వాషింగ్ మిషన్ వాడుతున్నారా? మీరు చేసే ఈ చిన్న తప్పు.. బట్టలను పనికిరాకుండా చేస్తున్నాయ్!

Washing Machine: ఒకప్పుడు బట్టలు ఉతకడానికి స్త్రీలు గంటలకొద్ది సమయాన్ని తీసుకునేవారు. ఇంటిల్లపాది దుస్తులను చేతులతో ఉతుకుతూ నానా ఇబ్బందులు పడేవారు. అయితే వాషింగ్ మిషన్ రాకతో.. వారికి గొప్ప ఉపశమనం కలిగింది. అయితే కొందరు వాషింగ్ మిషన్ వచ్చాక కూడా ఎక్కువ సమయం బట్టలు వాష్ చేస్తున్నారు. అయితే బట్టలను ఉతికేటప్పుడు అవి శుభ్రంగా, సురక్షితంగా ఉండాలంటే ఎంత సమయం పడుతుందనేది చాలా ముఖ్యం. లాండ్రీ నిపుణుల ప్రకారం.. వాషింగ్ మెషీన్‌లో బట్టలు ఉతకడానికి సంబంధించిన కీలక విషయాలు ఏంటో ఇప్పుడు చూద్దాం.

వాషింగ్ సమయం ఎంత?

సాధారణంగా బట్టలు ఉతకడానికి సగటున 30 నుండి 45 నిమిషాల సమయం సరిపోతుందని లాండ్రీ నిపుణులు స్పష్టం చేస్తున్నారు. . అయితే బట్టల రకాన్ని బట్టి ఈ సమయం మారుతూ ఉంటుందని పేర్కొంటున్నారు. రోజూవారి దుస్తులు అయితే.. 30 నిమిషాల ‘క్విక్ వాష్’ సరిపోతుంది. మురికి ఎక్కువగా ఉన్న బట్టలకు 45 నిమిషాల నుండి ఒక గంట వరకు సమయం అవసరం కావచ్చు. సున్నితమైన (పట్టు, ఉన్ని) బట్టలు అయితే 15-20 నిమిషాల తక్కువ సైకిల్‌లో ఉతకడం మంచిదని నిపుణులు సూచిస్తున్నారు. .

ఎక్కువ సేపు ఉతికితే..!

చాలామంది బట్టలను ఎక్కువ సేపు ఉతికితేనే శుభ్రపడతాయని అనుకుంటారు. కానీ అది సరైన ఆలోచన కాదని నిపుణులు పేర్కొంటున్నారు. దుస్తులు ఎక్కువ సేపు నీటిలో నానడం, మిషన్‌లో తిరగడం వల్ల దారాల నాణ్యత దెబ్బతింటాయని పేర్కొంటున్నారు. అవసరానికి మించి బట్టలను ఎక్కువ సేపు ఉతికితే.. రంగు త్వరగా పోయి పాతదానిలా మారిపోతుందని అంటున్నారు. దుస్తుల క్వాలిటీ దెబ్బ తినడమే కాకుండా.. విద్యుత్, నీరు కూడా అధికంగా ఖర్చవుతాయని తెలియజేస్తున్నారు.

మెుండి మరకలు ఉంటే..

మెుండి మరకలు ఉన్న దుస్తులను వాషింగ్ మిషన్‌లో ఎక్కువ సేపు ఉతకడం కంటే ‘ప్రీ-ట్రీట్‌మెంట్’ (Pre-treatment) చేయడం ఉత్తమమని నిపుణులు చెబుతున్నారు. మరకలు ఉన్న చోట కొంచెం డిటర్జెంట్‌ రాసి పది నిమిషాల తర్వాత మిషన్‌లో వేయడం ఉత్తమమని పేర్కొంటున్నారు. దీనివల్ల తక్కువ సమయంలోనే బట్టలు మల్లెపూవులా మెరుస్తాయని స్పష్టం చేస్తున్నారు.

Also Read: ఇండక్షన్ స్టవ్ వాడుతున్నారా? చాలామందికి తెలియని షాకింగ్ నిజాలు!

ఈ టిప్స్ కూడా మీ మంచికే..!

వాషింగ్ మిషన్ వాడేటప్పుడు మరికొన్ని చిట్కాలు సైతం పాటిస్తే మంచిదని నిపుణులు పేర్కొంటున్నారు. ఇందులో భాగంగా ఎప్పుడు మిషన్ వేసిన.. బట్టలు తిరగడానికి సరిపడ ఖాళీ ఉండాలని సూచిస్తున్నారు. లేదంటే ఎంత సేపు ఉతికినా మురికి వదలదని తెలియజేస్తున్నారు. మరోవైపు ఎక్కువ సర్ఫ్ వాడినా కూడా బట్టలు శుభ్రంగా మారిపోవని నిపుణులు అంటున్నారు. పైగా మిషన్ లోపల సర్ఫ్ పేరుకుపోయి.. బ్యాక్టీరియా పెరగడానికి కారణం అవుతుందని పేర్కొంటున్నారు.

Also Read: AC Water Tips: ఏసీ నీటిని మొక్కలకు పోస్తున్నారా? అయితే ఇది తప్పక తెలుసుకోండి!