పాపం అల్లరి నరేష్ హీరోయిన్‌కి ఎంత కష్టం వచ్చింది.. తన కుక్కను చంపేశారంటూ..

Mikey Dog Incident: తెలుగు, హిందీ చిత్రాల్లో నటించిన ప్రముఖ నటి మంజరి ఫడ్నిస్ నివసిస్తున్న హౌసింగ్ సొసైటీలో తీవ్ర కలకలం రేగింది. గత ఆరేళ్లుగా తమతో ఎంతో సాధువుగా ఉంటున్న ‘మైకీ’ అనే కమ్యూనిటీ డాగ్‌ను కొందరు వ్యక్తులు అత్యంత కిరాతకంగా కొట్టి, చంపేసిన ఘటన ఆలస్యంగా వెలుగులోకి వచ్చింది. ఈ విషయాన్ని చెప్తూ నటి మంజరి సోషల్ మీడియాలో కన్నీరు పెట్టుకున్న వీడియో ప్రస్తుతం నెట్టింట వైరల్‌గా మారింది. జంతు ప్రేమికులతో పాటు సినీ ప్రముఖులు సైతం ఈ ఘాతుకంపై తీవ్ర ఆగ్రహం వ్యక్తం చేస్తున్నారు.

అసలేం జరిగింది?

మంజరి ఫడ్నిస్ తెలిపిన వివరాల ప్రకారం.. 2019లో ఒక కుటుంబం వదిలేసి వెళ్లిన లాంగ్ హెయిర్ డాగ్‌ను ఆమె నివసిస్తున్న సొసైటీ సభ్యులు చేరదీశారు. దానికి ‘మైకీ’ అని పేరు పెట్టి సొసైటీలోనే పెంచుకుంటున్నారు. మంజరి కూడా దానికి స్నానం చేయించడం, గ్రూమింగ్ చూసుకోవడం లాంటివి చేసేవారు. అయితే కొన్ని రోజుల క్రితం మైకీ హఠాత్తుగా కనిపించకుండా పోయింది. దాంతో ఆందోళన చెందిన మంజరి, చుట్టుపక్కల వాళ్లు ఎంత వెతికినా ఆనవాళ్లు దొరకలేదు.

కానీ, సొసైటీలో పనిచేసే ఒక వ్యక్తి ఇచ్చిన సమాచారంతో ఒళ్లు గగుర్పొడిచే నిజం బయటపడింది. సొసైటీ బేస్‌మెంట్ ఏరియాలో మైకీ ప్రశాంతంగా నిద్రపోతున్న సమయంలో, కొందరు వ్యక్తులు పక్కా ప్లాన్‌తో వచ్చి దాని తలపై పెద్ద కర్ర లేదా ఇనుప రాడ్‌తో బలంగా కొట్టారు. ఆ దెబ్బకు అది స్పృహ తప్పి అల్లాడుతుంటే, బేస్‌మెంట్ నుంచి లాబీ ఏరియా మెట్ల వైపు ఈడ్చుకెళ్లారు. అక్కడ కూడా దానిని దారుణంగా బాదారు. దాంతో దానికి నోటి నుంచి రక్తం కారి, భయంతో అక్కడే మలమూత్ర విసర్జన చేసింది. అలా సగం ప్రాణంతో కొట్టుమిట్టాడుతున్న ఆ మూగజీవాన్ని ఒక గోనె సంచిలో కుక్కి, సొసైటీ వెనుక ఉన్న నిర్మానుష్య ప్రాంతంలో పడేశారు.

ఏడ్చేస్తూ వీడియో షేర్ చేసిన మంజరి

ఈ ఘోరం గురించి ఇన్స్టాగ్రామ్‌లో వీడియో పోస్ట్ చేసిన మంజరి ఫడ్నిస్ తీవ్రంగా ఎమోషనల్ అయ్యారు. “మైకీ ఎంతో అమాయకమైనది. ఎవరికీ ఏ హానీ చేయలేదు. అలాంటి మూగజీవాన్ని ఇంత దారుణంగా చంపడానికి మనసెలా ఒప్పింది? ఆ మృగాళ్లపై కఠిన చర్యలు తీసుకోవాలి. జంతువులను హింసించే వారిపై మన చట్టాలు మరింత కఠినంగా మారాలి” అంటూ కన్నీరు మున్నీరయ్యారు. ప్రస్తుతం మైకీ శరీరం కోసం వెతుకుతున్నామని ఆమె పేర్కొన్నారు.

ఈ వీడియో చూసిన నటీమణులు భూమి పెడ్నేకర్, వేదిక, డింపుల్ హయతి సహా వేలాది మంది నెటిజన్లు తీవ్ర దిగ్భ్రాంతి వ్యక్తం చేశారు. జంతు క్రూరత్వ నిరోధక చట్టం కింద దోషులను కఠినంగా శిక్షించాలంటూ మంజరికి మద్దతుగా నిలుస్తున్నారు. కాగా, మంజరి ఫడ్నిస్ తెలుగులో సిద్ధూ ఫ్రమ్ శ్రీకాకుళం, శుభప్రదం, జూనియర్ ఎన్టీఆర్ ‘శక్తి’ వంటి సినిమాలతో గుర్తింపు తెచ్చుకున్నారు. దీనిని చూసిన నెటిజన్లు ఆమె కుక్కను చంపిన వారిపై ఖటిన చర్యలు తీసుకోవాలపని డిమాండ్ చేస్తున్నారు.