iPhone Duo Scam: యాపిల్ కొత్త ఫోల్డబుల్ ఫోన్ ఐఫోన్ డ్యూయో కోసం ఎదురుచూస్తున్న వారికి సైబర్ నేరగాళ్లు షాక్ ఇస్తున్నారు. ఈ ఫోన్‌ను తక్కువ ధరకు అందిస్తామంటూ కొన్ని నకిలీ వెబ్‌సైట్లు తెరపైకి వచ్చాయి. అచ్చం యాపిల్ అధికారిక వెబ్‌సైట్‌లా కనిపించేలా వీటిని తయారు చేసి, కొనుగోలుదారుల వ్యక్తిగత వివరాలను దొంగిలించేందుకు ప్రయత్నిస్తున్నారు. సైబర్ సెక్యూరిటీ సంస్థ కాస్పర్‌స్కీ ఈ మోసాలను గుర్తించింది.
కాస్పర్‌స్కీ గుర్తించిన ఓ వెబ్‌సైట్ ఐఫోన్ డ్యూయోపై 25 శాతం తగ్గింపు ఇస్తున్నట్లు ప్రకటించింది. అంతేకాదు.. ఆఫర్ ముగియడానికి కేవలం 30 నిమిషాలే ఉన్నాయంటూ కౌంట్‌డౌన్ కూడా చూపించింది. ఇలాంటి ట్రిక్స్‌తో కస్టమర్లు తొందరపడి నిర్ణయం తీసుకునేలా చేస్తారు. ఈ సైట్‌లో ఫోన్ కొనుగోలు చేసే సమయంలో కార్డు వివరాలు అడగకపోయినా.. పేరు, ఫోన్ నంబర్, చిరునామా వంటి వివరాలను సేకరిస్తోంది. ఆ తర్వాత మేనేజర్ ఫోన్ చేసి పేమెంట్ గురించి మాట్లాడతారని చెబుతోంది. ఆ కాల్ ద్వారానే డబ్బులు వసూలు చేసే అవకాశం ఉందని కాస్పర్‌స్కీ హెచ్చరిస్తోంది.
Also Read: ఇదేం విడ్డూరం యాపిల్ మామా.. వాడిన కొన్ని గంటల్లోనే iPhone Duo స్క్రీన్ ఢమాల్!
మరో నకిలీ వెబ్‌సైట్‌లో భాష, కరెన్సీ ఎంచుకునే ఆప్షన్లు, ఫోన్ ఫీచర్ల వివరాలు ఉన్నాయి. ప్రీ-ఆర్డర్ పూర్తి చేయడానికి యాపిల్ అధికారిక వెబ్‌సైట్‌కు తీసుకెళ్తామని కూడా చెప్పింది. కానీ చివరకు ఆ హామీని నిలబెట్టుకోలేదు. ఇలాంటి సైట్లు నమ్మదగినవిగా కనిపించినా.. వాటి అసలు లక్ష్యం వ్యక్తిగత సమాచారాన్ని సేకరించడమే కావచ్చు. కొన్ని సందర్భాల్లో వాట్సప్ ద్వారా సంప్రదించి డబ్బులు అడిగే ప్రమాదం కూడా ఉంది.
భారత్‌లో ఐఫోన్ డ్యూయో ప్రీ-ఆర్డర్లు గంటలోపే పూర్తయ్యాయని, కొత్త ఆర్డర్లకు జనవరి డెలివరీ తేదీలు చూపిస్తున్నాయని సమాచారం. స్టాక్ దొరకకపోవడంతో త్వరగా ఫోన్ కొనాలనుకునే వారు ఇలాంటి మోసాలకు సులభంగా చిక్కే అవకాశం ఉంది. ముఖ్యంగా సోషల్ మీడియా ప్రకటనలు, వాట్సప్ ఫార్వర్డ్‌లలో వచ్చే లింకులను గుడ్డిగా నమ్మకూడదు.
యాపిల్ అధికారిక ఆన్‌లైన్ స్టోర్, ముంబైలోని Apple BKC, ఢిల్లీలోని Apple Saket లేదా గుర్తింపు పొందిన విక్రేతల నుంచే ఫోన్ కొనడం మంచిది. వెబ్‌సైట్ అడ్రస్‌ను జాగ్రత్తగా పరిశీలించిన తర్వాతే వివరాలు నమోదు చేయాలి. భారీ డిస్కౌంట్లు, వెంటనే కొనాలనే ఒత్తిడి కనిపిస్తే అప్రమత్తంగా ఉండాలి. ఆన్‌లైన్ చెల్లింపులకు వర్చువల్ కార్డులు ఉపయోగించడం, బ్యాంక్, UPI యాప్‌లలో టూ-ఫ్యాక్టర్ ఆథెంటికేషన్ ఆన్ చేయడం కూడా మంచిదే. చిన్న నిర్లక్ష్యం వల్ల వ్యక్తిగత వివరాలతో పాటు డబ్బు కూడా పోయే ప్రమాదం ఉందని గుర్తుంచుకోండి.
Also Read: క్యాబ్ బుక్ చేసేటప్పుడు లొకేషన్ తప్పుగా చూపిస్తోందా? ఈ ఒక్క సెట్టింగ్ మార్చితే సరి!
Share
రాత్రి బెడ్పై పడుకున్నాక పాత జ్ఞాపకాలు గుర్తుకొస్తున్నాయా? ఓవర్థింకింగ్ తగ్గించడానికి టిప్స్
జియో vs ఎయిర్టెల్.. రూ.500 లోపు ప్లాన్లలో ఏది బెటర్? పూర్తి వివరాలు!
