Biographical Documentary Series: బ్రెజిల్‌లోని ఓ సాధారణ అమ్మాయి… తన గొంతుతో కోట్లాది మంది అభిమానులను సంపాదించుకున్న సంగీత సంచలనం. ప్రేమలోని తీపి, విరహంలోని బాధ, జీవితంలో ఎదురయ్యే కన్నీళ్లను తన పాటల్లో పలికించిన గాయని మారిలియా మెండోన్సా. కానీ ఆమె పాటల వెనుక ఉన్న అసలు కథ ఏమిటి? ప్రపంచానికి తెలియని ఆమె వ్యక్తిగత జ్ఞాపకాలు ఎలా ఉంటాయి? ఎప్పుడూ వినని ఆడియో రికార్డింగ్‌లు, చూడని వీడియోలు బయటకు వస్తే ఆమె జీవితాన్ని మరో కోణంలో తెలుసుకునే అవకాశం దక్కుతుంది కదా. అలాంటి అరుదైన జ్ఞాపకాలతో ప్రేక్షకుల ముందుకొచ్చిన డాక్యుమెంటరీ సిరీస్ ‘మారిలియా మెండోన్సా ఆల్‌ ద ఫీల్స్‌’ (Marília Mendonça All the Feels). మరి ఈ డాక్యుమెంటరీ సిరీస్ స్ట్రీమింగ్ ఎక్కడ ? అనే విషయంలోకి వెళ్తే…
మారిలియా మెండోన్సా (Marília Mendonça) బ్రెజిల్‌ సంగీత ప్రపంచంలో తనకంటూ ప్రత్యేకమైన గుర్తింపు సంపాదించుకున్న గాయని, గేయరచయిత్రి. సాధారణ స్థాయి నుంచి మొదలైన ఆమె ప్రయాణం… కొద్దికాలంలోనే లక్షలాది మంది అభిమానులను సంపాదించుకునే స్థాయికి చేరుకుంది. ముఖ్యంగా బ్రెజిల్‌లో ప్రసిద్ధి చెందిన సెర్టానేజో సంగీతంలో తనదైన ముద్ర వేసింది. ప్రేమ, విరహం, మోసం, సంబంధాల్లోని సంఘర్షణలను నిజాయితీగా పలికించే ఆమె పాటలు ఎంతోమందికి తమ జీవితాన్నే గుర్తుచేసేవి. అందుకే ఆమెకు అభిమానులు కేవలం శ్రోతలుగా మాత్రమే కాకుండా, తమ భావాలను అర్థం చేసుకునే వ్యక్తిగా కూడా దగ్గరయ్యారు.
అయితే ఇంతటి పేరు సంపాదించుకోవడం వెనుక ఆమె సాగించిన ప్రయాణం అంత సులభమైనది కాదు. చిన్న వయసు నుంచే సంగీతంపై ఆసక్తి పెంచుకున్న మారిలియా… పాటలు రాయడం, సంగీత ప్రపంచంలో అవకాశాల కోసం ప్రయత్నించడం ద్వారా తన ప్రతిభను నిరూపించుకుంది. మొదట గేయరచయిత్రిగా గుర్తింపు తెచ్చుకున్న ఆమె, ఆ తర్వాత గాయనిగా తన సత్తా చాటింది. తన గొంతులోని భావోద్వేగం, పాటల్లోని సహజత్వం ఆమెను ఇతర గాయనుల నుంచి ప్రత్యేకంగా నిలబెట్టాయి. అలా ఒకదాని తర్వాత మరొకటి విజయాలు సాధిస్తూ బ్రెజిల్‌లోనే అత్యంత ప్రజాదరణ పొందిన గాయనుల్లో ఒకరిగా ఎదిగింది.
ఈ డాక్యుమెంటరీ సిరీస్ ఆమె విజయాలను మాత్రమే చూపించదు. మారిలియా జీవితానికి సంబంధించిన గతంలో విడుదల కాని దృశ్యాలు, ఆడియో రికార్డింగ్‌లు, వ్యక్తిగత సందేశాలు, ఆమెకు దగ్గరగా ఉన్నవారి జ్ఞాపకాల ద్వారా ప్రేక్షకులను ఆమె ప్రపంచంలోకి తీసుకెళ్తుంది. వేదికపై వేలాదిమంది అభిమానుల మధ్య పాటలు పాడే స్టార్‌గా కనిపించిన మారిలియా వెను తన భావాలను సంగీతంలో వ్యక్తం చేసిన ఓ సాధారణ మనిషి కూడా ఉన్నారని గుర్తుచేస్తుంది. ఆమె జీవితంలోని ముఖ్యమైన సందర్భాలు, సంగీతంతో ఆమెకున్న అనుబంధం, అభిమానులతో ఏర్పడిన భావోద్వేగ సంబంధం ఈ కథనంలో కీలకంగా నిలుస్తాయి.
2021 నవంబర్‌ 5న విమాన ప్రమాదంలో మారిలియా మరణించడం బ్రెజిల్‌ సంగీత ప్రపంచాన్ని తీవ్ర విషాదంలో ముంచింది. చిన్న వయసులోనే ఆమె దూరమవడంతో అభిమానులు ఇప్పటికీ ఆ బాధ నుంచి పూర్తిగా బయట పడలేకపోతున్నారు. అలాంటి సమయంలో ఆమెకు సంబంధించిన అరుదైన జ్ఞాపకాలు మరోసారి ప్రేక్షకుల ముందుకు రావడం ప్రత్యేకతను సంతరించుకుంది. ఆమె పాటలు ఎలా పుట్టాయి? ఆమెను దగ్గరగా చూసినవారు ఆమె గురించి ఏమంటున్నారు? ప్రపంచానికి తెలియని మారిలియా వ్యక్తిత్వం ఎలా ఉండేది? అనే అంశాలను తెలుసుకునే అవకాశం ఈ డాక్యుమెంటరీ కల్పిస్తుంది.
‘మారిలియా మెండోన్సా ఆల్‌ ద ఫీల్స్‌’ అక్టోబర్‌ 16 నుంచి అమెజాన్‌ ప్రైమ్‌ వీడియో (Amazon Prime Video)లో అందుబాటులోకి వచ్చింది. బ్రెజిల్‌కు చెందిన ఈ డాక్యుమెంటరీ సిరీస్ పోర్చుగీస్‌ భాషలో రూపొందింది. మారిలియా పాటలను ఇష్టపడేవారికి, ఆమె జీవితాన్ని మరింత దగ్గరగా తెలుసుకోవాలనుకునే వారికి ఇది భావోద్వేగభరితమైన అనుభూతిని అందించవచ్చు.
Share
పులివెందులలో హైటెన్షన్.. నామినేషన్ కేంద్రం వద్ద కాల్పులు జరిపిన పోలీసులు!
ఫోన్ ధర రూ.1.68 లక్షలు.. అయినా తగ్గదేలే అంటున్న జనాలు, iPhone Duoలో అంతలా ఏముంది?
