Sports Drama OTT : చదరంగం నేపథ్యంలో సాగే ఒక అద్భుతమైన పీరియడ్ డ్రామా ఓటీటీలో సంచలనం సృష్టించింది. ఇది కేవలం ఆట గురించి మాత్రమే కాకుండా, ఒక అనాథ అమ్మాయి తన అసాధారణ మేధస్సుతో ప్రపంచ స్థాయికి ఎలా ఎదిగిందనేది కళ్ళకు కట్టినట్లు చూపిస్తుంది. ఈ సిరీస్ ప్రభావం ఎంతలా ఉందంటే, ఇది రిలీజ్ అయిన తర్వాత ప్రపంచవ్యాప్తంగా చెస్ బోర్డుల అమ్మకాలు 87% పెరిగిపోయాయి. గూగుల్లో చెస్ ఎలా ఆడాలి? అని వెతికే వాళ్ళ సంఖ్య విపరీతంగా పెరిగిపోయింది. అప్పట్లో మగవాళ్ళే రాజ్యమేలే చెస్ ఆటలో ఒక అమ్మాయి తన తెలివితేటలతో ఎలా గెలిచింది అనే పాయింట్ అందరికీ బాగా నచ్చింది. 1950ల కాలం నాటి వాతావరణం, అద్భుతమైన కాస్ట్యూమ్స్, ఉత్కంఠభరితమైన మ్యాచ్లతో సాగే ఈ సిరీస్, చెస్ గురించి తెలియని వాళ్ళని కూడా కట్టిపడేస్తుంది.
2020లో వచ్చిన ఈ సిరీస్ పేరు ‘ది క్వీన్స్ గాంబిట్’ (The Queen’s Gambit). ఇది నెట్ఫ్లిక్స్లో అత్యంత ప్రజాదరణ పొందిన వెబ్ సిరీస్లలో ఒకటి. ఇందులో అన్యా టేలర్-జాయ్, బిల్ క్యాంప్, థామస్ బ్రాడీ-సాంగ్స్టర్ లీడ్ రోల్స్ లో నటించారు. సిరీస్లో చూపించిన ప్రతి చెస్ మ్యాచ్ వెనుక చాలా పెద్ద కసరత్తే జరిగింది. ప్రపంచ ప్రసిద్ధ చెస్ ప్లేయర్ గ్యారీ కాస్పరోవ్ స్వయంగా ఈ సిరీస్కు సలహాదారుడిగా ఉండి, బోర్డు మీద పావుల కదలికలు పక్కాగా ఉండేలా చూశారు. హీరోయిన్ అన్యా టేలర్-జాయ్ ఒక్కో మ్యాచ్కు సంబంధించిన మూవ్స్ను కేవలం షూటింగ్ ముందే నేర్చుకుని, వేగంగా ఆడుతూ అందరినీ ఆశ్చర్యపరిచేది. అసలు విషయం ఏంటంటే, ఈ కథను సినిమాగా తీయాలని దాదాపు 30 ఏళ్ల క్రితమే అనుకున్నా, చెస్ బోర్డు ఆటను జనం చూస్తారా అన్న సందేహంతో ఎవరూ ముందుకు రాలేదు. కానీ నెట్ఫ్లిక్స్ (Netflix)లో విడుదలయ్యాక ఇది ఒక సెన్సేషన్ క్రియేట్ చేసింది. ఇది 11 ఎమ్మీ అవార్డులను, 2 గోల్డెన్ గ్లోబ్ అవార్డులను గెలుచుకుని సంచలనం సృష్టించింది. మొత్తం 7 ఎపిసోడ్ల ఈ లిమిటెడ్ సిరీస్ మిమ్మల్ని ఒక కొత్త లోకానికి తీసుకెళ్తుంది.
బెత్ హార్మన్ అనే ఒక చిన్న పిల్ల, చిన్నప్పుడే అమ్మను కోల్పోయి అనాథాశ్రమానికి చేరుతుంది. అక్కడ ఉన్న టైమ్లో, ఆ అనాథాశ్రమంలో ఉండే వాచ్మెన్ తాత చెస్ ఆడుతుంటే చూసి, ఈ అమ్మాయికి కూడా ఆ ఆట మీద పిచ్చి పుడుతుంది. ఎవ్వరూ నేర్పకపోయినా, కేవలం చూస్తూనే ఆ ఆటలో ఉన్న మెళకువలన్నీ పట్టేస్తుంది. కానీ అదే టైమ్లో అక్కడ పిల్లలకి ఇచ్చే మత్తు బిళ్లలకి ఈ పిల్ల బానిస అయిపోతుంది. రాత్రిపూట ఆ మత్తులో గాలిలో చెస్ బోర్డు ఊహించుకుంటూ తన మైండ్లోనే ఆటను ప్రాక్టీస్ చేసే ఒక వింత అలవాటు ఈమెకు మొదలవుతుంది.
తర్వాత ఒక ఫ్యామిలీ ఈమెను దత్తత తీసుకుంటుంది. అక్కడి నుండి బెత్ అసలు ఆట మొదలవుతుంది. అప్పట్లో చెస్ అంటే కేవలం మగవాళ్ళ ఆట అన్నట్టు ఉండేది. కానీ ఈ పిల్ల తన తెలివితేటలతో ఒక్కొక్కరిని మట్టికరిపిస్తూ ముందుకు దూసుకెళ్తుంది. లోకల్ టోర్నమెంట్ల నుండి నేషనల్ లెవెల్ వరకు అందరినీ ఓడించి ‘చెస్ క్వీన్’ అనిపించుకుంటుంది. ఈ క్రమంలో ఈమెకి చాలామంది మిత్రులు దొరుకుతారు. అలాగే కొంతమంది గట్టి ప్రత్యర్థులు కూడా ఎదురవుతారు. కానీ లోపల ఉన్న మత్తు మందుల అలవాటు మాత్రం ఈమెను పీడిస్తూనే ఉంటుంది.
చివరికి ఈమె రష్యా వెళ్లి, అక్కడ ఉన్న ప్రపంచంలోనే తోపు ప్లేయర్ అయిన బోర్గోవ్తో తలపడుతుంది. గతాన్ని, తనకున్న అలవాట్లను, భయాలను అన్నింటినీ పక్కన పెట్టి బెత్ ఆడే ఆట మామూలుగా ఉండదు. తన స్నేహితులందరి సపోర్ట్తో, కేవలం తన మైండ్ పవర్తో ఆ రష్యన్ ఛాంపియన్ను ఓడించి హిస్టరీ క్రియేట్ చేస్తుంది. ఒక అనాథ అమ్మాయి తన టాలెంట్తో ప్రపంచాన్నే తన వైపు తిప్పుకోవడమే ఈ ‘ది క్వీన్స్ గాంబిట్’ కథ.
Read Also : మార్చురీ నుండి మాయమైన మృతదేహం…క్లైమాక్స్ లో ఊహించని షాకింగ్ ట్విస్ట్… ఐయండిబిలో 7.6 రేటింగ్
Share
తండ్రి రివెంజ్ మామూలుగా లేదుగా.. ఓటీటీలో స్ట్రీమింగ్ అవుతున్న క్రేజీ థ్రిల్లర్!
నా ఫస్ట్ టార్గెట్ బీఆర్ఎస్.. ఎవరినీ విడిచిపెట్టను, కవిత సంచలనం
