Science Fiction psychological Horror: ఒక మనిషి అనుకోకుండా ఓ వింత ప్రపంచంలోకి వెళ్ళిపోతాడు. అక్కడ మనం ఎప్పుడూ చూసే గదులే ఉంటాయి… కానీ వాటికి అంతం ఉండదు. బయటకు వెళ్లే దారి కనిపించదు. చుట్టూ ఎవరూ ఉండరు. పైగా మనిషి భయాలు, జ్ఞాపకాలు, మానసిక గాయాలే అక్కడ ప్రమాదకరమైన రూపాల్లో ఎదురైతే ? అసలు ఆ ప్రపంచం నుంచి బయటపడటం సాధ్యమేనా ? ఇంటర్నెట్‌లో సంచలనం సృష్టించిన ‘బ్యాక్రూమ్స్’ (Backrooms) ఇదే కాన్సెప్ట్ ఆధారంగా తెరకెక్కిన సైకలాజికల్ హారర్ సినిమా. ఇప్పుడు తెలుగులో ఓటీటీలో అందుబాటులోకి వచ్చింది. మరి ఈ హర్రర్ మూవీని తెలుగులో ఏ ఓటీటీలో చూడవచ్చు ? స్టోరీ ఏంటి ? అనే వివరాలను తెలుసుకుందాం పదండి.
కథ 1990ల కాలంలో జరుగుతుంది. క్లార్క్ అనే ఫర్నిచర్ స్టోర్ యజమాని వ్యక్తిగత జీవితంలో తీవ్ర సమస్యలు ఎదుర్కొంటుంటాడు. భార్యతో సంబంధాలు దెబ్బతినడం, మానసికంగా కుంగిపోవడం అతన్ని డిప్రెషన్‌ లోకి నెట్టేస్తాయి. ఇదే సమయంలో తన స్టోర్ బేస్‌మెంట్‌ లో క్లార్క్ కు ఓ వింతైన రహస్య ద్వారం కనిపిస్తుంది. ఆ ద్వారం సాధారణ తలుపు కాదు. దాని వెనుక పూర్తిగా భిన్నమైన ప్రపంచం ఉంటుంది. పసుపు రంగు గోడలు, నిరంతరం శబ్దం చేసే ఫ్లోరోసెంట్ లైట్లు, ఎక్కడ చూసినా ఒకేలా కనిపించే ఖాళీ గదులు… బయటకు వెళ్లే మార్గం మాత్రం కనిపించదు. అదే ‘ది బ్యాక్రూమ్స్’.
ఆ ప్రపంచంపై ఆసక్తి పెరిగిన క్లార్క్, దాని నిర్మాణాన్ని అర్థం చేసుకోవడానికి గదులను మ్యాపింగ్ చేయడం మొదలు పెడతాడు. కానీ కొద్దికొద్దిగా అతని వాస్తవ ప్రపంచంతో సంబంధం తెగిపోతుంది. బయట ఉన్నవాళ్లకు అతను కనిపించకుండా పోతాడు. క్లార్క్ కు చికిత్స అందిస్తున్న డాక్టర్ మేరీ క్లైన్ అతని ఆచూకీ కోసం వెతుకుతూ చివరకు అదే బేస్‌మెంట్‌ లోకి అడుగు పెడుతుంది. అక్కడికి వెళ్లిన తర్వాత ఆమెకు కూడా ఆ అంతులేని గదుల భయంకరమైన ప్రపంచం ఎదురవుతుంది.
కానీ అక్కడి ప్రమాదం కేవలం దారి తప్పిపోవడం కాదు. బ్యాక్రూమ్స్ లో చిక్కుకున్న వ్యక్తుల భయాలు, జ్ఞాపకాలు, గతంలోని గాయాలు వింతైన జీవుల రూపంలో వారికి ఎదురవుతుంటాయి. అంటే బయటకు రావాలంటే ఆ ప్రపంచం నుంచి మాత్రమే కాదు… తమలోని భయాల నుంచి కూడా తప్పించుకోవాలి. మేరీ చివరకు క్లార్క్ ను గుర్తించిందా ? అప్పటికే మానసికంగా పూర్తిగా కుంగిపోయిన అతన్ని తిరిగి తీసుకురాగలిగిందా ? ఆ అంతులేని గదుల నుంచి ఇద్దరూ బయట పడగలిగారా ? లేక బ్యాక్రూమ్స్ వారినీ శాశ్వతంగా తనలోనే బంధించిందా ? అనేదే సినిమాలో చూడాల్సిన అసలైన కథ.
‘బ్యాక్రూమ్స్’ (Backrooms)ను A24 నిర్మించింది. క్రీపీపాస్టా అర్బన్ లెజెండ్స్, కేన్ పార్సన్స్ రూపొందించిన వైరల్ యూట్యూబ్ సిరీస్‌ కాన్సెప్ట్ ఆధారంగా ఈ సినిమా తెరకెక్కింది. చెవెటెల్ ఎజియోఫోర్, రెనేట్ రైన్స్‌వే తదితరులు కీలక పాత్రల్లో నటించారు. ఈ సైకలాజికల్ హారర్ చిత్రం ప్రస్తుతం ‘సోనీ లివ్’ (Sony LIV)లో స్ట్రీమింగ్ అవుతోంది. ముఖ్యంగా తెలుగు ప్రేక్షకులకు ఇది ప్లస్ పాయింట్. ఎందుకంటే ఇంగ్లీష్‌తో పాటు తెలుగు, హిందీ, తమిళం, కన్నడ, మలయాళ భాషల్లో డబ్బింగ్ అందుబాటులో ఉంది. సాధారణ హారర్ కంటే భిన్నంగా లిమినల్ స్పేసెస్, సైకలాజికల్ ఫియర్, మిస్టరీ కలిసిన సినిమా మంచి హర్రర్ థ్రిల్ ఇస్తుంది.
Read Also:
ఒంటరి మనుషులే టార్గెట్… సైకో వదిలిన క్లూస్‌తో ఊపిరి బిగపట్టే పోలీస్ ఇన్వెస్టిగేషన్ తెలుగులో
Share
ఓలా, ఊబర్, ర్యాపిడో బైక్‌లు సీజ్.. రవాణా శాఖకు ఆటో జేఏసీ డెడ్‌లైన్!
గన్స్.. గ్రేహౌండ్స్.. మధ్యలో శ్రీవిష్ణు.. ‘కామ్రేడ్ కళ్యాణ్’ టీజర్ ఎలా ఉందంటే!
