లో బ్లడ్ ప్రెషర్ లేదా తక్కువ రక్తపోటు సమస్య చాలా మందిలో కనిపిస్తుంది. ముఖ్యంగా మహిళలు, యువతులు ఈ సమస్యను ఎక్కువగా ఎదుర్కొంటుంటారు. తల తిరగడం, బలహీనంగా అనిపించడం, కళ్ల ముందు మసకగా కనిపించడం, ఎప్పుడూ అలసటగా ఉండటం వంటి లక్షణాలు.. లో బీపీకి సంకేతాలు కావచ్చు. వేసవికాలంలో అధిక చెమట కారణంగా శరీరంలో నీటి శాతం తగ్గిపోవడం వల్ల ఈ సమస్య మరింత ఎక్కువ కావచ్చు.
చాలామంది ఉపశమనం కోసం ఇంట్లోనే కొన్ని చిట్కాలను ప్రయత్నిస్తుంటారు. అయితే కొన్ని చిట్కాలు తాత్కాలిక ఉపశమనం మాత్రమే ఇస్తాయి. ఇటీవల ఒక ఆయుర్వేద నిపుణురాలు డాక్టర్ ఉపాసన.. బెల్లం, ఇంగువతో చేసే సులభమైన చిట్కాను సూచించారు.
లో బీపీకి అనేక కారణాలు ఉండవచ్చు. విటమిన్ల లోపం, హార్మోన్ల మార్పులు, తక్కువ హిమోగ్లోబిన్ లెవెల్స్ వంటి సమస్యలు రక్తపోటు తగ్గడానికి కారణమవుతాయి. శరీరంలో నీటి కొరత కూడా ప్రధాన కారణాల్లో ఒకటి. అధిక చెమట వల్ల శరీరంలోని ద్రవాలు తగ్గిపోతాయి.
అలాగే ఎక్కువసేపు ఆహారం తీసుకోకుండా ఉండటం కూడా రక్తపోటును తగ్గించవచ్చు. కొన్ని మందుల ప్రభావం వల్ల కూడా ఈ సమస్య రావచ్చు. గుండె సంబంధిత వ్యాధులు ఉన్నవారిలో కూడా లో బీపీ కనిపించే అవకాశం ఉంటుంది. అందుకే తరచూ ఈ సమస్య ఎదురైతే అసలు కారణాన్ని తెలుసుకోవడం చాలా ముఖ్యం.
ఆయుర్వేద నిపుణురాలు డాక్టర్ ఉపాసన వోహ్రా ప్రకారం.. స్వచ్ఛమైన చిన్న బెల్లం ముక్క తీసుకోవాలి. కెమికల్స్తో తయారు చేసిన బెల్లాన్ని ఉపయోగించకపోవడం మంచిది.
ఆ బెల్లం ముక్కలో చిన్న రంధ్రం చేయాలి. ఆ రంధ్రంలో చిటికెడు ఇంగువ వేయాలి. తర్వాత ఆ బెల్లం ముక్కను నోట్లో పెట్టుకుని నెమ్మదిగా కరిగేలా ఉంచాలి. వెంటనే నమలకూడదు. లో బీపీ లక్షణాలు కనిపించినప్పుడు ఈ బెల్లం మిశ్రమంతో కొంత ఉపశమనం లభిస్తుంది.
బెల్లంలో సహజ చక్కెరలు ఉంటాయి. ఇవి శరీరానికి త్వరగా శక్తిని అందించడంలో సహాయపడవచ్చు. దాంతో బలహీనత, అలసట కొంతవరకు తగ్గవచ్చు. ఇంగువ ఆయుర్వేదంలో జీర్ణక్రియకు ఉపయోగకరమైన పదార్థంగా భావిస్తారు. బెల్లం, ఇంగువ కలయిక ఆరోగ్యానికి ప్రయోజనకరం. అయితే ఈ చిట్కాపై శాస్త్రీయ ఆధారాలు పరిమితంగానే ఉన్నాయని గుర్తుంచుకోవాలి.
ఎక్కువసేపు భోజనం చేయకుండా ఉండకూడదు. సమయానికి ఆహారం తీసుకోవడం చాలా ముఖ్యం. తగినంత నీరు తాగడం ద్వారా శరీరంలో ద్రవాల సమతుల్యతను కాపాడుకోవచ్చు.
తగినంత నిద్ర కూడా ఆరోగ్యానికి అవసరం. తల తిరిగే సమస్య ఉంటే ఒక్కసారిగా లేవకుండా నెమ్మదిగా కదలాలి. అవసరమైతే వైద్యుల సూచన మేరకు ఆహారంలో ఉప్పు పరిమాణాన్ని సర్దుబాటు చేసుకోవాలి.
Also Read: అద్దంలో మీ ముఖం ముడతలుగా కనిపిస్తోందా? ఈ సింపుల్ మేకప్ టిప్స్తో మళ్లీ యంగ్ లుక్
ఇంటి చిట్కాలు వైద్య చికిత్సకు ప్రత్యామ్నాయం కావు. తరచూ తల తిరగడం, తీవ్రమైన బలహీనత లేదా రక్తపోటు ఎక్కువగా పడిపోవడం వంటి లక్షణాలు ఉంటే వెంటనే వైద్యుడిని సంప్రదించాలి. సరైన పరీక్షలు చేసి కారణాన్ని గుర్తించడం ద్వారా భవిష్యత్తులో వచ్చే సమస్యలను నివారించవచ్చు.
‘లో బీపీ’ ఒక సాధారణ ఆరోగ్య సమస్య. బెల్లం-ఇంగువ చిట్కా కొంతమందికి ఉపశమనం ఇవ్వవచ్చు. అయితే సరైన ఆహారం, తగినంత నీరు, ఆరోగ్యకరమైన జీవనశైలి, వైద్యుల సలహా తీసుకోవడం ద్వారా ఈ సమస్యను నియంత్రించవచ్చు.
గమనిక: ఈ వ్యాసంలో ఉన్న సమాచారం కేవలం అవగాహన కోసమే. దీన్ని ఎట్టి పరిస్థితుల్లోనూ వైద్య నిపుణుల సలహాకు ప్రత్యామ్నాయంగా భావించకండి. మీ ఆరోగ్యానికి సంబంధించిన ఏవైనా సమస్యలు, సందేహాలు లేదా వైద్య పరిస్థితుల విషయంలో తప్పనిసరిగా నిపుణులను సంప్రదించి వారి సలహా తీసుకోవాలి.
Share
హోర్మూజ్ జలసంధి దగ్గర.. కూలిన అమెరికా అపాచీ హెలికాప్టర్, పైలట్లు సేఫ్
పాపం అల్లరి నరేష్ హీరోయిన్కి ఎంత కష్టం వచ్చింది.. తన కుక్కను చంపేశారంటూ..
