మౌనీ రాయ్, సూరజ్ నంబియార్ విడిపోయారా?.. విడాకుల వార్తలపై క్లారిటీ..

Mouni Divorce: ప్రముఖ బాలీవుడ్, టెలివిజన్ నటి మౌనీ రాయ్ ఆమె భర్త, వ్యాపారవేత్త సూరజ్ నంబియార్ వైవాహిక బంధం ముగింపు దశకు చేరుకుందంటూ సోషల్ మీడియాలో పెద్ద ఎత్తున ప్రచారం జరుగుతోంది. వీరిద్దరూ విడిపోయారని, ప్రస్తుతం కలిసి ఉండటం లేదనే పుకార్లు బాలీవుడ్ వర్గాల్లో సంచలనం సృష్టిస్తున్నాయి. అయితే, ఈ వార్తలపై అటు మౌనీ రాయ్ కానీ, ఇటు సూరజ్ కానీ ఇప్పటివరకు ఎలాంటి అధికారిక ప్రకటన చేయలేదు.

తాజాగా..

మీడియా కథనాల ప్రకారం.. ‘సాస్ బహు ఔర్ సాజిష్’ అనే కార్యక్రమం ఈ జంట విడిపోయినట్లు పేర్కొంది. అంతేకాకుండా, ఈ నివేదికలో కొన్ని సంచలన ఆరోపణలు కూడా వచ్చాయి. సూరజ్ కేవలం ప్రచారం, కీర్తి కోసమే మౌనీ రాయ్‌ను ఉపయోగించుకున్నాడని, ఆమె డబ్బును వాడుకుని మోసగించాడనే ఆరోపణలు వినిపిస్తున్నాయి. అయితే ఈ ఆరోపణలకు సంబంధించి ఎలాంటి స్పష్టమైన ఆధారాలు లేదా అధికారిక ధృవీకరణ లేదు.

పెరిగిన అనుమానాలు

సోషల్ మీడియా వేదికగా అభిమానులు గమనించిన కొన్ని మార్పులు ఈ పుకార్లకు మరింత బలాన్ని చేకూర్చాయి. మౌనీ రాయ్, సూరజ్ నంబియార్ ఇద్దరూ ఇన్‌స్టాగ్రామ్‌లో ఒకరినొకరు అన్‌ఫాలో చేసుకున్నారు. అంతేకాకుండా, సూరజ్ నంబియార్ తన ఇన్‌స్టాగ్రామ్ ఖాతాను పూర్తిగా డిలీట్ చేసినట్లు నెటిజన్లు గుర్తించారు. వీటితో పాటు మౌనీ రాయ్ తన ప్రొఫైల్ నుండి భర్తతో దిగిన ఫోటోలను, ముఖ్యంగా తమ పెళ్లి ఫోటోలను కూడా తొలగించడం అభిమానులను తీవ్ర ఆందోళనకు గురిచేస్తోంది.

వారి వివాహ బంధం

మౌనీ రాయ్, సూరజ్ నంబియార్‌ల వివాహం 2022 జనవరి 27న గోవాలో అత్యంత వైభవంగా జరిగింది. బెంగళూరుకు చెందిన సూరజ్ దుబాయ్‌లో ఇన్వెస్ట్‌మెంట్ బ్యాంకర్‌గా, వ్యాపారవేత్తగా స్థిరపడ్డారు. వీరి వివాహం మలయాళీ, బెంగాలీ సంప్రదాయాల ప్రకారం రెండు పద్ధతుల్లో జరిగింది. పెళ్లయినప్పటి నుండి ఈ జంట తమ హాలిడే ట్రిప్స్, పండుగ సెలబ్రేషన్స్ మరియు వ్యక్తిగత ఫోటోలను ఇన్‌స్టాగ్రామ్‌లో నిరంతరం పంచుకుంటూ ఎంతో అన్యోన్యంగా కనిపించేవారు. కానీ అకస్మాత్తుగా ఈ విడాకుల వార్తలు రావడం అందరినీ ఆశ్చర్యానికి గురిచేస్తోంది.

మౌనీ రాయ్ కెరీర్

భారతీయ బుల్లితెరపై మౌనీ రాయ్ అత్యంత ప్రజాదరణ పొందిన నటి. ‘కస్తూరి’, ‘దేవోం కే దేవ్… మహాదేవ్’, మరియు సూపర్ హిట్ సీరియల్ ‘నాగిన్’ లతో ఆమె విపరీతమైన క్రేజ్ సంపాదించుకుంది. ఆ తర్వాత బాలీవుడ్‌లోకి అడుగుపెట్టి అక్షయ్ కుమార్ సరసన ‘గోల్డ్’ చిత్రంలో నటించింది. రణబీర్ కపూర్, ఆలియా భట్ నటించిన ‘బ్రహ్మాస్త్ర: పార్ట్ వన్ – శివ’ సినిమాలో ఆమె పోషించిన నెగెటివ్ రోల్ విమర్శకుల ప్రశంసలు అందుకుంది. రియాలిటీ షోస్ ‘నాచ్ బలియే’, ‘ఝలక్ దిఖ్లా జా’, మరియు ‘టెంప్టేషన్ ఐలాండ్ ఇండియా’ వంటి షోలకు హోస్ట్‌గా కూడా వ్యవహరించింది. ప్రస్తుతం ఈ విడాకుల వార్తలపై నెట్టింట పెద్ద చర్చ నడుస్తుండటంతో, దీనిపై మౌనీ రాయ్ లేదా సూరజ్ స్పందించి క్లారిటీ ఇస్తేనే కానీ అసలు నిజం ఏమిటనేది తెలియదు.