్లేట్‌లో పెట్టి పైన అల్యూమినియం ఫాయిల్ చుట్టి ఫ్రిజ్‌లో పెట్టేయడం మనకు అలవాటు. అది చాలా హైజీనిక్ అని.. ఆహారం తాజాగా ఉంటుందని మనం అనుకుంటాం. కానీ.. సైన్స్ ఏం చెబుతుందో తెలుసా? అల్యూమినియం ఫాయిల్‌లో ఫుడ్ స్టోర్ చేయడం వల్ల మీరు తెలియకుండానే బ్యాక్టీరియాకు ఆహ్వానం పలుకుతున్నారు.

అసలు సమస్య ఎక్కడ?
చాలా మంది అల్యూమినియం ఫాయిల్ చుడితే గాలి లోపలికి వెళ్లదు అని నమ్ముతారు. కానీ నిజానికి.. అల్యూమినియం ఫాయిల్ ఆహారాన్ని ‘ఎయిర్ టైట్’గా ఉంచలేదు.

బ్యాక్టీరియా పండగ: మనం వదిలేసిన చిన్న గ్యాప్స్ ద్వారా గాలి లోపలికి చేరుతుంది. వాతావరణంలో ఉండే బ్యాక్టీరియా, ముఖ్యంగా స్టెఫిలోకాకస్ ఆరియస్ వంటివి ఆహారంపై వేగంగా పెరుగుతాయి.

ఆక్సిజన్ లభ్యత: గాలి తగలడం వల్ల బ్యాక్టీరియా రెట్టింపు వేగంతో వృద్ధి చెంది, మీ ఆహారాన్ని విషతుల్యం చేస్తాయి. మీరు మరుసటి రోజు ఆ ఆహారాన్ని వేడి చేసినా కొన్ని రకాల టాక్సిన్స్ అలాగే ఉండిపోతాయి.

కెమికల్ రియాక్షన్: అల్యూమినియం లీచింగ్ :
ఫాయిల్‌లో ఆహారాన్ని చుట్టడం వల్ల కేవలం బ్యాక్టీరియా మాత్రమే కాదు. కెమికల్ సమస్యలు కూడా ఉన్నాయి.

యాసిడ్ రియాక్షన్: మీరు నిమ్మరసం, టమాటోలు లేదా వెనిగర్ ఉన్న ఆహార పదార్థాలను అల్యూమినియం ఫాయిల్‌లో పెడితే, ఆ యాసిడ్ అల్యూమినియంతో రియాక్ట్ అవుతుంది.

లోహపు ముక్కలు: ఈ రియాక్షన్ వల్ల సూక్ష్మమైన అల్యూమినియం కణాలు మీ ఆహారంలోకి చేరుతాయి. ఇది దీర్ఘకాలంలో జ్ఞాపకశక్తి తగ్గడం, ఎముకల బలహీనతకు దారితీస్తుందని కొన్ని అధ్యయనాలు హెచ్చరిస్తున్నాయి.

వేడి ఆహారంతో ఇంకా డేంజర్!
వేడి వేడి బిర్యానీ లేదా కూరలను నేరుగా ఫాయిల్‌లో పెట్టినప్పుడు, వేడి వల్ల అల్యూమినియం కణాలు ఆహారంలోకి కరిగే ప్రక్రియ ఇంకా వేగంగా జరుగుతుంది. అందుకే రెస్టారెంట్ల నుండి వచ్చే ఫాయిల్ ప్యాకింగ్ ఫుడ్‌ని ఇంటికి రాగానే వేరే గిన్నెలోకి మార్చుకోవడం మంచిది.

మరి బెస్ట్ ఆప్షన్ ఏంటి?
మీ ఆహారం తాజాగా, సురక్షితంగా ఉండాలంటే ఈ ట్రిక్స్ ఫాలో అవ్వండి.

1. గ్లాస్ కంటైనర్స్: గ్లాస్ లేదా గాజు పాత్రలు ఆహారంతో ఎలాంటి కెమికల్ రియాక్షన్ జరపవు. ఇవి ఎయిర్ టైట్ మూతలతో వస్తాయి కాబట్టి బ్యాక్టీరియా దరిచేరదు.

2.సిలికాన్ కవర్లు: పర్యావరణానికి మేలు చేసే రీయూజబుల్ సిలికాన్ బ్యాగులు ఇప్పుడు ట్రెండింగ్‌లో ఉన్నాయి.

3. స్టీల్ డబ్బాలు: మన పాతకాలపు స్టీల్ డబ్బాలు అల్యూమినియం ఫాయిల్ కంటే వెయ్యి రెట్లు బెటర్.

వంట చేయడం ఎంత ముఖ్యమో, మిగిలిన ఆహారాన్ని సరిగ్గా దాచుకోవడం కూడా అంతే ముఖ్యం. అల్యూమినియం ఫాయిల్‌ని కేవలం బేకింగ్ లేదా షార్ట్ టర్మ్ ప్యాకింగ్‌కు మాత్రమే పరిమితం చేయండి. ఫ్రిజ్‌లో స్టోర్ చేయడానికి మాత్రం గాజు లేదా స్టీల్ గిన్నెలనే వాడండి.