Pregnant Women Food: ప్రెగ్నెన్సీతో ఉన్నారా.. ఈ ఆహారం జోలికి అస్సలు వెళ్లకండి

Pregnant Women Food: గర్భం దాల్చిన మొదటి నెల నుంచి ప్రసవం వరకు గర్భిణీల ఆరోగ్యంపై ప్రత్యేక శ్రద్ధ వహించాలి. ప్రెగ్నెన్సీ సమయంలో మంచి ఆహారం తీసుకోవడం చాలా అవసరం. గర్భధారణ సమయంలో మహిళలు సమతులాహారం తీసుకుంటే.. తల్లి ఆరోగ్యానికి, బిడ్డ ఎదుగుదలకు మేలు జరుగుతుంది. గర్భిణులు వారి డైట్లో.. కాంప్లెక్స్ కార్బొహైడ్రేట్స్, ఆరోగ్యకరమైన ఫ్యాట్స్తో పాటు ప్రోటీన్, విటమిన్స్, మినరల్స్, ఫైబర్ ఇలా అన్ని పోషకాలు ఉండేలా చూసుకోవాలి. ప్రెగ్నెన్సీ సమయంలో ఎలాంటి ఆహారం తీసుకోవాలో తెలుసుకోవడంతో పాటు.. తీనకూడని ఫుడ్స్ గురించి కూడా తెలుసుండాలని నిపుణులు చెబుతున్నారు. గర్భిణులు కొన్ని ఆహార పదార్థాలు తింటే..వారి ఆరోగ్యంతో పాటుగా, బిడ్డ ఎదుగుదలపై దుష్ప్రభావం పడుతుందని అంటున్నారు.

మెర్క్యురీ ఎక్కువగా ఉండే చేపలు..
మెర్క్యురీ అత్యంత విషపూరిత మూలకం. ఇది సాధారణంగా కలుషితమైన నీటిలో ఎక్కువగా కనిపిస్తుంది. మెర్క్యురీని కలుషితమైన సముద్రాలలో ఎక్కువగా పేరుకుంటుంది. పెద్ద సముద్ర చేపలలో.. అధిక మొత్తంలో మెర్క్యురీ పేరుకుపోతుంది. మెర్క్యురీ శరీరంలో చేరితే.. నాడీ వ్యవస్థ, రోగనిరోధక వ్యవస్థను, కిడ్నీలను దెబ్బతీస్తుంది. గర్భిణులు మెర్క్యరీ పేరుకున్న చేపలు తీసుకుంటే.. కడుపులోని బిడ్డ ఎదుగదలకు సమస్యలు ఎదురవుతాయి. ప్రెగ్నెన్సీ సమయంలో తక్కువ మొత్తంలో మెర్క్యరీ శరీరంలోకి చేరినా.. ప్రతికూల ప్రభావాలు కలుగుతాయి. గర్భిణులు సొరచేప, మార్లిన్‌, ట్యూనా, స్వార్డ్‌ ఫిష్‌ తినకూడదని డాక్టర్‌ వరలక్ష్మి సూచించారు.

సరిగ్గా ఉడకని, వండని చేపలు..
ఈ మధ్యకాలంలో చాలా మంది జపనీస్‌ ఫుడ్‌కు ఫ్యాన్స్‌ అయిపోతున్నారు. మీ ఫేవర్‌ట్‌ డిషెస్‌ లిస్ట్‌ల్‌ సూషీ ఉంటే.. ప్రెగ్నెన్సీ సమయంలో దాన్ని కచ్చితంగా మానేయాలని గుర్తుపెట్టుకోండి. ఎందుకంటే.. సూషీలో పచ్చి చేపలు, చికెన్‌ వాడుతుంటారు. చేపలు పచ్చిగా తింటే.. విబ్రియో, సాల్మోనెల్లా, లిస్టెరియా వంటి వైరల్, బాక్టీరియల్, ప్యారాసైజ్‌ ఇన్ఫెక్షన్స్‌ వచ్చే అవకాశం ఉంది. ఈ ఇన్ఫెక్షన్‌లలో కొన్ని తల్లిని మాత్రమే ప్రభావితం చేస్తాయి, దీని వలన డీహైడ్రేషన్‌, బలహీనత వంటి సమస్యలు ఎదురవుతాయి. కొన్ని ఇన్ఫెక్షన్స్‌ బిడ్డపై ప్రభావం చూపే అవకాశం ఉంది.

