Romantic Series on OTT : ప్రకృతి అందాలు, స్వచ్ఛమైన పల్లెటూరి వాతావరణంతో కూడిన ప్రేమ కథ కావాలనుకుంటే, ఇప్పుడు చెప్పుకోబోయే కొరియన్ రొమాంటిక్ సిరీస్ ను చూడాల్సిందే. సిటీ లైఫ్ ఒత్తిడిలో పడి అన్నీ కోల్పోయిన ఒక అమ్మాయి, తన సొంత ఊరికి వెళ్ళినప్పుడు అక్కడి మనుషుల ప్రేమాభిమానాలు, ప్రకృతి అందాలు ఆమె జీవితంలో ఆనందాన్ని ఎలా మళ్ళీ నింపాయనేది ఇందులో చాలా అందంగా చూపిస్తారు. పాత ప్రేమ, విడదీయలేని స్నేహం, కుటుంబ బంధాల చుట్టూ తిరిగే ఈ కథ చూస్తున్నంత సేపు మనకు చాలా ప్రశాంతంగా, మనసుకి హాయిగా అనిపిస్తుంది. ఇలాంటి కంటెంట్ తో కొరియన్ డ్రామాలు చాలానే ఉన్నా, ఇది మాత్రం మన ఊరిలో మనం ఉన్నట్లు అనిపించేలా చేస్తుంది. దీనికి ఐయండిబిలో ఎనిమిదికి పైగా రేటింగ్ కూడా ఉందంటే కథలో ఎంత దమ్ము ఉందో తెలుస్తోంది.
2023లో వచ్చిన ఒక అందమైన కొరియన్ డ్రామా ‘వెల్కమ్ టు సమడాల్రి’ (Welcome to Samdal-ri). ఇందులో జి చాంగ్-వుక్, షిన్ హ్యే-సన్ ప్రధాన పాత్రలు పోషించారు. డ్రామాలో చూపించిన జేజు ఐలాండ్ అందాలు మామూలుగా ఉండవు. ఈ సిరీస్ క్లైమాక్స్ వచ్చేసరికి కొరియాలో విపరీతమైన రేటింగ్స్ సాధించి, అక్కడి టాప్ డ్రామాల్లో ఒకటిగా నిలిచింది. ఇక సంగీతం విషయానికి వస్తే, ఇందులో పాటలు వినడానికి చాలా హాయిగా ఉంటాయి. ముఖ్యంగా ‘సెవెంటీన్’ గ్రూప్కు చెందిన డికె (DK) పాడిన పాటలు కుర్రకారును బాగా ఆకట్టుకున్నాయి. ఈ డ్రామాకి పని చేసిన దర్శకుడు ఇదివరకు ‘వెన్ ద కెమెల్లియా బ్లూమ్స్’ లాంటి హిట్ డ్రామాలను తీసిన ఆయనే కావడం విశేషం. అందుకే ఇందులో పల్లెటూరి మనుషుల మధ్య ఉండే ఎమోషన్స్ ను కళ్లకి కట్టినట్లు చూపించారు.16 ఎపిసోడ్స్లో హీరో హీరోయిన్ల చిన్నప్పటి జ్ఞాపకాలు, వాళ్ళు విడిపోవడానికి గల కారణాలు, తిరిగి ఎలా దగ్గరయ్యారనే విషయాలను దర్శకుడు చాలా హార్ట్ టచింగ్ గా చూపించారు. ఈ సిరీస్ ప్రస్తుతం నెట్ ఫ్లిక్స్ (Netflix)లో స్ట్రీమింగ్ అవుతోంది.
జో సామ్-డాల్ అనే అమ్మాయి సమడాల్రి అనే చిన్న పల్లెటూరు నుండి సిటీకి వెళ్లి, తన కష్టంతో పెద్ద ఫ్యాషన్ ఫోటోగ్రాఫర్ అవుతుంది. కానీ అక్కడ తన దగ్గర పనిచేసే ఒక అమ్మాయి కుట్ర వల్ల సామ్ డాల్ మీద ఒక నింద పడుతుంది. జనం అంతా తనని తిడుతుంటే, తట్టుకోలేక ఎవరికీ చెప్పకుండా రాత్రికి రాత్రే తన సొంతూరైన సమడాల్రికి వచ్చేస్తుంది. అక్కడ తన చిన్నప్పటి స్నేహితుడు, పాత ప్రేమికుడు అయిన జో యంగ్-పిల్ ఎదురవుతాడు. అసలు సామ్-డాల్, యంగ్-పిల్ ఇద్దరూ ఒకే రోజు, ఒకే ఊర్లో పుడతారు. చిన్నప్పటి నుండి ప్రాణంగా పెరిగిన వీళ్లు పెద్దయ్యాక ప్రేమించుకుంటారు. కానీ సడన్గా సామ్-డాల్ అతనికి బ్రేకప్ చెప్పి సిటీకి వెళ్లిపోతుంది. యంగ్-పిల్ మాత్రం తనని మర్చిపోలేక, తన ఊరిలోనే వాతావరణ శాఖలో పనిచేస్తూ ఆమె కోసం ఎదురుచూస్తుంటాడు.
నిజానికి వీళ్లిద్దరూ విడిపోవడానికి కారణం యంగ్-పిల్ తండ్రి. ఒకప్పుడు జరిగిన ప్రమాదంలో యంగ్-పిల్ తల్లి చనిపోవడానికి సామ్-డాల్ తల్లే కారణమని ఆయన ఈ జంటను విడదీస్తాడు. ఆ ఊర్లో అందరూ సామ్-డాల్ని తప్పు పడుతున్నా, యంగ్-పిల్ మాత్రం ఆమె వెంటే ఉండి ధైర్యం చెప్తాడు. ఆమె మళ్ళీ కెమెరా పట్టుకునేలా ప్రోత్సహిస్తాడు. ఈ క్రమంలోనే పెద్దల మధ్య ఉన్న పాత పగలు తొలగిపోతాయి. యంగ్-పిల్ తండ్రి కూడా తన తప్పు తెలుసుకుని వీళ్ళ పెళ్లికి ఒప్పుకుంటాడు. చివరకు సామ్-డాల్ తనపై పడ్డ నిందను పోగొట్టుకుని, తిరిగి సిటీకి వెళ్లకుండా తన ఊర్లోనే తనకి నచ్చిన పని చేస్తూ, తన మనసు మెచ్చిన వాడితో సంతోషంగా ఉండటంతో కథ ముగుస్తుంది.
Read Also : గర్భవతుల్నే టార్గెట్ చేసి ఘోరంగా చంపే సైకో… ఒక్కో సీన్ కు వణుకు పుట్టాల్సిందే
Share
ఆయన క్రమశిక్షణే మాకు స్ఫూర్తి.. చౌదరి మృతిపై చిత్ర పరిశ్రమ దిగ్భ్రాంతి.
మనిషి మాంసంతో బిజినెస్... వంద నిమిషాల పాటు వెన్నులో వణుకు పుట్టించే సినిమా
