Web Film OTT : ఓటీటీలోకి వస్తున్న జీవీ ప్రకాష్ వెబ్ ఫిల్మ్… స్ట్రీమింగ్ ఎప్పుడంటే ?

Web Film OTT : జివి ప్రకాష్ కుమార్, అనస్వర రాజన్ ప్రధాన పాత్రల్లో నటించిన ‘లక్కీ ది సూపర్ స్టార్’ వెబ్ ఫిల్మ్ ఓటీటీలోకి వస్తోంది. ఇది ఒక ఫ్యామిలీ ఎంటర్‌టైనర్ గా రూపొందింది. ఇది ఒక తప్పిపోయిన కుక్కపిల్ల చుట్టూ తిరిగే ఎమోషనల్ డ్రామా. పిల్లలతో కలిసి, ఫ్యామిలీ మొత్తం ఎంజాయ్ చెయ్యచ్చు ఈ సినిమాను చూస్తూ. మరి ఇది ఎప్పుడు, ఎక్కడ స్ట్రీమింగ్ కానుందో తెలుసుకుందాం పదండి.

ఎప్పుడు ఎక్కడ చూడచ్చు అంటే

‘లక్కీ ది సూపర్ స్టార్’ (Lucky The Superstar) 2026 ఫిబ్రవరి 20 నుండి నేరుగా జియో హాట్ స్టార్ (JioHotstar) ఓటీటీలో స్ట్రీమింగ్ కానుంది. ఇందులో జి.వి. ప్రకాష్ కుమార్, అనస్వర రాజన్ ప్రధాన పాత్రల్లో నటించగా, శరత్ కుమార్, కోవై సరళ, దేవదర్శిని ఇతర ముఖ్య పాత్రలు పోషించారు. ‘ది ఫ్యామిలీ మ్యాన్’ సిరీస్‌లో ‘చెల్లం సార్’గా పేరు తెచ్చుకున్న ఉదయ్ మహేష్ ఈ చిత్రానికి దర్శకత్వం వహించారు. హేషమ్ అబ్దుల్ వహాబ్ (ఖుషి ఫేమ్) సంగీతాన్ని అందించారు. ఈ సినిమా తమిళంతో పాటు తెలుగు, మలయాళం, కన్నడ, హిందీ భాషల్లో కూడా రానుంది.

స్టోరీలోకి వెళ్తే

ఈ కథ లక్కీ అనే ఒక కుక్కపిల్ల చుట్టూ తిరుగుతుంది. ఒక రోజు అనుకోకుండా, లక్కీ తన యజమాని నుంచి దూరమై పోతుంది. అలా దారితప్పిన ఆ కుక్కపిల్ల వేర్వేరు మనుషుల దగ్గరకు వెళ్తుంది. ఆశ్చర్యకరంగా, లక్కీ వెళ్ళిన ప్రతిచోటా ఏదో ఒక మంచి జరుగుతుంటుంది. దిగులుగా ఉన్న ఒక చిన్న పాపను నవ్వించడం, గొడవ పడుతున్న ఒక ఫ్యామిలీని కలపడం, ఒక మ్యూజిషియన్‌కి తోడుగా ఉండటం ఇలా అందరి జీవితాల్లో అది ఒక ‘సూపర్ స్టార్’లా మారిపోతుంది.

కానీ ఇంతలో మున్సిపాలిటీ వాళ్లు వీధి కుక్కలను పట్టుకునే పని మొదలుపెడతారు, అందులో లక్కీ కూడా చిక్కుకుంటుంది. ప్రాణంగా పెంచుకున్న కుక్కపిల్ల కనిపించకపోవడంతో హీరో (జి.వి. ప్రకాష్) కంగారుపడి దాన్ని వెతకడం మొదలుపెడతాడు. చివరికి లక్కీని అతను ఎలా కనిపెట్టాడు? ఆ కుక్కపిల్ల వల్ల ఎన్ని జీవితాలు మారాయి? అనేదే ఈ సినిమా మెయిన్ స్టోరీ.