తమిళనాడు రాజకీయాల్లో పెను సంచలనం నమోదైంది. తమిళగ వెట్రి కళగం (టీవీకే) అధినేత విజయ్ ముఖ్యమంత్రిగా జరగాల్సిన ప్రమాణ స్వీకార కార్యక్రమం హఠాత్తుగా రద్దయింది. రేపు ఉదయం 11.30 గంటలకు సీఎంగా బాధ్యతలు చేపట్టాలని ఆయన అన్ని ఏర్పాట్లు చేసుకున్నప్పటికీ గవర్నర్ నుంచి అనుమతి లభించలేదు. మెజార్టీ నిరూపించుకోవడంలో తలెత్తిన సాంకేతిక ఇబ్బందుల వల్లే ఈ పరిస్థితి తలెత్తినట్లు తెలుస్తోంది. ప్రభుత్వ ఏర్పాటుకు అవసరమైన స్పష్టమైన బలం లేదని పేర్కొంటూ రాజ్ భవన్ వర్గాలు గ్రీన్ సిగ్నల్ ఇవ్వలేదు.
ప్రస్తుతం టీవీకే కూటమికి కాంగ్రెస్ ఎమ్మెల్యేలతో కలిపి కేవలం 112 మంది సభ్యుల మద్దతు మాత్రమే ఉంది. అసెంబ్లీలో మెజార్టీ నిరూపించుకోవడానికి కావాల్సిన మ్యాజిక్ ఫిగర్ అందకపోవడంతో గవర్నర్ నిబంధనల మేరకు నిర్ణయం తీసుకున్నారు. తగిన సంఖ్యాబలం లేకుండా ప్రభుత్వాన్ని ఏర్పాటు చేయడం సాధ్యం కాదని గవర్నర్ కార్యాలయం స్పష్టం చేసింది. దీంతో ముఖ్యమంత్రి కావాలన్న విజయ్ ఆశలకు తాత్కాలికంగా బ్రేక్ పడింది. సంఖ్యాబలాన్ని పెంచుకునే ప్రయత్నాలు ముమ్మరం చేసిన తరుణంలో రాజకీయ సమీకరణాలు వేగంగా మారుతున్నాయి.
ప్రమాణ స్వీకారం నిలిచిపోవడంతో టీవీకే అప్రమత్తమైంది. పార్టీ ఎమ్మెల్యేలందరూ తదుపరి ఆదేశాలు ఇచ్చేవరకు రిసార్టులోనే ఉండాలని విజయ్ ఆదేశించారు. ఎవరూ బయటకు వెళ్లకుండా కట్టుదిట్టమైన చర్యలు చేపట్టారు. ఇతర పార్టీల నేతలతో సంప్రదింపులు జరిపి మెజార్టీ సాధించే దిశగా పార్టీ వ్యూహరచన చేస్తోంది. రాజకీయ అస్థిరత నెలకొన్న నేపథ్యంలో ఎమ్మెల్యేలు చేజారిపోకుండా ఉండేందుకు రిసార్ట్ రాజకీయాలకు తెరలేచింది. రానున్న కొన్ని గంటల్లో తమిళనాడు రాజకీయాల్లో చోటుచేసుకునే పరిణామాలు ఇప్పుడు సర్వత్రా ఆసక్తిని రేకెత్తిస్తున్నాయి.
ALSO READ: తమిళనాట హుందాతనం.. కేరళలో విజ్ఞత.. మన దగ్గర ఈ తిట్ల పురాణం ఏంటి?
Share
నిన్ను కోరి’ రీ-రిలీజ్ హంగామా.. పాత జ్ఞాపకాలు బయటపెట్టిన ఆది పినిశెట్టి
ఖమ్మంలో శ్రీవారి ఆలయానికి గ్రీన్ సిగ్నల్.. ఫలించిన మంత్రి తుమ్మల కృషి!
