Summer Cooling Tips: మనలో చాలామంది చేసే పొరపాటు ఇదే. బడ్జెట్ కలిసి వస్తుందనో లేదా ఆ సమయంలో అవగాహన లేకపోవడం వలనో పెద్ద హాలుకో లేక పెద్ద బెడ్రూమ్కో తక్కువ కెపాసిటీ ఉన్న 1 టన్ ఏసీని కొనేస్తాం. తీరా ఎండలు ముదిరాక ఏసీ ఆన్ చేస్తే.. గది అస్సలు చల్లబడదు సరికదా, కరెంటు బిల్లు మాత్రం మోత మోగిపోతుంది. అలా అని ఇప్పుడున్న ఏసీని అమ్మేసి కొత్తది కొనడం అంటే మళ్లీ వేల రూపాయల ఖర్చుతో కూడుకున్న పని. అయితే.. కొన్ని చిన్న చిన్న చిట్కాలు పాటిస్తే ఇప్పటికే మీ దగ్గర ఉన్న ఆ చిన్న ఏసీతోనే పెద్ద గదిని కూడా సూపర్ కూల్గా మార్చుకోవచ్చు. అదెలాగో ఇప్పుడు తెలుసుకుందాం పదండి..
ఏసీ కెపాసిటీ తక్కువగా ఉన్నప్పుడు గది మొత్తాన్ని చల్లబరచాలని చూడటం కంటే.. మీకు కావాల్సిన ఏరియా మీద ఫోకస్ పెట్టడం మంచిది. ఒక మందపాటి తెర లేదా స్లైడింగ్ డోర్ ఉపయోగించి గదిని రెండుగా విభజించండి. మీరు నిద్రపోయే మంచం లేదా కూర్చునే సోఫా ఉన్న వైపు మాత్రమే ఏసీ గాలి పడేలా చూసుకోండి. దీనివల్ల ఏసీ తక్కువ స్థలాన్ని త్వరగా చల్లబరుస్తుంది. అలాగే అటాచ్డ్ బాత్రూమ్ తలుపులు ఎప్పుడూ మూసి ఉంచడం మర్చిపోవద్దు.
చాలామంది ఏసీ వేసినప్పుడు ఫ్యాన్ ఆపేస్తారు. కానీ అది తప్పు. ఏసీ నుంచి వచ్చే చల్లని గాలి బరువుగా ఉండి కిందనే పేరుకుపోతుంది. ఆ సమయంలో ఫ్యాన్ను తక్కువ స్పీడ్లో పెడితే.. అది కింద ఉన్న చల్లటి గాలిని పైకి లేపి గది మూలమూలలకి పంపిస్తుంది. దీంతో ఏసీకి ఫ్యాన్ ఒక హెల్పర్ లాగా పనిచేస్తుందన్నమాట.
ఏసీ కష్టపడి గదిని చల్లబరుస్తుంటే.. కిటికీల గుండా వచ్చే ఎండ దాన్ని మళ్లీ వేడి చేస్తుంది. అందుకే పగటిపూట కిటికీలకు మందపాటి బ్లాక్ అవుట్ తెరలు వేయాలి. ఇంకా వీలైతే కిటికీ అద్దాలకు సన్ కంట్రోల్ ఫిల్మ్ అంటిస్తే సరి. ఎండ తక్కువగా తగిలితే ఏసీ మీద లోడ్ తగ్గి, గది నిమిషాల్లో చల్లబడుతుంది.
గదిలో ఉండే చిన్న సందుల నుంచి చల్లదనం బయటకు పోతే ఏసీ ఎంతసేపు తిరిగినా వేస్టే. ముఖ్యంగా తలుపు కింద ఉండే గ్యాప్ నుంచి చల్లని గాలి బయటకు వెళ్లిపోతుంది. అక్కడ ఒక డోర్ మ్యాట్నో లేదా డోర్ డ్రాఫ్ట్ స్టాపర్నో పెట్టండి. కిటికీల సందులు కూడా లేకుండా చూసుకుంటే చల్లదనం గదిలోనే లాక్ అయిపోతుంది.
ఏసీని 16 డిగ్రీల్లో పెడితే గది త్వరగా చల్లబడదు. అది కేవలం కంప్రెషర్ను ఇబ్బంది పెడుతుంది అంతే. ఏసీని ఎప్పుడూ 24 నుంచి 26 డిగ్రీల మధ్య ఉంచాలి. ఇది మన బాడీకి హాయిగా ఉంటుంది. ఏసీ కూడా ఎఫెక్టివ్గా పనిచేస్తుంది. అలాగే ఒక 15 రోజులకోసారి ఏసీ ఫిల్టర్లను తీసి శుభ్రం చేయాలి. దుమ్ము ఉంటే గాలి సరిగ్గా రాదనే విషయాన్ని గుర్తుంచుకోవాలి.
గదిలో ఉండే పాతకాలపు బల్బులు చాలా వేడిని పుట్టిస్తాయి. వాటి బదులు LED బల్బులు వాడొచ్చు. అలాగే గదిలో ఎవరూ లేనప్పుడు టీవీలు, కంప్యూటర్లను అనవసరంగా ఆన్ చేసి ఉంచొద్దు. అవి కూడా గది ఉష్ణోగ్రతను పెంచుతాయి. ఈ సింపుల్ ఐడియాలు ఫాలో అయితే, 1 టన్ ఏసీ కూడా పెద్ద గదిని కూల్ కూల్గా మార్చేస్తుంది.
Also Read: షాకింగ్ అప్డేట్.. వాట్సప్లో ఇక పెయిడ్ సర్వీస్, ఆ 6 ఫీచర్లు వాడాలంటే డబ్బులు కట్టాల్సిందే!
Share
ఎండ వేడిని తగ్గించి బాడీని కూల్ చేసే 'రోజ్ షర్బత్'.. ప్రయోజనాలు తెలిస్తే వదలరు
మమత మాఛ్-బాత్పై.. ఇప్పుడు బీజేపీ రియాక్షన్! బాగుంది.. రూ.5కే అక్కడ చేపల పులుసు భోజనం! ఏమిటీ కథ..?
