ప్రముఖ కొరియన్ నటుడు లీ సాంగ్-బో కన్ను మూత.. చిన్న వయస్సులో..

Lee Sang-bo: కొరియన్ సినీ పరిశ్రమలో మరో విషాదం చోటుచేసుకుంది. తన విలక్షణ నటనతో లక్షలాది మంది అభిమానులను సంపాదించుకున్న ప్రముఖ నటుడు లీ సాంగ్-బో (Lee Sang-bo) కన్నుమూశారు. 44 ఏళ్ల వయస్సులోనే ఆయన మరణించడం అంతర్జాతీయ సినీ వర్గాలను దిగ్భ్రాంతికి గురిచేసింది. ప్యోంగ్టెక్‌లోని తన నివాసంలో ఆయన నిర్జీవంగా కనిపించారు. దీంతో ఒక్క సారిగా కొరియన్ సినీ లోకంలో విషాద చాయలు అలముకున్నాయి.

మరణం

లీ సాంగ్-బో నివాసంలో ఆయన అపస్మారక స్థితిలో ఉండటాన్ని గమనించిన కుటుంబ సభ్యులు వెంటనే పోలీసులకు సమాచారం అందించారు. అయితే అప్పటికే ఆయన మరణించినట్లు వైద్యులు ధృవీకరించారు. ప్రాథమిక విచారణలో ఎటువంటి అనుమానాస్పద అంశాలు లేదా నేరపూరిత కోణాలు కనిపించలేదని పోలీసులు తెలిపారు. మరణానికి గల ఖచ్చితమైన కారణాలను తెలుసుకోవడానికి ప్రస్తుతం దర్యాప్తు కొనసాగుతోంది. కుటుంబ సభ్యుల గోప్యతను గౌరవిస్తూ, మరణానికి సంబంధించిన మరిన్ని వివరాలను వెల్లడించలేమని ఆయన మేనేజ్‌మెంట్ సంస్థ ‘కొరియా మేనేజ్‌మెంట్ గ్రూప్’ ప్రకటించింది.

విషాదాల నీడలో

లీ సాంగ్-బో జీవితం ఎన్నో ఒడిదుడుకులతో సాగింది. గతంలో జరిగిన ఒక ఘోర రోడ్డు ప్రమాదంలో ఆయన తన సోదరిని, తల్లిదండ్రులను కోల్పోయారు. ఈ వరుస విషాదాలు ఆయనను తీవ్రమైన మానసిక వేదనకు గురిచేశాయి. 2022లో ఆయన డ్రగ్స్ తీసుకున్నారనే ఆరోపణలు వచ్చినప్పటికీ, విచారణలో అవి కేవలం వైద్యులు సూచించిన యాంటిడిప్రెసెంట్ మందులేనని తేలింది. దీంతో ఒక్క సారిగా ఆయన అభిమానులు ఊపిరిపీల్చుకున్నారు. ఆ సమయంలో ఆయనను పోలీసులు నిర్దోషిగా ప్రకటించారు. మరణానికి కొన్ని రోజుల ముందే ఆయన తన సోషల్ మీడియా ఖాతాల్లోని పోస్ట్‌లన్నింటినీ తొలగించడం ఇప్పుడు చర్చనీయాంశమైంది.

సినీ ప్రస్థానం

2006లో ‘ఇన్విజిబుల్ మ్యాన్ చోయ్ జాంగ్-సూ’ అనే డ్రామాతో తన నటనను ప్రారంభించిన లీ సాంగ్-బో, తక్కువ కాలంలోనే గుర్తింపు తెచ్చుకున్నారు. ముఖ్యంగా ‘మిస్ మాంటే క్రిస్టో’, ‘ప్రైవేట్ లైవ్స్’, ‘రూగల్’ వంటి సూపర్ హిట్ కొరియన్ డ్రామాల్లో ఆయన పోషించిన పాత్రలు ప్రేక్షకులకు బాగా దగ్గరయ్యాయి. ఇటీవల విడుదలైన ‘ది ఎలిగెంట్ ఎంపైర్’లో ఆయన నటనకు విమర్శకుల ప్రశంసలు దక్కాయి. లీ సాంగ్-బో మరణం కొరియన్ డ్రామా ప్రియులకు తీరని లోటు. మార్చి 29న ప్యోంగ్టెక్‌లో ఆయన అంత్యక్రియలు జరగనున్నాయి. ఆయన మృతి పట్ల సోషల్ మీడియా వేదికగా ప్రపంచవ్యాప్త అభిమానులు సంతాపం వ్యక్తం చేస్తున్నారు.