AC Mistakes: తీవ్రమైన ఎండల నుంచి ఏసీలు ఉపశమనం కల్పిస్తాయి. ప్రస్తుతం చాలా మంది ఏసీలను కొనుగోలు చేస్తూ.. మధ్యాహ్న సమయంలో ఇళ్లకే పరిమితమవుతున్నారు. రాత్రిళ్లు సైతం ఏసీ ఆన్ చేసుకొని హాయిగా నిద్రిస్తున్నారు. అయితే ఏసీ వాడే సమయంలో సాధారణంగా చేసే 5 పొరపాట్లు.. దాని మన్నికను దెబ్బతీయవచ్చని నిపుణులు సూచిస్తున్నారు. దీనివల్ల అనుకోని ఖర్చులు సంభవించి.. ఆర్థికంగా ఇబ్బందులు ఎదురుకావొచ్చని హెచ్చరిస్తున్నారు. ఇంతకీ ఆ 5 పొరపాట్లు ఏవి? వాటిని ఎలా పరిష్కరించుకోవాలి? ఈ కథనంలో పరిశీలిద్దాం.
చాలామంది ఇల్లు త్వరగా చల్లబడాలని ఏసీ టెంపరేచర్‌ను 16 – 18 డిగ్రీ వద్ద ఉంచుతారు. అయితే ఏసీని ఎంత తక్కువలో పెట్టినా గదిని ఒకే వేగంతో చల్లబరుస్తుంది. బయట 40 డిగ్రీల కంటే ఎక్కువ ఎండ ఉన్నప్పుడు.. 16°C కి చేరుకోవడానికి కంప్రెసర్ నిరంతరం కష్టపడాల్సి వస్తుంది. దీనివల్ల కంప్రెసర్ త్వరగా వేడెక్కి మొరాయించే ప్రమాదం ఉంది. కాబట్టి 24°C నుండి 26°C మధ్య ఉష్ణోగ్రతను సెట్ చేయడం బెస్ట్.
కొంతమంది వాడకంలో లేని గదులకు ఏసీ గాలి వెళ్లకుండా వెంట్ (గోడకు ఉండే జల్లెడ లాంటి కిటికీలు)లను పూర్తిగా మూసేస్తుంటారు. ఇలా చేయడం వల్ల డక్ట్ (Duct) వ్యవస్థలో గాలి ఒత్తిడి పెరిగి బ్లోయర్ ఫ్యాన్, ఏసీలోని ఇతర భాగాలపై భారం పడుతుంది. ఇది ఏసీ సామర్థ్యాన్ని తగ్గించి విద్యుత్ బిల్లును పెంచుతుంది. కాబట్టి అన్ని గదుల వెంట్లు తెరిచి ఉంచడం వల్ల గాలి ప్రసరణ సమానంగా జరిగి ఏసీపై ఒత్తిడి తగ్గుతుంది.
ఎండాకాలంలో ఏసీలను సహజంగానే ఎక్కువ సమయం రన్నింగ్ లో ఉంచుతారు. దీనివల్ల ఫిల్టర్లలో దుమ్ము త్వరగా చేరుతుంది. దుమ్ము నిండిన ఫిల్టర్ల వల్ల గాలి ప్రవాహం తగ్గి.. ఇండోర్ యూనిట్‌లోని ‘ఎవాపరేటర్ కాయిల్స్’ గడ్డకట్టే (Freeze) అవకాశం ఉంది. కాబట్టి వేసవిలో కనీసం రెండు వారాలకు ఒకసారి ఫిల్టర్లను శుభ్రం చేస్తే మంచిదని నిపుణులు సూచిస్తున్నారు.
సాధారణంగా ఇంటి వెలుపల ఉండే అవుట్ డోర్ యూనిట్.. గదిలోని వేడి గాలిని బయటకు పంపిస్తుంది. ఒకవేళ అవుట్ డోర్ యూనిట్ చుట్టూ చెత్తాచెదారం, మొక్కలు, ఇతర వస్తువులు ఉంటే వేడి సరిగ్గా బయటకు వెళ్లదు. దీనివల్ల కంప్రెసర్ ఓవర్‌హీట్ అయ్యి ఆగిపోయే ప్రమాదముంది. కాబట్టి అవుట్ డోర్ యూనిట్ చుట్టూ కనీసం 2 అడుగుల మేర శుభ్రంగా ఉండేలా చూసుకోండి.
సాధారణంగా చాలా మంది ఏసీ నుంచి వేడి గాలి వచ్చేంత వరకూ సర్వీసింగ్ అన్న ఊసే ఎత్తరు. ఇది ఏమాత్రం సరైనది కాదని నిపుణులు సూచిస్తున్నారు. ఒకవేళ ఏసీల్లో గ్యాస్ లీకేజీలు, చిన్న చిన్న ఎలక్ట్రికల్ సమస్యలు ఉంటే అవి పెద్ద సమస్యలుగా మారవచ్చని హెచ్చరిస్తున్నారు. తీవ్రమైన ఎండలో పని చేసే క్రమంలో అవి ఏ క్షణమైనా చెడిపోవచ్చని సూచిస్తున్నారు. కాబట్టి వేసవి ప్రారంభంలో, తీవ్రమైన ఎండలు ఉన్నప్పుడు ఒకసారి సర్వీసింగ్ చేయించడం ఉత్తమమని సూచిస్తున్నారు.
Share
భార్యభర్తల గొడవ.. బాల్కనీ నుంచి లక్షల రూపాయలను విసిరేసిన మహిళ, వీడియో వైరల్
సొంత జిల్లాలో సీన్ రివర్స్.. బోత్సకు పీడకలగా మారిన కిమిడి నాగార్జున..?
