Feel Good Series OTT : ఒక మాంచి రిలాక్సింగ్ స్టోరీ చూడాలని ఎవరికైనా ఉంటుంది. అలాంటి వాళ్ళ కోసం ఒక జపనీస్ ఫీల్ గుడ్ వెబ్ సిరీస్ ఓటీటీలో అందుబాటులో ఉంది. చిన్న హోటల్ చుట్టూ తిరిగే ఈ స్టోరీ నిజంగానే ఒక అద్భుతం. ఇందులో పెద్ద పెద్ద ఫైటింగ్లు, హడావిడి ఏమీ ఉండవు. జస్ట్ మన పక్కింటి వాళ్ళ కథల్లాగే చాలా నేచురల్గా, హృదయానికి హత్తుకునేలా ఉంటుంది. రాత్రిపూట పడుకునే ముందు ఒక ఎపిసోడ్ చూస్తే మనసుకి చాలా హాయిగా అనిపిస్తుంది. దీనికి ఐయండిబిలో 8.6 రేటింగ్ ఉందంటే ఈ సిరీస్ ఎలా ఉంటుందో ప్రత్యేకంగా చెప్పక్కర్లేదు.
ఈ జపనీస్ ఫీల్ గుడ్ వెబ్ సిరీస్ పేరు ‘మిడ్నైట్ డిన్నర్’ (Midnight Diner). ఇది యారో అబే రాసిన మంగా కామిక్ ఆధారంగా రూపొందింది. ఇందులో మాస్టర్ పాత్ర పోషించిన కౌరు కోబయాషి సీరీస్ కు ప్రాణం పోశారనే చెప్పాలి. అతని నటన అంత అద్భుతంగా ఉంటుంది ఇందులో. ఈ సిరీస్ ప్రస్తుతం నెట్ఫ్లిక్స్ (Netflix) లో అందుబాటులో ఉంది. ఇందులో ‘మిడ్నైట్ డిన్నర్’, ‘మిడ్నైట్ డిన్నర్: టోక్యో స్టోరీస్’ అనే రెండు భాగాలు ఉంటాయి. మిడ్నైట్ డిన్నర్: టోక్యో స్టోరీస్ (సీజన్ 4) ఇది మొట్టమొదట నెట్ఫ్లిక్స్ ఒరిజినల్ సిరీస్గా 2016 అక్టోబర్ 21న, (సీజన్ 5) 2019 అక్టోబర్ 31న విడుదలైంది. అసలు మొదటి 3 సీజన్లు జపాన్ టీవీలో 2009 నుండి 2014 మధ్య వచ్చాయి. ఇవన్నీ కూడా నెట్ ఫ్లిక్స్ (Netflix)లో అందుబాటులో ఉన్నాయి.
టోక్యోలోని ఒక ఇరుకైన గల్లీలో ‘మెషియా’ అనే చిన్న హోటల్ ఉంటుంది. దీనికి బోర్డు కూడా ఉండదు. అర్ధరాత్రి 12 గంటలకు మొదలై, తెల్లవారుజామున 7 గంటలకు మూసివేస్తారు. అందుకే అందరూ దీన్ని ‘మిడ్నైట్ డిన్నర్’ అని పిలుస్తారు. ఆ హోటల్ నడిపే వ్యక్తిని అక్కడ అందరూ ‘మాస్టర్’ అంటారు. ఆయనకు ముఖంపై ఒక పెద్ద గాటు ఉంటుంది. అది ఎలా వచ్చిందో ఎవరికీ తెలియదు. ఆయన మెనూలో కేవలం ‘పోర్క్ మిసో సూప్’ తో పాటు మరికొన్ని పానీయాలు మాత్రమే ఉంటాయి. కానీ కస్టమర్లు తమకు నచ్చిన వంటకం అడిగితే, ఆయన దగ్గర దానికి సంబంధించి సామాగ్రి ఉంటే తప్పకుండా వండి పెడతాడు.
ఇక్కడికి గ్యాంగ్స్టర్లు, ఆఫీసు పని వాళ్ళు, ఒంటరిగా ఉండే వాళ్ళతో పాటు రకరకాల మనుషులు వస్తుంటారు. ప్రతి ఎపిసోడ్లో ఒక కొత్త కస్టమర్ వస్తారు. వాళ్ళు తమ బాధలను, ప్రేమకథలను మాస్టర్తో పంచుకుంటారు. మాస్టర్ వాళ్ళు అడిగిన వంటకాన్ని చేస్తూ, వాళ్ళ మాటలు వింటూ, అప్పుడప్పుడు చిన్న సలహాలు ఇస్తుంటాడు. భోజనం ముగిసేసరికి ఆ కస్టమర్ మనసు తేలికపడి, కొత్త ఆశతో హోటల్ నుండి బయటకు వెళ్తాడు . ఒక్క మాటలో చెప్పాలంటే, ఇది కేవలం వంటల గురించి కాదు. ఒంటరితనాన్ని పోగొట్టి, మనసును ఓదార్చే ఒక అద్భుతమైన సిరీస్.
Read Also : కారునే ఆఫీసుగా మార్చే క్రిమినల్ లాయర్… ఓటీటీలో అదరగొడుతున్న లీగల్ డ్రామా
Share
రైల్వే ప్రయాణికులు గుడ్ న్యూస్.. నర్సాపుర్-తిరుపతి మధ్య వీక్లీ ఎక్స్ప్రెస్
తమిళనాడు పర్యటన కోసం ప్రధాని తన స్కిన్ టోన్ మార్చుకున్నారా?
