గ్రాండ్ మా మంచాన పడిందని వస్తే… ప్యారిస్ మోడల్ కు ప్యాంట్ తడిపించే కష్టం

Psychological Horror Thriller అనారోగ్యంతో ఉన్న అమ్మమ్మను చూసుకోవాలని ఎవరికి ఉండదు చెప్పండి. అయితే మంచి చేయడం కోసం అమ్మమ్మ ఇంటికి వెళ్లిన తర్వాత ప్రతి రాత్రి ఒక పీడకలలా అనిపిస్తే ఎలా ఉంటుంది? ఎదురుగా కనిపించే వ్యక్తి నిజంగా మనకు తెలిసిన వ్యక్తేనా అనే అనుమానం మొదలైతే? శరీరం, మనసు, ఆత్మ లాంటివి ప్రమాదంలో పడిపోయాయని అనిపిస్తే? అలాంటి భయం, మానసిక ఒత్తిడితో ప్రేక్షకులను కుదిపేసే స్పానిష్ హారర్ మూవీ ది గ్రాండ్ మదర్ (The Grandmother horror). 2021లో విడుదలైన ఈ మూవీకి పాకో ప్లాజా దర్శకత్వం వహించారు. ప్రస్తుతం ఈ సినిమా ప్రైమ్ వీడియోలో రెంట్‌కి అందుబాటులో ఉంది.

ది గ్రాండ్ మదర్ కథేంటి?

కథలో సుసానా అనే యువతి పారిస్‌లో విజయవంతమైన మోడల్‌గా పనిచేస్తూ ఉంటుంది. ఆమె కెరీర్ అద్భుతంగా సాగుతున్న సమయంలో ఒక ఫోన్ కాల్ ఆమె జీవితాన్ని పూర్తిగా మార్చేస్తుంది. చిన్నప్పటి నుంచి తనను పెంచిన అమ్మమ్మ తీవ్రమైన అనారోగ్యం బారిన పడుతుంది. దీంతో సుసానా వెంటనే స్పెయిన్‌కు తిరిగి రావాల్సి వస్తుంది. కొన్ని రోజులు మాత్రమే చూసుకుని తిరిగి పారిస్ వెళ్లిపోదామని భావించిన సుసానాకు అక్కడ ఊహించని పరిస్థితులు ఎదురవుతాయి.

మొదట్లో సాధారణంగా కనిపించే ఘటనలు క్రమంగా వింతగా మారడం మొదలవుతుంది. ఇంట్లో వినిపించే విచిత్రమైన శబ్దాలు, అర్థంకాని ప్రవర్తన, రాత్రి వేళల్లో కనిపించే భయంకర దృశ్యాలు సుసానాను మానసికంగా కుంగదీస్తాయి. ముఖ్యంగా మంచానికి పరిమితమైన అమ్మమ్మ చుట్టూ జరుగుతున్న కొన్ని ఘటనలు కథను మరింత భయానకంగా మారుస్తాయి. నిజానికి ఈ సినిమా సాధారణ దెయ్యాల కథలా ముందుకు సాగదు. వృద్ధాప్యం, ఒంటరితనం, శరీరం క్షీణించడం, మరణ భయం లాంటి అంశాలను హారర్‌తో కలిపి చూపిస్తుంది.

ట్విస్టుల మీద ట్విస్టులు:

సినిమా నెమ్మదిగా మొదలైనా, కథ ముందుకు సాగే కొద్దీ ఆడియెన్స్‌లో టెన్షన్ పెరుగుతూ ఉంటుంది. చివరి భాగంలో వచ్చే ట్విస్టులు చాలా మందిని ఆశ్చర్యపరుస్తాయి. ముఖ్యంగా హాలీవుడ్ జంప్ స్కేర్స్ కంటే మానసిక భయాన్ని ఇష్టపడేవారికి ఈ చిత్రం మరింతగా నచ్చే అవకాశం ఉంది. హారర్ సినిమాల్లో కొత్త అనుభవం కోరుకునేవారికి, అసాధారణ కథలంటే ఇష్టమున్నవారికి ది గ్రాండ్ మదర్ ఒక మంచి ఎంపిక. సినిమా పూర్తయిన తర్వాత కూడా ఆ ఇంటి వాతావరణం, ఆ అమ్మమ్మ పాత్ర, ఆ హారర్ సైలెన్స్‌ చాలా సేపు మనసును వెంటాడుతాయి.