How To Use Induction: ఇండక్షన్ స్టవ్ మీద వంట చేయడం ఎలా ? ఎలాంటి పాత్రలు అవసరం?

How To Use Induction: ఇండక్షన్ స్టవ్ ప్రస్తుతం చాలా మంది ఇళ్లలో వాడుతున్నారు. ఇది గ్యాస్ స్టవ్‌లతో పోలిస్తే వేగంగా..సురక్షితంగా, శుభ్రంగా వంట చేయడానికి సహాయప డుతుంది. కరెంట్ సహాయంతో పనిచేసే ఈ స్టవ్ ప్రత్యేకమైన సాంకేతికతతో వేడి ఉత్పత్తి చేస్తుంది. అయితే ఇండక్షన్ స్టవ్‌పై వంట చేయడానికి కొన్ని ప్రత్యేక పాత్రలు అవసరం. అవి లేకపోతే స్టవ్ పని చేయదు. ఇండక్షన్ స్టవ్ ఎలా పనిచేస్తుంది ? దానిపై వంట ఎలా చేయాలి ? ఎలాంటి పాత్రలు అవసరం వంటి విషయాలను ఇప్పుడు వివరంగా తెలుసుకుందాం.

ఇండక్షన్ స్టవ్ అనేది కరెంట్ ఆధారంగా పనిచేసే ఆధునిక వంట పరికరం. ఇందులో గ్యాస్ మంట ఉండదు. స్టవ్ ఉపరితలం కింద ఉండే ఎలక్ట్రోమాగ్నెటిక్ కాయిల్ ద్వారా వేడి ఉత్పత్తి అవుతుంది. ఈ కాయిల్ ద్వారా పాత్రలో నేరుగా వేడి ఏర్పడుతుంది. అందుకే వంట వేగంగా అవుతుంది.

ఇండక్షన్ స్టవ్ ఎలా పనిచేస్తుంది?
ఇండక్షన్ స్టవ్‌లో విద్యుత్ ప్రవాహం కాయిల్‌లోకి వెళ్లినప్పుడు ఒక ఎలక్ట్రోమాగ్నెటిక్ ఫీల్డ్ ఏర్పడుతుంది. ఆ ఫీల్డ్ మీద ఉంచిన ఐరన్ లేదా స్టీల్ పాత్రలో విద్యుత్ ప్రవాహం ఏర్పడి అది వేడిగా మారుతుంది. అంటే స్టవ్ వేడి కాకుండా పాత్ర మాత్రమే వేడి అవుతుంది. అందుకే ఇది సురక్షితమైన వంట పద్ధతిగా భావిస్తారు.

ఇండక్షన్ స్టవ్‌పై వంట ఎలా చేయాలి?

ఇండక్షన్ స్టవ్‌పై వంట చేయడం చాలా సులభం. కొన్ని సాధారణ దశలను పాటిస్తే సరిపోతుంది.

1.ముందుగా స్టవ్‌ను ఫోర్ సమానంగా ఉన్న స్థలంలో పెట్టాలి.

2.పవర్ ప్లగ్‌ను విద్యుత్ సాకెట్‌కు కలపాలి.

3.స్టవ్‌పై ఇండక్షన్‌కు సెట్ అయ్యే పాత్రను ఉంచాలి.

4.తర్వాత పవర్ బటన్ నొక్కి స్టవ్‌ను ఆన్ చేయాలి.

5.అవసరమైన వంట మోడ్ లేదా టెంపరేచర్‌ను సెలక్ట్ చేసుకోవాలి.

6. తరువాత గ్యాస్ పై చేసే విధంగానే వంట చేయవచ్చు.

ఇండక్షన్ స్టవ్‌లలో “బాయిల్”, “ఫ్రై”, “కుక్”, “హీట్” వంటి ప్రీసెట్ మోడ్‌లు కూడా ఉంటాయి. వీటిని ఉపయోగించడం వల్ల వంట మరింత సులభంగా అవుతుంది.

ఇండక్షన్ స్టవ్‌కు అవసరమైన పాత్రలు:

ఇండక్షన్ స్టవ్‌పై సాధారణ అల్యూమినియం లేదా మట్టి పాత్రలు పని చేయవు. దీనికి ప్రత్యేకమైన మెటల్ పాత్రలు అవసరం.

1.స్టెయిన్లెస్ స్టీల్ పాత్రలు

2.కాస్ట్ ఐరన్ పాత్రలు

3.ఇండక్షన్ బేస్ ఉన్న కుక్కర్లు

4.మాగ్నెటిక్ బేస్ ఉన్న పాన్‌లు

ఈ పాత్రల అడుగుభాగంలో మాగ్నెట్‌కు ఆకర్షణ ఉండాలి. ఒక చిన్న మాగ్నెట్‌ను పాత్ర అడుగుభాగానికి దగ్గర పెట్టినప్పుడు అతుక్కుంటే ఆ పాత్ర ఇండక్షన్ స్టవ్‌కు సరిపోతుంది.

ఇండక్షన్ స్టవ్ ఉపయోగం వల్ల లాభాలు:

ఇండక్షన్ స్టవ్ వాడటం వల్ల అనేక ప్రయోజనాలు ఉన్నాయి.

1. వేగంగా వంట:
గ్యాస్ స్టవ్‌తో పోలిస్తే ఇండక్షన్ స్టవ్‌లో నీరు లేదా ఆహారం త్వరగా వేడి అవుతుంది.

2. సురక్షితం:
మంట లేకపోవడం వల్ల ప్రమాదాలు తక్కువగా ఉంటాయి.

3. శుభ్రంగా ఉంటుంది:
స్టవ్ ఉపరితలం గాజు లాంటి స్మూత్‌గా ఉంటుంది కాబట్టి తుడవడం సులభం.

4. విద్యుత్ :
అవసరమైనంత టెంపరేచర్‌ను మాత్రమే ఉపయోగించవచ్చు.

Also Read: తక్కువ బడ్జెట్‌లో అదిరిపోయే QLED డిస్ప్లే.. TCL P7K స్మార్ట్ టీవీ పూర్తి రివ్యూ!

వాడేటప్పుడు జాగ్రత్తలు:

1.స్టవ్‌పై ఖాళీ పాత్రను ఎక్కువసేపు ఉంచకూడదు.

2.నీరు స్టవ్‌పై పడకుండా జాగ్రత్త పడాలి.

3.స్టవ్‌పై ప్లాస్టిక్ లేదా ఇతర వస్తువులు పెట్టకూడదు.

4.పాత్ర అడుగుభాగం సమతలంగా ఉండాలి.