Bengaluru Lady Don: బెంగళూరులో సంచలనం సృష్టించిన రియల్ ఎస్టేట్ వ్యాపారి కిడ్నాప్ కేసులో కీలక పరిణామం చోటుచేసుకుంది. ఈ కేసులో నిందితుడికి వత్తాసు పలుకుతూ, పోలీసుల విధులకు ఆటంకం కలిగించిన ‘లేడీ డాన్’గా పిలవబడే యశస్విని గౌడను సెంట్రల్ క్రైమ్ బ్రాంచ్ (CCB) అధికారులు తాజాగా అరెస్ట్ చేశారు. క్రైమ్ లోకంలో తనకంటూ ఒక ప్రత్యేక ముద్ర వేసుకున్న ఆమెను అదుపులోకి తీసుకోవడం ఇప్పుడు నగరంలో చర్చనీయాంశంగా మారింది.
వివరాల్లోకి వెళ్తే..
ఈ వివాదానికి మూలం గత ఏడాది ఆగస్టులో జరిగిన ఒక కిడ్నాప్ ఉదంతం. బెంగళూరుకు చెందిన ఒక ప్రముఖ రియల్ ఎస్టేట్ వ్యాపారి వద్ద రాజేష్ అనే వ్యక్తి సుమారు 1.20 లక్షల రూపాయలు అప్పుగా తీసుకున్నాడు. అయితే, తీసుకున్న డబ్బు తిరిగి చెల్లించమని వ్యాపారి ఒత్తిడి చేయడంతో, రాజేష్ అతనిపై కక్ష పెంచుకున్నాడు. ఎలాగైనా ఆ అప్పు తీర్చకుండా తప్పించుకోవాలని, పైగా వ్యాపారి దగ్గర మరికొంత సొమ్ము లాగాలని కిడ్నాప్ ప్లాన్ వేశాడు.
డబ్బు తిరిగి ఇస్తానని నమ్మబలికిన రాజేష్, ఆ వ్యాపారిని ఒక చోటికి రప్పించి తన అనుచరులతో కలిసి కిడ్నాప్ చేశాడు. బాధితుడిని కారులో బంధించి నగరం చుట్టూ తిప్పుతూ భయభ్రాంతులకు గురిచేశాడు. ప్రాణభయంతో ఉన్న వ్యాపారి నుంచి బలవంతంగా మరికొంత మొత్తాన్ని తన ఖాతాలోకి బదిలీ చేయించుకున్నాడు. ఆ తర్వాత బాధితుడిని వదిలిపెట్టి అక్కడి నుంచి పరారయ్యాడు. బాధితుడి ఫిర్యాదుతో రంగంలోకి దిగిన సెంట్రల్ క్రైమ్ బ్రాంచ్ (CCB) పోలీసులు నిందితుడి వేట మొదలుపెట్టారు.
ఈ కేసులో ప్రధాన నిందితుడైన రాజేష్ను పట్టుకోవడానికి పోలీసులు ప్రయత్నించినప్పుడు, యశస్వినీ గౌడ అడ్డుపడింది. దర్యాప్తు సంస్థల పనిని అడ్డుకుంటూ, నిందితుడిని రక్షించే ప్రయత్నం చేయడంతో పోలీసులు ఆమెపై తీవ్ర ఆగ్రహం వ్యక్తం చేశారు. చట్టాన్ని అతిక్రమించి, నేరస్తులకు అండగా నిలిచినందుకు గానూ ఆమెపై కేసు నమోదు చేసి, రెండు రోజుల క్రితం అధికారికంగా అరెస్ట్ చేశారు.
Also Read: నారాయణపూర్లో మావోయిస్టుల స్మారక స్థూపం ధ్వంసం చేసిన భద్రతా బలగాలు!
47 ఏళ్ల వయస్సున్న యశస్వినీ గౌడపై బెంగళూరులోని వివిధ పోలీస్ స్టేషన్లలో ఇప్పటికే ఏడుకు పైగా క్రిమినల్ కేసులు పెండింగ్లో ఉన్నాయని అధికారులు వెల్లడించారు. రియల్ ఎస్టేట్ సెటిల్మెంట్లు, బెదిరింపులు వంటి అంశాల్లో ఆమె పేరు తరచూ వినిపిస్తుంటుంది. ప్రస్తుత కిడ్నాప్ కేసులో ఆమె పాత్రపై పోలీసులు మరింత లోతుగా విచారణ జరుపుతున్నారు. నేరస్తులకు సహకరించే వారు ఎంతటి వారైనా వదిలే ప్రసక్తే లేదని పోలీసులు స్పష్టం చేశారు.
Share
BRS : గులాబీ పార్టీలో కట్టప్పలు!
Smriti Mandhana Mother: పలాష్ పెద్ద మోసగాడు..వాడిపై పగతో నా బిడ్డ ఆడింది, RCB విజయంపై స్మృతి తల్లి పోస్ట్ వైరల్
