Ustaad Bhagath Singh: ఏంటి ఉస్తాద్ భగత్ సింగ్.. ఖుషి సీక్వెల్ కథనా.. దర్శకుడు బయటపెట్టిన భయంకర నిజం..!

Ustaad Bhagath Singh:పవర్ స్టార్ పవన్ కళ్యాణ్ నటిస్తున్న తాజా చిత్రం ఉస్తాద్ భగత్ సింగ్ ప్రస్తుతం అభిమానుల్లో భారీ ఆసక్తిని కలిగిస్తోంది. దర్శకుడు హరీష్ శంకర్ తెరకెక్కిస్తున్న ఈ సినిమా మార్చి 19న ప్రపంచవ్యాప్తంగా థియేటర్లలో విడుదలకు సిద్ధమవుతోంది. మొదట ఈ చిత్రానికి భవదీయుడు భగత్ సింగ్ అనే టైటిల్‌ను ప్రకటించారు. అయితే తరువాత కథలో పెద్ద మార్పులు చేసి సినిమాకు ఉస్తాద్ భగత్ సింగ్ అనే పేరు పెట్టారు.

ఖుషి సినిమా కొనసాగింపు..!

ఈ సినిమాకు సంబంధించిన ఆసక్తికర విషయాన్ని తాజాగా హరీష్ శంకర్ ఒక ఇంటర్వ్యూలో వెల్లడించారు. మొదటగా ఈ కథను పవన్ కళ్యాణ్ నటించిన ఖుషి సినిమా కొనసాగింపుగా ఆలోచించామని ఆయన చెప్పారు. ఖుషి సినిమాలో ప్రేమలో పడిన ఇద్దరు యువకులు ఈగో కారణంగా విడిపోతారు. అదే ఆలోచనను మరింత ముందుకు తీసుకెళ్లాలని తనకు అనిపించిందని హరీష్ శంకర్ తెలిపారు.

అదే ఐడియాతో..!

అతను చెప్పిన ప్రకారం..ఖుషి కథ చివర్లో పెళ్లి చేసుకున్న ఆ జంట తరువాత మళ్లీ ఈగో సమస్యలతో విడిపోతే ఎలా ఉంటుందో అనే ఆలోచన తనకు వచ్చింది. తరువాత వారు ఇద్దరూ లెక్చరర్లుగా మారి అదే కాలేజీలో పనిచేస్తే కథ ఎలా ఉండొచ్చో అనే ఐడియాతో దాదాపు ఒక సంవత్సరం పాటు ప్రయాణం చేశానని ఆయన చెప్పారు.

అయితే పవన్ కళ్యాణ్ అభిమానులు మాత్రం మాస్ ఎంటర్టైనర్ కోరుకుంటారని అర్థమైందని హరీష్ శంకర్ అన్నారు. అందుకే ఆ కథను పక్కన పెట్టి కొత్త మాస్ కథను సిద్ధం చేశామని వెల్లడించారు. ఆ తరువాతే ఈ సినిమా ప్రస్తుత రూపాన్ని దక్కించుకుందని చెప్పారు.

ఇంకా ఆయన మాట్లాడుతూ, “గబ్బర్ సింగ్” సినిమాలో పవన్ కళ్యాణ్‌ను ఎక్కువ భాగం పోలీస్ యూనిఫామ్‌లో చూపించామని గుర్తు చేశారు. అందుకే ఈసారి పవన్ కళ్యాణ్‌ను ట్రెండీ డ్రెస్సులతో కొత్త స్టైల్లో చూపించాలని అనిపించిందని తెలిపారు. అదే ఆలోచనతో కొత్త కథను రూపొందించడం ప్రారంభించానని చెప్పారు.

హరీష్ శంకర్ అభిప్రాయం ప్రకారం, తాను మొదట ఆలోచించిన ఖుషి కొనసాగింపు కథను మరో హీరోతో చేయడం కష్టమని అన్నారు. ఆ కథ పవన్ కళ్యాణ్‌కే బాగా సరిపోతుందని ఆయన భావిస్తున్నట్లు చెప్పారు.

ఇప్పటికే ఉస్తాద్ భగత్ సింగ్ సినిమాపై అభిమానుల్లో భారీ అంచనాలు ఉన్నాయి. పవన్ కళ్యాణ్ మాస్ స్టైల్, హరీష్ శంకర్ దర్శకత్వం కలిస్తే మరోసారి బాక్సాఫీస్ వద్ద మంచి ఫలితం వస్తుందని అభిమానులు ఆశిస్తున్నారు.

ALSO READ: Ustaad Bhagath Singh Story: ఉస్తాద్ భగత్ సింగ్ కథ ఇదే.. తేరి సినిమా కథను ఇలా మార్చిన దర్శకుడు..!