Horror Thriller OTT : ఓటీటీలోకి ఏదో ఒక కంటెంట్ వస్తూనే ఉంది. వీటిలో హారర్ థ్రిల్లర్ సినిమాలను క్రేజీగా చూస్తున్నారు. దెయ్యాలు, ఆత్మలతో ఈ సినిమాలు ప్యాంట్లు తడిపిస్తుంటాయి. అలాంటి సినిమా గురించే ఇప్పుడు మనం చెప్పుకోబోతున్నాం. ఒక హాస్పిటల్ బ్యాక్డ్రాప్లో జరిగే ఈ కథలో అటు దయ్యాల భయం, ఇటు సస్పెన్స్ రెండూ ఉంటాయి. తన కొడుక్కి వచ్చిన వింత జబ్బును నయం చేయించడానికి వెళ్లిన ఒక తండ్రికి, అక్కడ ఊహించని భయంకరమైన పరిస్థితులు ఎదురవుతాయి. కేవలం దయ్యం సీన్లే కాకుండా, మెడికల్ ఫీల్డ్లో జరిగే కొన్ని చీకటి దందాలను కూడా ఈ సినిమాలో చూపించారు. పిల్లాడిని కాపాడుకోవడానికి తండ్రి చేసే పోరాటం, క్లైమాక్స్లో వచ్చే ట్విస్టులు సినిమాకు హైలైట్ గా నిలిచాయి.
2021లో వచ్చిన ఈ మరాఠీ హారర్ థ్రిల్లర్ సినిమా పేరు ‘బలి’ (Bali). విశాల్ ఫురియా ఈ సినిమాకు దర్శకత్వం వహించారు. ఆయన గతంలో లపాఛపి (Lapachhapi) అనే సూపర్ హిట్ హారర్ సినిమాను తీశారు. దానినే హిందీలో చోరీ (Chhorii) గా రీమేక్ చేశారు. మరాఠీ స్టార్ హీరో స్వప్నిల్ జోషి ఈ సినిమాలో ప్రధాన పాత్ర పోషించారు. ఆయన సుమారు రెండు దశాబ్దాల కెరీర్లో చేసిన మొదటి హారర్ సినిమా ఇది. ఇందులో పూజా సావంత్ డాక్టర్గా కీలక పాత్రలో నటించింది. GSEAMS బ్యానర్పై అర్జున్ సింగ్ బరన్, కార్తీక్ నిషాందర్ ఈ చిత్రాన్ని నిర్మించారు. ఈ సినిమా మొత్తం 103 నిమిషాల పాటు సాగుతుంది. ఇది కరోనా కారణంగా థియేటర్లలో విడుదల కాకుండా, నేరుగా అమెజాన్ ప్రైమ్ వీడియో (Prime Video) లో 2021 డిసెంబర్ 9న విడుదలైంది.
శ్రీకాంత్ అనే ఒక సాదాసీదా మధ్యతరగతి తండ్రికి తన ఏడేళ్ల కొడుకు మందార్ అంటే ప్రాణం. ఒకరోజు ఆ పిల్లాడు ఉన్నట్టుండి పడిపోతే, హడావిడిగా ఒక పాత హాస్పిటల్లో జాయిన్ చేస్తారు. అయితే ఆ హాస్పిటల్ చూడటానికి మామూలుగా ఉన్నా, దాని వెనక ఏదో గూడుపుఠాణి జరుగుతున్నట్టు కనిపిస్తుంది. ఆ పిల్లాడు ట్రీట్మెంట్ తీసుకుంటూనే, అక్కడ ఎవరికీ కనిపించని ‘ఎలిజబెత్’ అనే ఒక నర్సుతో మాట్లాడుతున్నానని చెప్పడంతో అసలు కథ మొదలవుతుంది. హాస్పిటల్లో ఆ ఎలిజబెత్ అనే నర్సు ఒక పాడుబడ్డ గదిలో ఉంటుందని, ఆమె చనిపోయిన పిల్లల ఆత్మలతో ఆడుకుంటుందని తెలిసి శ్రీకాంత్ గుండె ఆగిపోయినంత పని అవుతుంది.
ఆ పిల్లాడు రోజురోజుకూ వింతగా ప్రవర్తిస్తుంటే, అసలు ఆ నర్సు ఎవరు? ఆమెకి ఈ హాస్పిటల్కి ఉన్న పాత సంబంధం ఏంటి? అన్నది తెలుసుకోవడానికి శ్రీకాంత్ తన ప్రాణాలకు తెగించి రంగంలోకి దిగుతాడు. ఆ ఆసుపత్రి గదుల్లో వినిపించే ఏడుపులు, చీకటి మలుపులు చూస్తుంటే పక్కా భయం పుట్టిస్తుంది. చివరికి ఆ నర్సు వెనుక ఉన్న ఒక భయంకరమైన నిజాన్ని శ్రీకాంత్ తెలుసుకుంటాడు. డాక్టర్లు చేసే దారుణాల వల్ల చనిపోయిన వాళ్ల ఆత్మలు ప్రతీకారం తీర్చుకుంటున్నాయని అర్థమవుతుంది. ఇక తన కొడుకుని ఆ దయ్యం నుండి ? హాస్పిటల్ మాఫియా నుండి ? శ్రీకాంత్ ఎలా బయట పడేశాడు అనేదే క్లైమాక్స్. గజగజ వణికించే సీన్లతో సినిమా మొత్తం ఒక రేంజ్లో సాగుతుంది.
Read Also : హత్య కేసులో బోలెడు అనుమానాలు… కూతురిని కూడా అనుమానించే తండ్రి… నరాలు తెగే ఉత్కంఠ
Share
పెళ్లి వద్దు... మా ఇంటికి ఆడోళ్లే వద్దనే ముగ్గురన్నదమ్ములు... ఓటీటీలో నవ్వించి చంపేస్తున్న కామెడీ సినిమా
PSL ఆడటం దండగ, అదో దిక్కుమాలిన టోర్నమెంట్, IPL వదులుకుని తప్పు చేశా
