మారిపోయిన లెక్కలు.. చైనాను ‘అద్భుతమైన దేశం’ అన్న ట్రంప్.. అగ్రరాజ్యాధినేత పర్యటన వెనుక అసలు వ్యూహం ఇదేనా?

Trump China: అమెరికా అధ్యక్షుడు డొనాల్డ్ ట్రంప్ రేపటి నుంచి మూడు రోజుల పాటు చైనాలో పర్యటించనున్నారు. 2017 తర్వాత ఆయన ఆ దేశానికి వెళ్లడం ఇదే తొలిసారి కావడంతో ఈ టూర్‌పై ప్రపంచవ్యాప్తంగా సర్వత్రా ఆసక్తి నెలకొంది. ఈ పర్యటన గురించి స్వయంగా ట్రంప్ తన ‘ట్రూత్ సోషల్’ వేదికగా స్పందిస్తూ.. చైనా పర్యటన కోసం తాను ఎంతో ఆసక్తిగా ఎదురుచూస్తున్నట్లు పేర్కొన్నారు. చైనాను ఒక “అద్భుతమైన దేశం”గా అభివర్ణించడమే కాకుండా, ఆ దేశ అధ్యక్షుడు షీ జిన్‌పింగ్‌ను ప్రపంచం గర్వించే గొప్ప నాయకుడంటూ ప్రశంసల వర్షం కురిపించడం ఇప్పుడు చర్చనీయాంశమైంది.

వ్యూహాత్మక అడుగులు.. ఉద్రిక్తతల నడుమ కీలక భేటీ
ప్రస్తుతం పశ్చిమాసియాలో యుద్ధ మేఘాలు కమ్ముకున్న నేపథ్యంలో ట్రంప్ పర్యటన అత్యంత ప్రాధాన్యత సంతరించుకుంది. ముఖ్యంగా హార్ముజ్ జలసంధి మూసివేత వంటి తీవ్రమైన అంతర్జాతీయ పరిణామాలు నెలకొన్న తరుణంలో, అగ్రరాజ్యాల మధ్య చర్చలు ప్రపంచ గమనాన్ని మార్చే అవకాశం ఉంది. గతంలో చైనాతో వాణిజ్య యుద్ధం చేసిన ట్రంప్, ఇప్పుడు అదే దేశాన్ని ప్రశంసలతో ముంచెత్తడం వెనుక బలమైన దౌత్య వ్యూహం దాగి ఉందని విశ్లేషకులు భావిస్తున్నారు. ఆసియా ఖండంలో శాంతి భద్రతల స్థాపనే లక్ష్యంగా ఈ చర్చలు సాగే అవకాశం ఉంది.

చర్చించబోయే అంశాలివే!
ఈ పర్యటనలో ప్రధానంగా ఇరు దేశాల మధ్య ఉన్న వాణిజ్య లోటు, సుంకాల విధింపు వంటి ఆర్థికాంశాలతో పాటు రక్షణ రంగ ఒప్పందాలపై కూడా దృష్టి సారించనున్నారు. ప్రపంచంలోనే అతిపెద్ద ఆర్థిక వ్యవస్థలు కలిగిన ఈ రెండు దేశాలు చేతులు కలిపితే.. ప్రపంచ మార్కెట్లలో స్థిరత్వం వస్తుందని వ్యాపార వర్గాలు ఆశిస్తున్నాయి. అలాగే, గ్లోబల్ సప్లై చైన్, టెక్నాలజీ రంగంలో పరస్పర సహకారం గురించి కూడా ఇరు దేశాల నేతలు ముఖాముఖి చర్చించనున్నారు.

ప్రపంచం చూపు.. జిన్‌పింగ్-ట్రంప్ కలయిక వైపు!
ట్రంప్ పర్యటన నేపథ్యంలో బీజింగ్‌లో భారీ భద్రతా ఏర్పాట్లు చేశారు. పాత విభేదాలను పక్కన పెట్టి, జిన్‌పింగ్‌ను “అందరూ గౌరవించే నాయకుడు” అని ట్రంప్ సంబోధించడం ద్వారా ఒక కొత్త స్నేహ పూర్వక వాతావరణానికి తెరలేపారు. ఈ మూడు రోజుల పర్యటన కేవలం ఫోటో షూట్‌లకే పరిమితం కాకుండా, ప్రపంచం ఎదుర్కొంటున్న సంక్షోభాలకు ఒక పరిష్కారం చూపుతుందా? అనేది ఇప్పుడు మిలియన్ డాలర్ల ప్రశ్న. ఏది ఏమైనా, ట్రంప్ చైనా పర్యటన అంతర్జాతీయ రాజకీయాల్లో ఒక కొత్త అధ్యయనానికి నాంది పలకనుంది.

Also Read: ప్రకాశం జిల్లాలో ఘోర ప్రమాదం.. రూ. 9 లక్షల నగదుతో వెళ్తుండగా కాటేసిన కాలం