Second Hand Mobile:నేటి టెక్ యుగంలో స్మార్ట్‌ఫోన్ ప్రతి ఒక్కరి జీవితంలో ఒక ముఖ్యమైన భాగంగా మారిపోయింది. అయితే, కొత్త మొబైల్ కొనాలంటే ధరలు ఎక్కువగా ఉండటంతో చాలామంది సెకండ్ హ్యాండ్ ఫోన్లను కొనుగోలు చేసేందుకు ఆసక్తి చూపిస్తున్నారు. తక్కువ ధరకు మంచి ఫీచర్లు ఉన్న ఫోన్‌ను సొంతం చేసుకోవచ్చనేది నిజమే. కానీ, తొందరపడి కొనుగోలు చేస్తే తర్వాత బ్యాటరీ సమస్యలు, స్క్రీన్ లోపాలు, ఇతర సాంకేతిక ఇబ్బందులు ఎదురుకావచ్చు. అందుకే సెకండ్ హ్యాండ్ మొబైల్ కొనేముందు ఏయే విషయాలు చెక్ చేయాలి? ఫోన్ మంచిదో కాదో ఎలా గుర్తించాలి? అనే విషయాలు తెలుసుకోవడం చాలా ముఖ్యం. కొనుగోలు చేసే ముందు కొన్ని జాగ్రత్తలు తీసుకుంటే.. తక్కువ ధరలోనే మంచి ఫోన్‌ను ఎంచుకోవచ్చు.
ముందుగా ఫోన్ వెనుక భాగం, అంచులు, స్క్రీన్‌ను జాగ్రత్తగా పరిశీలించాలి. పగుళ్లు, లోతైన గీతలు, తెరపై మచ్చలు ఉన్నాయేమో చూడాలి. స్క్రీన్‌పై అన్ని చోట్ల టచ్ సరిగ్గా పనిచేస్తుందో పరీక్షించాలి. వాల్యూమ్ బటన్లు, పవర్ బటన్, ఛార్జింగ్ పోర్ట్ కూడా సరిగా పనిచేస్తున్నాయో చూడాలి. ఫోన్ గతంలో మరమ్మతులకు గురైందా, ఏవైనా భాగాలను మార్చారా అని విక్రేతను అడగాలి. ఒకవేళ ఆన్‌లైన్‌లో కొనుగోలు చేస్తే.. విక్రేత వివరాలు, తిరిగి ఇచ్చే గడువు, వారంటీ నిబంధనలు ముందుగానే చదవాలి.
Also Read: స్మార్ట్‌వాచ్‌ vs ఫిట్‌నెస్ బ్యాండ్.. రెండింటిలో ఫీచర్లు ఒకటేనా? ఏది కొంటే మన డబ్బులు వృధా కావు?
ఫోన్ బ్యాటరీ ఎంతసేపు నిలుస్తుందో తెలుసుకోవడం ముఖ్యం. కొంతసేపు ఫోన్ వాడి, ఛార్జింగ్ వేగంగా తగ్గుతోందేమో గమనించాలి. ఐఫోన్ అయితే సెట్టింగ్స్‌లో బ్యాటరీ ఆరోగ్యాన్ని పరిశీలించవచ్చు. కెమెరాతో ఫొటోలు తీసి, వీడియో రికార్డు చేసి చూడాలి. స్పీకర్, మైక్రోఫోన్, వైఫై, బ్లూటూత్, సిమ్ నెట్‌వర్క్ సరిగా పనిచేస్తున్నాయో పరీక్షించాలి. ఫోన్ వేడెక్కుతుందా, తరచూ ఆగిపోతుందా అనేది కూడా గమనించాలి.
ఫోన్ దొంగిలించబడినదా, దాని గుర్తింపు వివరాల్లో సమస్య ఉందా అనేది తెలుసుకోవడానికి ఐఎంఈఐ నంబర్ తనిఖీ చేయాలి. ఫోన్‌లో *#06# డయల్ చేస్తే ఈ నంబర్ కనిపిస్తుంది. దాన్ని బాక్స్ లేదా బిల్లుపై ఉన్న నంబర్‌తో సరిపోల్చాలి. భారత ప్రభుత్వ సంచార్ సాథీ వెబ్‌సైట్‌లో లేదా KYM సేవ ద్వారా వివరాలు పరిశీలించవచ్చు. నంబర్ బ్లాక్‌లిస్ట్‌లో ఉంటే.. నకిలీగా కనిపిస్తే లేదా వివరాలు సరిపోకపోతే ఆ ఫోన్ కొనకపోవడం మంచిది.
విక్రేత దగ్గర కొనుగోలు బిల్లు ఉంటే అడిగి చూడాలి. ఫోన్‌లో ఉన్న పాత యజమాని ఖాతాను తొలగించి, మీ ముందే ఫోన్‌ను రీసెట్ చేయించాలి. ఐఫోన్‌లో యాక్టివేషన్ లాక్ ఉంటే కొనకూడదు. మోడల్, నిల్వ సామర్థ్యం, పరిస్థితిని బట్టి ఇతర విక్రయ ధరలతో పోల్చి నిర్ణయం తీసుకోవాలి. చాలా తక్కువ ధర చెబితే కారణం తెలుసుకోవాలి. సాధ్యమైతే రాతపూర్వక రసీదు తీసుకోవాలి. అన్ని పరీక్షలు పూర్తయ్యాకే డబ్బులు చెల్లించాలి.
Also Read: రూ.లక్షలు పెట్టి ఏఐ ఫోన్ కొనాలా? లేక సాధారణ ఫోనే బెటరా? రెండింటికీ తేడా ఇదే!
Share
నోరు విప్పిన జేడీ వాన్స్.. భారత్ విషయంలో నోరు జారాను, అది సరైనది కాదని క్లారిటీ
జ్యోతి పూర్వజ్, పూర్వాజ్ మూవీ ‘కిల్లర్’.. ఒకేసారి రెండు అప్డేట్స్!
