షూటింగ్‌లో జరిగిన చేదు అనుభవం గురించి చెబుతూ రాధా ప్రశాంతి ఎమోషనల్..

Radha Prasanthi: టాలీవుడ్ సీనియర్ నటి, తన ముక్కుసూటితనానికి ‘టైగర్’ అని పేరు తెచ్చుకున్న రాధా ప్రశాంతి ఇటీవల ఇచ్చిన ఒక ఇంటర్వ్యూలో సినిమా పరిశ్రమలో తనకు ఎదురైన ఒక భయంకరమైన సంఘటనను గుర్తు చేసుకున్నారు. షూటింగ్ సెట్స్‌లో మహిళా ఆర్టిస్టులకు ఎదురయ్యే ఇబ్బందుల గురించి ఆమె చేసిన వ్యాఖ్యలు ఇప్పుడు చర్చనీయాంశమయ్యాయి. తాజాగా దీనికి సంబందించిన వీడియో తెగ వైరల్ అవుతోంది.

బట్టలు మార్చుకుంటుంటే..

ఒక సినిమా షూటింగ్ జరుగుతున్న సమయంలో జరిగిన ఘటన గురించి ఆమె వివరిస్తూ.. తానుకు కేటాయించిన గదిలో బట్టలు మార్చుకుంటుండగా, అక్కడ పనిచేసే ఒక వ్యక్తి తలుపు వద్దకు వచ్చి అసభ్యంగా ప్రవర్తించాడని తెలిపారు. “నేను బట్టలు మార్చుకుంటుంటే అతను తలుపు కొడుతూ ఇబ్బంది పెట్టాడు. నేను ఇక్కడే ఉంటాను, నువ్వు మార్చుకోవాలి, ఇక్కడి నుంచి కదలను” అంటూ మొండిగా మాట్లాడటంతో తనకు ఎంతో కోపం వచ్చిందని ఆమె పేర్కొన్నారు.

తిరగబడ్డ నటి

అతని ప్రవర్తనను ఏమాత్రం సహించని రాధా ప్రశాంతి, వెంటనే గదిలో నుంచి బయటకు వచ్చి అతడిని బలంగా తన్నినట్లు వెల్లడించారు. తన ఆత్మగౌరవానికి భంగం కలిగించేలా ప్రవర్తించిన ఎవరినైనా తాను వదిలిపెట్టనని, అందుకే అప్పట్లో తనను అందరూ ‘టైగర్’ అని పిలిచేవారని ఆమె గర్వంగా చెప్పారు. తనను ఇబ్బంది పెట్టిన వ్యక్తులు ఎంతటి వారైనా సరే ఎదురుతిరగడంలో ఆమె ఎప్పుడూ వెనకాడలేదని ఈ సంఘటన నిరూపిస్తోంది.

కేవలం ఈ సంఘటన మాత్రమే కాకుండా, ఈ ఇంటర్వ్యూలో మరిన్ని ఆసక్తికర విషయాలను ఆమె పంచుకున్నారు. తన మానసిక స్థితి బాలేదని కొందరు కావాలనే దుష్ప్రచారం చేసి అవకాశాలు రాకుండా చేస్తున్నారని ఆవేదన వ్యక్తం చేశారు. ప్రస్తుతం తానొక అపార్ట్‌మెంట్‌లో ఒంటరి పోరాటం చేస్తున్నానని, అక్కడ వాచ్‌మెన్ ఫ్యామిలీతో ఎదురవుతున్న సమస్యల వల్ల తన ప్రాణాలకు ముప్పు ఉందని ఆందోళన వ్యక్తం చేశారు. తాను గనుక ఇండస్ట్రీలో జరిగిన వాస్తవాలన్నీ బయటపెడితే, ఇప్పుడు పెద్ద స్టార్లుగా చెలామణి అవుతున్న చాలా మంది బతుకులు రోడ్డున పడతాయని ఆమె సంచలన వ్యాఖ్యలు చేశారు. రాధా ప్రశాంతి చేసిన ఈ వ్యాఖ్యలు సినిమా పరిశ్రమలోని చీకటి కోణాలను మరోసారి బయటపెట్టాయి. ఆమె ధైర్యాన్ని చూసి నెటిజన్లు ప్రశంసలు కురిపిస్తున్నారు.