YouTube Premium New Features: యూట్యూబ్ తమ ప్రీమియం సబ్‌స్క్రైబర్ల కోసం సరికొత్త పాడ్‌కాస్ట్ ఫీచర్లను పరిచయం చేసింది. లాంగ్ ఎపిసోడ్‌లను ఇష్టపడేవారికి, ప్రయాణాల్లో వినేవారికి ఈ అప్‌డేట్స్ చాలా ప్లస్ అవుతాయి. ప్రస్తుతం ఆండ్రాయిడ్ వినియోగదారులకు అందుబాటులోకి వచ్చిన ఈ ఫీచర్లు త్వరలోనే ఐఫోన్ యూజర్లకు కూడా రానున్నాయి.
పాడ్‌కాస్ట్‌లను ఎక్కువగా చూసేదానికంటే వినడానికి ఇష్టపడేవారి కోసం ‘ఆన్-ది-గో’ మోడ్ ప్రత్యేకంగా తీసుకొచ్చారు. దీనివల్ల స్క్రీన్ వైపు చూడకుండానే ప్లేబ్యాక్ కంట్రోల్స్ సులువుగా వాడుకోవచ్చు. మనం వేరే యాప్స్ వాడుతున్నా లేదా ఫోన్ పక్కన పెట్టి వేరే పనులు చేసుకుంటున్నా బ్యాక్‌గ్రౌండ్‌లో ఎలాంటి అభ్యంతరం లేకుండా ఆడియో ప్లే అవుతుంది. ఫార్వర్డ్ చేయడం, వెనక్కి తిప్పడం వంటివి చాలా ఈజీగా మారిపోతాయి.
ఇకపై పోడ్‌కాస్ట్ స్పీడ్‌ను మనమే స్వయంగా మార్చాల్సిన అవసరం లేదు. కొత్తగా వచ్చిన ‘ఆటోస్పీడ్’ ఫీచర్ ఆ పనిని ఆటోమేటిక్‌గా చూసుకుంటుంది. పాడ్‌కాస్ట్‌లో సంభాషణలు సాగతీసినట్టు అనిపిస్తే స్పీడ్ పెంచుతుంది. అదే సమయంలో ఏదైనా ముఖ్యమైన సమాచారాన్ని వివరిస్తున్నప్పుడు మనం క్లియర్‌గా అర్థం చేసుకోవడం కోసం స్పీడ్‌ను తగ్గిస్తుంది. దీనివల్ల సమయం కలిసిరావడమే కాకుండా ఏ విషయాన్నీ మిస్ అవ్వకుండా వినొచ్చు.
ఇంతకుముందు కేవలం పాటల కోసమే పనిచేసిన ‘ఆస్క్ మ్యూజిక్’ ఏఐ ఫీచర్.. ఇప్పుడు పాడ్‌కాస్ట్‌లకు కూడా సేవలు అందించనుంది. మన మూడ్, మనకు నచ్చిన జోనర్ లేదా ప్రస్తుతం వింటున్న కంటెంట్‌ను బట్టి ఈ ఆర్టిఫిషియల్ ఇంటెలిజెన్స్ పాడ్‌కాస్ట్‌లను వెతికి పెడుతుంది. అలాగే మనకు ఎలాంటి షో కావాలో అడిగితే చాలు.. క్షణాల్లో బెస్ట్ ఆప్షన్లను మన ముందుకు తెస్తుంది.
ప్రస్తుతానికి ఈ సరికొత్త ఫీచర్లు యూట్యూబ్ ప్రీమియం సబ్‌స్క్రైబర్లకు మాత్రమే అందుబాటులో ఉన్నాయి. ఆన్-ది-గో మోడ్, ఆటోస్పీడ్ ఫీచర్లు ఆండ్రాయిడ్ మొబైల్స్‌లో లైవ్ అయ్యాయి, ఐఓఎస్ యూజర్లకు త్వరలోనే రానున్నాయి. అలాగే ఏఐ ఆధారిత రికమండేషన్లు కొన్ని ఎంపిక చేసిన దేశాల్లో అందుబాటులోకి వచ్చాయి. హెడ్‌ఫోన్స్ ఎక్కువగా వాడేవారికి ఈ మార్పులు సరికొత్త అనుభూతిని ఇస్తాయనడంలో సందేహం లేదు.
Also Read: రూ.30 వేల ఏసీ ఎందుకు దండగ.. జస్ట్ రూ.800తో 45°C ఎండలోనూ ఇంటి వేడిని 15% తగ్గించుకోండి!
Share
నాని 'పారడైజ్'తో మెగాస్టార్ కనెక్షన్.. శ్రీకాంత్ ఓదెల మాస్టర్ ప్లాన్ అదిరిందిగా!
తెలియక చేసిన తప్పు.. ప్రాణాల మీదకు తెచ్చిన 'క్లీనింగ్' జాబ్!
