Romantic Drama: కొన్నిసార్లు మనిషికి కావాల్సింది డబ్బు, సౌకర్యాలు కాదు… తనను నిజంగా అర్థం చేసుకునే ఒక్క మనిషి. చిన్నప్పటి నుంచి ప్రేమకు దూరంగా పెరిగినా, జీవితంలో వరుసగా ఎదురు దెబ్బలు తగిలినా బయటకు మాత్రం నవ్వుతూ ఉండొచ్చు. కానీ లోపల పేరుకుపోయిన బాధను మర్చిపోవడానికి తప్పుడు అలవాట్లకు బానిసైతే, మనల్ని ప్రేమించే వ్యక్తి వచ్చినా మారగలమా ? ప్రేమ మనిషిని మార్చగలదా, లేక మారాలనే నిర్ణయం మన నుంచే రావాలా ? ఈ ప్రశ్నలకు భావోద్వేగాలతో సమాధానం చెప్పే ప్రయత్నమే ‘యెన్ ఎన్నై ఏదో సెయ్దాయ్’ (Yen Ennai Edho Seidhai). మరి ఈ ఎమోషనల్ మూవీని ఎక్కడ చూడవచ్చు ? అన్నది తెలుసుకుందాం పదండి.
కార్తీక్ సౌకర్యవంతమైన జీవితాన్ని గడిపే యువకుడు. ఉద్యోగం ఉంది, స్నేహితులున్నారు. సరదాగా గడపడానికి ఏ లోటూ లేదు. కానీ అతని జీవితంలో లేనిది మాత్రం మనసుకు దగ్గరగా ఉండే మనిషి. చిన్నతనంలో తల్లిని కోల్పోయి, తండ్రి ప్రేమకు కూడా దూరమైన కార్తీక్ ఒంటరితనాన్ని మర్చిపోవడానికి మద్యానికి అలవాటు పడతాడు. స్నేహితులతో తిరుగుతూ, మహిళలతో పరిచయాలు పెంచుకుంటూ రోజులు గడుపుతుంటాడు. అయినా అతని మనసులోని ఖాళీ మాత్రం అలాగే ఉండిపోతుంది.
అలాంటి సమయంలో అతని జీవితంలోకి మధు వస్తుంది. ఆమె ఓ బెంగాలీ యువతి. పరిస్థితుల కారణంగా ఎస్కార్ట్‌గా పని చేస్తూ, తన కూతురిని కోడైకెనాల్‌ లోని బోర్డింగ్ స్కూల్‌లో చదివిస్తుంటుంది. మొదట కార్తీక్ ఆమెను తనతో సమయం గడపడానికి పిలుస్తాడు. అయితే వారి పరిచయం కేవలం డబ్బు కోసం ఏర్పడిన సంబంధంగానే మిగిలిపోదు. ఇద్దరూ మాట్లాడుకుంటూ ఒకరినొకరు అర్థం చేసుకుంటారు. కార్తీక్‌కు మధు దగ్గరగా ఉండడం నచ్చుతుంది. మధుకు కూడా అతనిపై అభిమానం పెరుగుతుంది. అలా వారి మధ్య ప్రేమ మొదలవుతుంది.
మధుతో కలిసి జీవించాలని కార్తీక్ నిర్ణయించుకుంటాడు. ఆమె కూడా తన వృత్తిని వదిలి అతనితో కొత్త జీవితం మొదలు పెట్టేందుకు సిద్ధమవుతుంది. కానీ ప్రేమలో ఉన్నప్పుడు కనిపించని సమస్యలు కలిసి జీవించడం మొదలుపెట్టాక బయటపడతాయి. కార్తీక్ మద్యపానం, కోపం వారి బంధంలో చిచ్చు పెడతాయి. ఒక గొడవలో అతను మాట్లాడిన మాటలకు మధు మనసు విరిగిపోతుంది. తన కూతురి భవిష్యత్తును కూడా దృష్టిలో పెట్టుకుని ఆమె కార్తీక్‌ను విడిచి వెళ్లిపోతుంది. అప్పుడే అతను తన తప్పు తీవ్రతను గ్రహిస్తాడు. మధును తిరిగి పొందేందుకు ప్రయత్నిస్తాడు. ఆమె అతన్ని క్షమిస్తుందా ? వారి ప్రేమకు మరో అవకాశం దొరుకుతుందా ? అన్నదే మిగతా కథ.
ఈ సినిమా తమిళంలో రూపొందింది. డి. ఆంథోనీ (D Anthony) దర్శకత్వం వహించడంతో పాటు కార్తీక్‌గా నటించారు. మధుమిత దాస్ (Madhumita Das), జీవా రవి (Jeeva Ravi), రెజిన్ రోజ్ (Regin Rose) తదితరులు కీలక పాత్రల్లో కనిపిస్తారు. ప్రస్తుతం ఆహా (Aha Tamil)లో అందుబాటులో ఉంది. తమిళంలోనే స్ట్రీమింగ్ అవుతోంది. ఒంటరితనం, ప్రేమ, మనిషిలో మార్పు వంటి అంశాలతో సాగే సహజమైన పాయింట్స్ తో సినిమా ఎమోషనల్ గా సాగుతుంది. అయితే మూవీకి సెన్సార్ A సర్టిఫికెట్ ఇచ్చింది. కాబట్టి చిన్న పిల్లలతో చూడకపోవడమే బెటర్.
Share
ఇంజెక్షన్ వేయించుకోవాలంటే భయపడుతున్నారా? ఇలా చేస్తే నొప్పి అసలు తెలియదు
రాత్రి చక్కగా నిద్రపోయినా ఉదయం లేవగానే నీరసంగా ఉంటుందా? అయితే మీ బాడీలో ఈ 5 లోపాలున్నట్టే!
