లాకప్‌లో ఆత్మహత్యలకు చెక్.. ముంబై పోలీసుల కొత్త డ్రెస్ కోడ్!

New Dress Code For Accused: లాకప్‌లలో నిందితుల ఆత్మహత్యలను నిరోధించడానికి ఒక వినూత్నమైన, నిర్బంధ డ్రెస్ కోడ్‌ను ప్రవేశపెట్టారు ముంబై పోలీసులు. కస్టోడియల్ మరణాలను తగ్గించడం, నిర్బంధంలో ఉన్న వారి భద్రతను నిర్ధారించడం ఈ నిర్ణయం ప్రధాన ఉద్దేశ్యం. ఈ కొత్త విధానం ప్రకారం, పోలీస్ స్టేషన్ లాకప్‌లలో ఉండే నిందితులు స్వయంగా హాని చేసుకునే ప్రమాదాన్ని తగ్గించేలా రూపొందించిన ప్రత్యేక దుస్తులను ధరించాల్సి ఉంటుంది.

ఇటీవల అంటోప్ హిల్ పోలీస్ స్టేషన్‌లో ఒక దొంగతనం కేసులో నిందితులను కోర్టులో హాజరుపరిచినప్పుడు ఈ కొత్త డ్రెస్ కోడ్ వెలుగులోకి వచ్చింది. నిందితులు మెరూన్ కలర్ హాఫ్ స్లీవ్ టీ-షర్టులు, నలుపు రంగు షార్ట్స్ ధరించి కనిపించారు. నిందితులు తమ పొడవాటి దుస్తులను ఉరి వేసుకోవడానికి లేదా ఉచ్చులను తయారు చేయడానికి ఉపయోగించకుండా నిరోధించడమే ఈ అరచేతుల వరకు ఉండే టీ-షర్టులు, నిక్కర్ల వెనుక ఉన్న అసలు ఉద్దేశ్యం. చొక్కా కాలర్లు, పొడవాటి చేతులు లేదా ప్యాంటు కాళ్లను ముడులు వేయడానికి ఉపయోగించడం కస్టోడియల్ ఆత్మహత్యల్లో ప్రధాన రిస్క్ ఫ్యాక్టరీగా అధికారులు గుర్తించారు.

దుస్తులలో మార్పులతో పాటు, లాకప్‌ల మౌలిక సదుపాయాలను కూడా పోలీసులు మారుస్తున్నారు. లాకప్‌ లోపల ఉండే బాత్రూమ్ తలుపుల పై, కింది భాగాలను తొలగిస్తున్నారు. దీనివల్ల నిందితులు లోపల గడియ పెట్టుకుని తమకు తాము హాని చేసుకోకుండా నిరోధించవచ్చని అధికారులు భావిస్తున్నారు.

మహారాష్ట్రలో 2020 నుండి 2023 మధ్య కాలంలో 54 కంటే ఎక్కువ కస్టోడియల్ మరణాలు నమోదయ్యాయి, వీటిలో చాలా వరకు ఉరి వేసుకుని ఆత్మహత్య చేసుకున్న కేసులే ఉన్నాయి. ముఖ్యంగా నటుడు సల్మాన్ ఖాన్ ఇంటి వెలుపల కాల్పుల కేసులో నిందితుడైన అనుజ్ థాపన్, క్రైమ్ బ్రాంచ్ లాకప్‌లో బెడ్ షీట్ ఉపయోగించి ఆత్మహత్య చేసుకోవడం ఈ భద్రతా ప్రోటోకాల్‌ల సమీక్షకు ప్రధాన కారణమైంది. ప్రస్తుతం నిందితుల మానసిక స్థితికి త‌గిన‌ట్లుగా, అరెస్ట్ చేసిన వెంటనే వారికి ఈ సురక్షితమైన దుస్తులను అందజేస్తున్నారు.