Sai Dharam Tej: ఉమెన్స్ డే స్పెషల్ సాయి ధరమ్ తేజ్ సందేశం అదిరిందిగా..

Sai Dharam Tej: అంతర్జాతీయ మహిళా దినోత్సవం సందర్భంగా సుప్రీం హీరో సాయి ధరమ్ తేజ్ ఒక ఆలోచింపజేసే వీడియోను విడుదల చేశారు. ఈ వీడియో సమాజంలో మహిళల పట్ల ఉండాల్సిన గౌరవాన్ని, మగవారి బాధ్యతను చాలా ప్రభావవంతంగా చాటిచెబుతోంది. ప్రతి మగవాడికి ఒక కోరిక ఉంటుంది.. తమకు కూడా ఒక ఆడపిల్ల పుడితే బాగుంటుందని. కానీ, ఆ కోరికతో పాటే ఒక తెలియని భయం కూడా వెన్నాడుతుంటుంది. “నా కూతురు ఈ సమాజంలో సురక్షితంగా ఉంటుందా? ఆమెకు సరైన గౌరవం దక్కుతుందా?” అనే ఈ ప్రశ్న ప్రతి తండ్రిని ఆలోచింపజేస్తుంది. ఇదే అంశాన్ని ఇతివృత్తంగా తీసుకుని సాయి ధరమ్ తేజ్ అందించిన సందేశం ప్రతి ఒక్కరి హృదయాన్ని కదిలిస్తోంది.

చిన్నతనం నుండి అలవడిన వివక్ష

మనం పెరిగే క్రమంలో తెలియకుండానే మహిళలను తక్కువ చేసే పదజాలాన్ని అలవాటు చేసుకున్నాం. “ఆడపిల్లలా ఏడవద్దు”, “ఆడపిల్లలా ఆడుతున్నావు”, “పనిచేయకపోతే ఆడంగిలా ఇంట్లో కూర్చుంటావా?” వంటి మాటలు మగపిల్లల మనసులో ‘అమ్మాయి అంటే తక్కువ’ అనే భావనను బలంగా నాటాయి. ఈ చిన్నపాటి మాటలే భవిష్యత్తులో మహిళల పట్ల చూపే చిన్నచూపుకు పునాదులవుతున్నాయి. ఒక అమ్మాయి పుడితే ఆమె ఎంత సర్దుకుపోవాలి, ఎంత జాగ్రత్తగా ఉండాలి, తనను తాను నిరూపించుకోవడానికి ఎంత కష్టపడాలి అనే భయం నేటి పురుషుల్లో కలుగుతోంది. ఇది కేవలం పెద్ద పెద్ద నేరాల గురించి మాత్రమే కాదు, ఆఫీసుల్లో, ఇళ్లలో, పబ్లిక్ ప్రదేశాల్లో ఆన్‌లైన్‌లో మహిళలు ఎదుర్కొనే చిన్న చిన్న ఇబ్బందుల గురించి. మన అమ్మ, చెల్లి, భార్య లేదా కొలీగ్.. వీరంతా ఎవరో ఒకరికి కూతుర్లే కదా అనే స్పృహ మనలో కలగాలని ఈ వీడియో గుర్తు చేస్తోంది.

పరిష్కారం..

ఈ భయం పోవాలంటే మనం పెద్ద పెద్ద యుద్ధాలు చేయనక్కర్లేదు. మన దైనందిన జీవితంలో చిన్న మార్పులు వస్తే చాలు.. మనం పడుకున్న దుప్పటి మనం మడతపెట్టుకోవడం, కాఫీ కప్పు సింక్ దగ్గర పెట్టడం వంటి చిన్న పనుల ద్వారా ఇంట్లోని మహిళలకు సాయపడటం. ఒక అమ్మాయి మాట్లాడుతున్నప్పుడు ఆమె మాటలను పూర్తిగా వినడం. అమ్మాయి ఎదుగుతుంటే అది ఆమె కష్టం వల్లే అని నమ్మడం. ‘కేరింగ్’ పేరుతో వారిని కంట్రోల్ చేయకుండా ఉండటం. ఎవరైనా అమ్మాయిని తక్కువ చేసి మాట్లాడితే, అది తప్పు అని గొంతెత్తి చెప్పడం.

మగతనం అంటే..

అందరూ మగవారు అలా ఉండరు అని సోషల్ మీడియాలో రాయడం కాదు, మనం ప్రవర్తనతో దాన్ని నిరూపించాలి. సమాజంలో రాక్షసులు కొంతమందే ఉంటారు, కానీ ఏదైనా తప్పు జరుగుతున్నప్పుడు మౌనంగా ఉండేవారు చాలా ఎక్కువ మంది ఉంటారు. ఆ మౌనాన్ని వీడి, మహిళల పక్షాన వానర సైన్యంలా నిలబడటమే నిజమైన ‘మగతనం’ అని సాయి ధరమ్ తేజ్ ఈ వీడియో ద్వారా పిలుపునిచ్చారు. తాజాగా ఈ వీడియో తెగ వైరల్ అవుతోంది.

స్త్రీల పట్ల గౌరవం, సమాజం పట్ల బాధ్యత ఉన్న వాడు ఎప్పుడూ హీరోనే.. అందులో సాయి ధరమ్ తేజ్ గురించి అయితే ప్రత్యేకంగా చెప్పక్కర్లేదు.. అందుకు ఇదే ఉదాహరణ… pic.twitter.com/FgqA1CxRdt

— మంచాల బాబు (@manchalababu03) March 8, 2026