Nitin Nabin: బీజేపీ కొత్త బాస్ ఫిక్స్.. జాతీయ అధ్యక్షుడిగా నితిన్ నబీన్ ఏకగ్రీవం!

Nitin Nabin: భారతీయ జనతా పార్టీ (BJP) నూతన జాతీయ అధ్యక్షుడిగా నితిన్ నబీన్ ఏకగ్రీవంగా ఎన్నికయ్యారు. జేపీ నడ్డా పదవీకాలం ముగియడంతో, పార్టీ పగ్గాలను యువ నాయకుడైన నితిన్ నబీన్‌కు అప్పగిస్తూ బీజేపీ అధిష్టానం నిర్ణయం తీసుకుంది. 50 ఏళ్ల లోపు వయసున్న నితిన్ నబీన్‌ను ఎంపిక చేయడం ద్వారా పార్టీ నాయకత్వంలో యువతకు పెద్దపీట వేస్తున్నట్లు బీజేపీ సంకేతాలిచ్చింది.

నితిన్ నబీన్ పేరును ప్రతిపాదిస్తూ మొత్తం 37 సెట్ల నామినేషన్లు దాఖలయ్యాయి. వేరే ఎవరూ పోటీలో లేకపోవడంతో ఆయన ఎన్నిక ఏకగ్రీవమైంది. రేపు (మంగళవారం) ఉదయం 11 గంటలకు నితిన్ నబీన్ బీజేపీ జాతీయ అధ్యక్షుడిగా ప్రమాణస్వీకారం చేయనున్నారు. ఈ కార్యక్రమానికి ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా, రక్షణ మంత్రి రాజ్‌నాథ్ సింగ్‌తో పాటు పలువురు కేంద్ర మంత్రులు, బీజేపీ పాలిత రాష్ట్రాల ముఖ్యమంత్రులు హాజరుకానున్నారు.

బీహార్ రాష్ట్రానికి చెందిన కీలక నాయకుడు నితిన్ నబీన్.. ఆయన బీహార్‌లోని బంకీపూర్ నియోజకవర్గం నుండి వరుసగా నాలుగుసార్లు ఎమ్మెల్యేగా గెలుపొందారు. గతంలో బీజేపీ యువ మోర్చా (BJYM) జాతీయ ఉపాధ్యక్షుడిగా పనిచేశారు. బీజేపీ జాతీయ అధ్యక్షుడిగా ఎన్నికవ్వడానికి ముందు ఛత్తీస్‌గఢ్ రాష్ట్ర బీజేపీ ఇంచార్జ్‌గా పనిచేశారు. అక్కడ అసెంబ్లీ ఎన్నికల్లో బీజేపీ విజయం సాధించడంలో ఆయన వ్యూహాలు కీలక పాత్ర పోషించాయి. నితీష్ కుమార్ మంత్రివర్గంలో గతంలో రోడ్డు నిర్మాణ శాఖ మంత్రిగా కూడా బాధ్యతలు నిర్వహించారు.