అక్షయ్ కుమార్ ‘సాముక్’.. ఇండియన్ స్క్రీన్‌పై ఫస్ట్ ఏలియన్ థ్రిల్లర్!

Samuk Movie: బాలీవుడ్ యాక్షన్ హీరో అక్షయ్ కుమార్ మరో విభిన్నమైన ప్రయోగానికి శ్రీకారం చుట్టారు. భారతదేశపు మొట్టమొదటి భారీ ఏలియన్ (Alien) థ్రిల్లర్ చిత్రం ‘సాముక్’ (SAMUK) ద్వారా ప్రేక్షకులను అలరించడానికి ఆయన సిద్ధమవుతున్నారు. ఈ సినిమాతో అక్షయ్ కుమార్ సరికొత్త సైన్స్ ఫిక్షన్ జోనర్‌లోకి అడుగుపెడుతున్నారు.

టాప్ హాలీవుడ్ టెక్నీషియన్లతో

ఈ ప్రతిష్టాత్మక చిత్రానికి కనిష్క్ వర్మ దర్శకత్వం వహిస్తుండగా, ‘నమస్తే లండన్’ వంటి సూపర్ హిట్ చిత్రాల తర్వాత దాదాపు 12 ఏళ్ల విరామం అనంతరం అక్షయ్ కుమార్, ప్రముఖ నిర్మాత విపుల్ అమృత్‌లాల్ షా కలిసి ఈ చిత్రాన్ని నిర్మిస్తున్నారు. సినిమాను అంతర్జాతీయ స్థాయిలో తెరకెక్కించేందుకు ప్రపంచస్థాయి హాలీవుడ్ నిపుణులను రంగంలోకి దించారు.

యాక్షన్ కొరియోగ్రఫీ: ‘మిషన్: ఇంపాజిబుల్ – ది ఫైనల్ రికనింగ్’, ‘వెనమ్’, ‘నో టైమ్ టు డై’ వంటి హాలీవుడ్ బ్లాక్‌బస్టర్ చిత్రాలకు పనిచేసిన ప్రముఖ స్టంట్ కోఆర్డినేటర్ ల్యూక్ టంబర్ ఈ చిత్రానికి యాక్షన్ సీక్వెన్స్‌లను డిజైన్ చేస్తున్నారు.

ఏలియన్: రోములస్’, ‘ప్రెడేటర్’ చిత్రాలకు పనిచేసి ఆస్కార్ నామినేషన్ అందుకున్న క్రియేచర్-ఎఫెక్ట్స్ లెజెండ్ అలెక్ గిల్లిస్ ఈ సినిమాలో వింత జీవి (Alien) డిజైన్ బాధ్యతలను చేపట్టారు. ప్రస్తుతం ఉన్న ఏఐ (AI), సీజీఐ (CGI) టెక్నాలజీపైనే కాకుండా, స్క్రీన్‌పై సహజత్వం కోసం చేతులతో తయారు చేసిన ప్రాక్టికల్ ఎఫెక్ట్స్ మోన్‌స్టర్‌ను ఇందుకోసం ప్రత్యేకంగా రూపొందిస్తున్నట్లు ఆయన వెల్లడించారు.

అక్షయ్ కుమార్‌పై హాలీవుడ్ నిపుణుల ప్రశంసలు:
ఈ ప్రాజెక్ట్ గురించి అలెక్ గిల్లిస్ మాట్లాడుతూ.. “అక్షయ్ కుమార్ బాడీ లాంగ్వేజ్ హాలీవుడ్ స్టార్స్ జేసన్ స్టాథమ్, టామ్ క్రూజ్ లాంటి వారిని గుర్తుచేస్తుంది. ఆయన స్క్రీన్ ప్రెజెన్స్ అద్భుతం. ఈ సినిమాలో ఆయనతో తలపడేలా ఒక పవర్‌ఫుల్ ఏలియన్‌ను సృష్టిస్తున్నాం. దాన్ని ఎదుర్కోవడం అక్షయ్‌కి సైతం ఒక పెద్ద సవాలుగా ఉంటుంది” అని పేర్కొన్నారు.

నా కెరీర్‌లోనే పూర్తి కొత్త జోనర్

ఈ సినిమా విశేషాలపై అక్షయ్ కుమార్ స్పందిస్తూ.. “అవును, నేను ‘సాముక్’ సినిమా చేస్తున్నాను. దీని కథ, సబ్జెక్ట్ నన్ను ఎంతగానో ఆకట్టుకున్నాయి. సైన్స్ ఫిక్షన్ ఏలియన్ థ్రిల్లర్ అనేది నా కెరీర్‌లోనే కాదు, మన భారతీయ చలనచిత్ర రంగానికే పూర్తి కొత్త జోనర్. ఈ సరికొత్త ప్రపంచాన్ని వెండితెరపై ఆవిష్కరించేందుకు నేను ఎంతో ఉత్సాహంగా ఎదురుచూస్తున్నాను” అని తెలిపారు. భారతీయ సినిమాను నెక్ట్స్ లెవెల్‌కు తీసుకెళ్లేలా ప్లాన్ చేస్తున్న ఈ ‘సాముక్’ చిత్రం ప్రస్తుతం పరిశ్రమలో మరియు సోషల్ మీడియాలో భారీ అంచనాలను రేకెత్తిస్తోంది.