Prabhas Fauji: ప్రభాస్ ‘ఫౌజి’ అప్డేట్ అదిరింది.. రిలీజ్ ప్లాన్ ఎప్పుడంటే?

Prabhas Fauji: ప్రభాస్ అభిమానులకు పూనకాలు తెప్పించే అప్‌డేట్ వచ్చేసింది! ‘కల్కి 2898 AD’ వంటి భారీ విజయం తర్వాత రెబల్ స్టార్ నటిస్తున్న క్రేజీ ప్రాజెక్ట్ ‘ఫౌజి’ . హను రాఘవపూడి దర్శకత్వంలో తెరకెక్కుతున్న ఈ సినిమా గురించి వచ్చిన ఆశక్తికరమైన వార్తతో అభిమానులు సంబరాలు చేసుకుంటున్నారు. పాన్ ఇండియా స్టార్ ప్రభాస్ ప్రస్తుతం వరుస ప్రాజెక్టులతో ఫుల్ బిజీగా ఉన్న సంగతి తెలిసిందే. అయితే వీటన్నింటిలోనూ ‘ఫౌజి’ సినిమాపై అంచనాలు ఆకాశాన్ని తాకుతున్నాయి. దీనికి ప్రధాన కారణం దర్శకుడు హను రాఘవపూడి ఎంచుకున్న పీరియాడిక్ వార్ డ్రామా నేపథ్యం. ఈ సినిమాకు సంబంధించిన తాజా అప్‌డేట్స్ ఇప్పుడు సోషల్ మీడియాలో వైరల్ అవుతున్నాయి.

టాకీ పార్ట్ పూర్తి..

లేటెస్ట్ సమాచారం ప్రకారం, ఈ సినిమాకు సంబంధించి ప్రధానమైన టాకీ పార్ట్ (డైలాగ్ సీన్స్) దాదాపుగా పూర్తయింది. నటీనటుల మధ్య సాగే కీలక సన్నివేశాలను దర్శకుడు ఇప్పటికే చిత్రీకరించారు. ఇక ఇప్పుడు అసలైన సవాల్ మొదలైంది. అదే సినిమాలోని యాక్షన్ పార్ట్. ఈ చిత్రం చారిత్రక యుద్ధ నేపథ్యం (1940ల కాలం) లో సాగుతుంది కాబట్టి, భారీ ఎత్తున యాక్షన్ సీక్వెన్స్‌లను ప్లాన్ చేశారు. ఈ సినిమాలోని భారీ వార్ ఎపిసోడ్స్ కోసం ఏకంగా 100 రోజుల కాల్షీట్స్ కేటాయించినట్లు తెలుస్తోంది. సినిమాలోని యుద్ధ సన్నివేశాలు అత్యంత సహజంగా, గతంలో ఎన్నడూ చూడని రీతిలో ఉండబోతున్నాయట. దీని కోసం భారీ సెట్స్ వేయడమే కాకుండా, విదేశీ నిపుణుల పర్యవేక్షణలో యాక్షన్ కొరియోగ్రఫీ జరుగుతోంది. ఈ 100 రోజుల పాటు ప్రభాస్ యుద్ధ భూమిలో శత్రువులతో పోరాడే వీరుడిగా కనిపించనున్నారు.

దసరా టార్గెట్!

సాధారణంగా భారీ చిత్రాలకు సమయం చాలా పడుతుంది. కానీ, చిత్ర యూనిట్ ఈ సినిమాను వచ్చే ఏడాది దసరా పండుగ కానుకగా విడుదల చేయాలని గట్టి పట్టుదలతో ఉంది. అనుకున్న సమయానికి షూటింగ్ పూర్తి చేసేందుకు దర్శకుడు హను రాఘవపూడి ఒక వ్యూహాత్మక నిర్ణయం తీసుకున్నారు. అదే ‘సెకండ్ యూనిట్’ను రంగంలోకి దింపడం. ప్రధాన యూనిట్ ఒకవైపు కీలక సన్నివేశాలను తీస్తుంటే, సెకండ్ యూనిట్ సమాంతరంగా ఇతర యాక్షన్ పార్ట్స్ లేదా అనుబంధ దృశ్యాలను చిత్రీకరిస్తుంది. దీనివల్ల ప్రొడక్షన్ వేగం పెరగడమే కాకుండా, పోస్ట్ ప్రొడక్షన్ పనులకు కూడా తగినంత సమయం లభిస్తుంది. ఈ సినిమాలో ప్రభాస్ బ్రిటిష్ కాలం నాటి ఆర్మీ ఆఫీసర్‌గా కనిపిస్తారని సమాచారం. ఇప్పటికే విడుదలైన కొన్ని లీక్డ్ పిక్స్ చూస్తుంటే ప్రభాస్ వింటేజ్ లుక్ ఫ్యాన్స్‌ను మెస్మరైజ్ చేస్తోంది. ‘సీతారామం’ వంటి క్లాసిక్ ఇచ్చిన హను రాఘవపూడి, ప్రభాస్ లాంటి మాస్ హీరోని ఎలా చూపిస్తారో అన్న కుతూహలం అందరిలోనూ ఉంది.