‘డాన్ 3’ వివాదం.. CCIని ఆశ్రయించనున్న రణవీర్ సింగ్ రాబోయే చిత్రాల నిర్మాతలు..

Ranveer Singh Ban: ఫర్హాన్ అక్తర్ దర్శకత్వంలో రాబోతున్న ‘డాన్ 3’ సినిమా నుండి నటుడు రణవీర్ సింగ్ అకస్మాత్తుగా తప్పుకోవడంతో, అతనిపై ఫెడరేషన్ ఆఫ్ వెస్ట్రన్ ఇండియా సినీ ఎంప్లాయీస్ (FWICE) ‘సహాయ నిరాకరణ’ ఆదేశాలను జారీ చేసింది. ఈ వివాదం ఇప్పుడు బాలీవుడ్ చిత్ర పరిశ్రమలో తీవ్ర కలకలం రేపుతోంది. రణవీర్ సింగ్‌తో ఏ టెక్నీషియన్, కార్మికుడు పనిచేయకూడదని FWICE జారీ చేసిన ఆదేశాల వల్ల అతని రాబోయే చిత్రాల భవిష్యత్తు ప్రమాదంలో పడింది. దీంతో ఆయా నిర్మాతలు సీసీఐను ఆశ్రయించారు.

ప్రమాదంలో రాబోయే చిత్రాలు

రణవీర్ సింగ్ ఆగస్టులో జై మెహతా దర్శకత్వంలో ‘ప్రళయ్’ అనే జాంబీ థ్రిల్లర్ సినిమాలో నటించాల్సి ఉంది. ఈ సినిమా కోసం దాదాపు 500 మంది టెక్నీషియన్లు, కార్మికులు పనిచేయాల్సి ఉంది. FWICE కింద 34 వెండర్ అసోసియేషన్లు ఉండటంతో, ఈ సహాయ నిరాకరణ ఆదేశాల వల్ల ‘ప్రళయ్’ సినిమా షూటింగ్ షెడ్యూల్‌కు తీవ్ర ఆటంకం కలిగే ప్రమాదం ఉంది. ఇవే కాకుండా ఆదిత్య ధర్ దర్శకత్వంలో రాబోయే ‘చంద్రగుప్త మౌర్య’ వంటి పెద్ద ప్రాజెక్టులు కూడా రణవీర్ లైన్-అప్‌లో ఉన్నాయి.

నిర్మాతల ప్రత్యామ్నాయాలు..

సినిమా ఇండస్ట్రీ వర్గాల సమాచారం ప్రకారం, FWICE నిర్ణయం వల్ల నటుడి కంటే రోజువారీ కూలీలకే ఎక్కువ నష్టం జరుగుతుందని కొందరు అభిప్రాయపడుతున్నారు. ఒకవేళ పరిస్థితి మరింత తీవ్రమైతే, రణవీర్ సింగ్ రాబోయే చిత్రాల నిర్మాతలు కలిసి కాంపిటీషన్ కమిషన్ ఆఫ్ ఇండియా (CCI) ని ఆశ్రయించాలని యోచిస్తున్నారు.

FWICE తగ్గేదేలే..

మరోవైపు FWICE చీఫ్ అడ్వైజర్ అశోక్ పండిట్ మాత్రం తమ ఫెడరేషన్ బలాన్ని తక్కువ అంచనా వేయలేరని, తమ పరిధిలో 34 అసోసియేషన్లు ఉన్నందున కార్మికులు లేకుండా షూటింగ్‌లు చేయడం సాధ్యం కాదని స్పష్టం చేశారు. రణవీర్ సింగ్, నిర్మాతలు కలిసి కూర్చొని ఈ సమస్యను సామరస్యంగా పరిష్కరించుకుంటేనే ఈ వివాదం ముగుస్తుందని ఆయన తెలిపారు.

‘డాన్ 3’ సినిమా షూటింగ్ ప్రారంభానికి కేవలం మూడు వారాల ముందే రణవీర్ సింగ్ ప్రాజెక్ట్ నుండి తప్పుకున్నాడని, దీనివల్ల తమకు దాదాపు రూ.45 కోట్ల మేర నష్టం వాటిల్లిందని నిర్మాతలు ఫర్హాన్ అక్తర్, రితేష్ సిధ్వానీ ఆరోపిస్తూ FWICE కి ఫిర్యాదు చేశారు. దీనిపై చర్చలకు రణవీర్ స్పందించకపోవడంతో ఫెడరేషన్ ఈ నిషేధాన్ని విధించింది.