woman discovers pregnancy hours before giving birth| కడుపులో ఏదో నొప్పి, గడ్డలా అనిపించడంతో ఒక మహిళ ఆస్పత్రికి వెళ్లింది. కానీ వైద్య పరీక్షలు చేసిన తర్వాత తెలిసిన విషయం ఆమెను ఆశ్చర్యానికి గురిచేసింది. ఆమె గర్భవతి అని వైద్యులు వెల్లడించారు. అంతేకాదు, కొన్ని గంటల్లోనే ఆమె ఒక ఆరోగ్యకర బిడ్డను ప్రసవించింది. బ్రిటన్‌కు చెందిన 41 ఏళ్ల సామీ ఎవాన్స్ జీవితంలో చోటుచేసుకున్న ఈ ఘటన ఇప్పుడు అందరి దృష్టిని ఆకర్షిస్తోంది. తొమ్మిది నెలల పాటు తాను గర్భవతిననే ఆమె ఎందుకు గుర్తించలేదనే విషయమే ఇప్పుడు అందరూ అడుగుతున్నారు.
వేల్స్ ఆన్‌లైన్ కథనం ప్రకారం.. సామీ ఎవాన్స్ తన పక్కటెముకల దగ్గర వింతగా ఉబ్బినట్లు గుర్తించింది. మొదట తీవ్రమైన వ్యాయామం చేయడం వల్ల కండరాలు పట్టేసి ఉంటాయని భావించింది. అయితే, అసౌకర్యం కొనసాగడంతో వైద్యుడిని సంప్రదించాలని నిర్ణయించుకుంది. తనకు గర్భం వచ్చిందనే అనుమానం కూడా ఆమెకు రాలేదు. ఎందుకంటే, గర్భధారణ సమయంలో సాధారణంగా కనిపించే లక్షణాలు ఏవీ ఆమెకు స్పష్టంగా కనిపించలేదు. తన వయసు రీత్యా నెలసరి ఆగిపోవడంతో మెనోపాజ్‌కు ముందు వచ్చే పెరిమెనోపాజ్ దశలోకి ప్రవేశిస్తున్నానని అనుకుంది.
సామీకి కొంతకాలంగా శరీరంలో అసౌకర్యంగా అనిపించేది. ఈ సమస్యకు కారణం తెలుసుకోవడానికి ఆగస్టులో సర్వికల్ స్క్రీనింగ్ పరీక్ష చేయించుకుంది. అప్పటికి ఆమె దాదాపు 8 నెలల గర్భవతిగా ఉన్నప్పటికీ, ఆ విషయం ఆమెకు తెలియదు. పరీక్ష ఫలితాలు సాధారణంగానే వచ్చాయి. అయితే, సమస్యపై సందేహాలు తొలగకపోవడంతో మరోసారి వైద్యుడిని సంప్రదించింది. వైద్యులు గర్భధారణను నిర్ధారించేందుకు సాధారణ ప్రెగ్నెన్సీ టెస్ట్ చేశారు. మొదట ఆ పరీక్ష ఫలితం నెగెటివ్‌గా కనిపించింది. మరో వైద్యుడు పరీక్షను పరిశీలించగా, చాలా పలుచగా కనిపించే గీతను గుర్తించారు. దీంతో మరోసారి పరీక్ష చేయించుకోవాలని సూచించారు.
మరుసటి రోజు వైద్య సిబ్బంది అల్ట్రాసౌండ్ పరీక్ష నిర్వహించారు. స్క్రీన్‌పై బిడ్డ కాలు, చేయి, వీపు కనిపించడంతో అందరూ ఆశ్చర్యపోయారు. సామీ కూడా తాను గర్భవతిననే విషయాన్ని అప్పుడే తెలుసుకుంది. వెంటనే తన భాగస్వామి ట్రిస్టన్‌కు మెసేజ్ చేసి ఈ విషయాన్ని తెలిపింది. అయితే, గర్భం ప్రారంభ దశలోనే ఉందని ఆమె మొదట భావించింది. కానీ వైద్యులు మరో విషయం చెప్పారు. ఆమె అప్పటికే ప్రసవ దశలోకి ప్రవేశించిందని వెల్లడించారు.
Also Read: ఈ 5 రకాల వ్యక్తులను లవ్ చేయకూడదు.. మోసపోవడం ఖాయం
ఆసుపత్రిలో చేరిన 5 గంటల్లోగా సామీ ఆరోగ్యకరమైన మగబిడ్డకు జన్మనిచ్చింది. ఆ బిడ్డకు నోహా అని పేరు పెట్టారు. పుట్టినప్పుడు బాబు బరువు సుమారు 8 పౌండ్లు, అంటే 3.6 కిలోలు ఉన్నట్లు నివేదిక పేర్కొంది. ప్రసవ సమయంలో తీవ్రమైన నొప్పి అనుభవించానని సామీ తెలిపింది. కుట్లు కూడా వేయాల్సి వచ్చిందని వివరించింది. జరిగిన పరిణామాలను పూర్తిగా అర్థం చేసుకోవడానికి తనకు కొంత సమయం పట్టిందని చెప్పింది.
Also Read: చాణక్య నీతి.. భార్యాభర్తల మధ్య గొడవలు పెట్టే స్నేహితులు వీరే.. ఇలా గుర్తించండి
గర్భధారణ జరిగినప్పటికీ, చాలా ఆలస్యంగా గుర్తించే పరిస్థితిని సాధారణంగా క్రిప్టిక్ ప్రెగ్నెన్సీ అంటారు. కొందరిలో లక్షణాలు స్పష్టంగా కనిపించకపోవచ్చు. మరికొందరు వాటిని ఇతర ఆరోగ్య సమస్యలుగా భావించవచ్చు. అయితే, నెలసరి ఆగిపోవడానికి లేదా కడుపులో మార్పులు కనిపించడానికి అనేక కారణాలు ఉండవచ్చు. ఇలాంటి లక్షణాలు ఎదురైతే నిర్లక్ష్యం చేయకుండా వైద్యులను సంప్రదించాలి. అల్ట్రాసౌండ్ లాంటి అవసరమైన పరీక్షలు చేయించుకోవడం ద్వారా అసలు కారణాన్ని గుర్తించవచ్చు.
Share
'దేశ ప్రతిష్టను తాకట్టు పెడుతున్నారు'.. రాహుల్పై విరుచుకుపడ్డ ప్రధాని మోదీ!
హ్యారీ బ్రూక్ కు ఒళ్లంతా పొగరే...శ్రీలంక ప్లేయర్లపై ఉమ్మేశాడంటూ ట్రోల్స్!