పచ్చి గుడ్డు..
గర్భుణులు పచ్చి గుడ్డు తినకూడదని డాక్టర్‌ వరలక్ష్మి సూచించారు. పచ్చి గుడ్లలో సాల్మొనెల్లా బ్యాక్టీరియా ఉంటుంది. సాల్మొనెల్లా ఇన్ఫెక్షన్‌ కారణంగా జ్వరం, వికారం, వాంతులు, డయేరియా వంటివి సమస్యలు వస్తాయి. కొన్ని సందర్భాల్లో.. గర్భాశయంలో తిమ్మిరిని కలిగిస్తుంది. దీని కారణంగా నెలులు నిండకుండా పుట్టడం, గర్భస్రావం అయ్యే ప్రమాదం ఉంది. ప్రెగ్నెన్సీ సమయంలో మహిళలు ఉడకబెట్టిన గుడ్డు, ఆమ్లెట్లు తీసుకుంటే మంచిది.

ఆర్గాన్‌ మీట్‌..
ఆర్గాన్‌ మీట్‌‌లో పోషకాలు పుష్కలంగా ఉంటాయి. వీటిలో ఐరన్, విటమిన్ B12, విటమిన్ A, జింక్, సెలీనియం, కాపర్‌ పుష్కలంగా ఉంటాయి. ఇవన్నీ బిడ్డ ఆరోగ్యానికి, ఎదుగుదలకు మేలు చేస్తాయి. కానీ, జంతు ఆధారిత విటమిన్ A ఎక్కువగా తీసుకుంటే.. ముఖ్యంగా మొదటి మూడు నెలల్లో ఎక్కువ తీసుకుంటే.. పుట్టుకతో వచ్చే వైకల్యాలు, గర్భస్రావం అయ్యే ప్రమాదం ఉంది.

Also Read: మొలకెత్తిన వేరుశనగ తింటే.. ఆశ్చర్యకర లాభాలు !

కెఫిన్‌..
ప్రెగ్నెన్సీ టైమ్‌లో.. కెఫిన్‌ ఎక్కువగా ఉండే పదార్థాలు తీసుకోకూడదని డాక్టర్‌ వరలక్ష్మి అన్నారు. అమెరికన్ కాలేజ్ ఆఫ్ అబ్స్టెట్రిషియన్స్ అండ్ గైనకాలజిస్ట్స్ ప్రకారం, గర్భిణీలు రోజుకు.. 200 మిల్లీగ్రాముల కంటే తక్కువ కెఫిన్‌ తీసుకోవడం మంచిది. కాఫీ, టీ, కూల్‌ డ్రింక్స్‌లో కెఫిన్‌ ఎక్కువగా ఉంటుంది.

ఈ పండ్లు తినొద్దు..
ప్రెగ్నెన్సీ సమయంలో.. బొప్పాయి, అనాసపండు ఎక్కువగా తీసుకోకూడదని డాక్టర్‌ అన్నారు. వీటిలో ఉంటే ఎంజైమ్‌ల కారణంగా.. ప్రీమెచ్యూర్‌ కాంట్రాక్షన్‌కు దారితీస్తుంది.

పచ్చి పాలు..
పచ్చిపాలలో.. లిస్టెరియా, సాల్మోనెల్లా, ఇ. కోలి, కాంపిలోబాక్టే బ్యాక్టీరియా ఉంటుంది. వీటి వల్ల కడుపులో బిడ్డకు ప్రమాదం.

ఇవి ఎక్కువగా తీసుకోవద్దు..
గర్భిణులు నువ్వులు, ఇంగువ, నిమ్మ ఉప్పు.. ఎక్కువగా తీసుకోకూడదని డాక్టర్‌ సూచించారు.