Gandhi Talks: విజయ్ సేతుపతి ‘గాంధీ టాక్స్’ సినిమాలో తెలుగుకు అవమానం.. ఏం జరిగిందంటే?

Gandhi Talks: ఇది భారతీయ చలనచిత్ర పరిశ్రమలో చాలా కాలం తర్వాత వచ్చిన ఒక మూకీ (Silent) సినిమా గాంధీ టాక్స్. మాటలు లేకపోయినా, కేవలం హావభావాలు సంగీతం ద్వారా కథను నడిపించడం ఈ సినిమా ప్రత్యేకత. అయితే విజయ్ సేతుపతి ప్రధాన పాత్రలో నటించిన ఈ సినిమా ప్రోపర్ తెలుగు సినిమా అని చెంప్పేందుకు నిర్మాతలు చేసిన పని వారిని నవ్వుల పాలు చేస్తోంది. ఎందుకంటే.. ఆ సినిమాలో తెలుగు మాటలు లేకపోయినా.. టైటిల్ కార్డ్స్ మాత్రం తెలుగులో వేశారు. అక్కడి వరకూ బాగానే ఉన్నా ఆ టైటిల్ కార్డ్స్ అనవదించినపుడు వాటిని సరిగా చూసుకోలేదు. కొన్ని పదాల్లో ఒత్తులు పొల్లులు ఎగిరిపోయాయి. కొన్ని పేర్లు కూడా మారిపోయాయి. దీనిని చూసిన నెటిజన్లు మండి పడుతున్నారు. అసలు తెలుగులో ఎందుకు వేశారు, ఎవరైనా అడిగారా.. ఇలా సగం సగం వేసి తెలుగును అవమానించడం ఎందుకు అని నెటిజన్లు మూవీ నిర్మాతలపై ఫైర్ అవుతున్నారు. అయితే దీనిపై మూవీ టీం మాత్రం స్పందించలేదు. ఏం జరుగుద్దో చూడాలి మరి. ఈ సినిమాలో విజయ్ సేతుపతి, అరవింద్ స్వామి, అదితి రావు హైదరీ, సిద్ధార్థ్ జాదవ్ తదితరులు ప్రధాన పాత్రలు పోషించారు. కిషోర్ పాండురంగ బెలేకర్ దర్శకత్వం వహించిన ఈ సినిమాకు ఏ. ఆర్. రెహమాన్ సంగీతం అందించారు. జనవరి 30, 2026 థియేటర్లలో విడుదలైన ఈ సినిమా ప్రేక్షకులను అంతగా ఆకట్టుకోలేక పోయింది.

కథా సారాంశం

ఈ సినిమా డబ్బు (Money) మరియు నైతికత (Morality) చుట్టూ తిరుగుతుంది. ముఖ్యంగా నేటి సమాజంలో “డబ్బు ఎలా మాట్లాడుతుంది అనే అంశాన్ని వ్యంగ్యంగా, భావోద్వేగంగా చూపించారు. ముంబైలో నివసించే ఒక నిరుద్యోగి. తన తల్లి అనారోగ్యం, ప్రేమించిన అమ్మాయి (అదితి రావు హైదరీ) కోసం డబ్బు సంపాదించాలని కష్టపడుతుంటాడు. ఒక కోటీశ్వరుడు. అన్నీ ఉన్నా జీవితంలో జరిగిన కొన్ని సంఘటనల వల్ల కుప్పకూలిపోయి ఉంటాడు. వీరిద్దరి జీవితాలు ఒక దొంగతనం నేపథ్యంలో ఎలా కలిశాయి? గాంధీ బొమ్మ ఉన్న కరెన్సీ నోటు వీరి జీవితాలను ఎలా ప్రభావితం చేసింది? అనేదే ఈ చిత్ర ప్రధానాంశం.

సినిమా ప్రత్యేకతలు

ఇది ఒక మూకీ సినిమా కావడంతో, నటీనటుల పెర్ఫార్మెన్స్ మీద ఎక్కువ దృష్టి పెట్టారు. విజయ్ సేతుపతి తన కళ్లతోనే భావాలను పలికించగా, అరవింద్ స్వామి తన గంభీరమైన నటనతో ఆకట్టుకున్నారు. ఏ.ఆర్. రెహమాన్ మాటలు లేని లోటును రెహమాన్ తన బ్యాక్‌గ్రౌండ్ స్కోర్‌తో భర్తీ చేశారు. సన్నివేశానికి తగ్గట్లుగా సంగీతం ప్రేక్షకులను కథలోకి తీసుకువెళ్తుంది. గాంధీజీ ఆశయాలకు, నేటి కాలంలో మనం వాడుతున్న గాంధీ బొమ్మ ఉన్న కరెన్సీకి మధ్య ఉన్న వ్యత్యాసాన్ని దర్శకుడు ప్రతీకాత్మకంగా చూపించారు.