Jubilee Hills Ferrari Car Accident: జూబ్లీహిల్స్ లో ఫెరారీ కారు బీభత్సం.. మూడు కార్లను గుద్ది..!

Jubilee Hills Ferrari Car Accident: హైదరాబాద్‌లోని జూబ్లీ హిల్స్ రోడ్ నంబర్ 45లో ఆదివారం ఒక భారీ రోడ్డు ప్రమాదం చోటుచేసుకుంది. జూబ్లీ హిల్స్ చెక్‌పోస్ట్ నుండి మాదాపూర్ వైపు అతివేగంతో వెళ్తున్న ఒక ఫెరారీ కారు (TS07HK 8797) అదుపు తప్పి బీభత్సం సృష్టించింది. ఓవర్ స్పీడ్ కారణంగా కారు ముందుగా డివైడర్‌ను, ఆపై ఒక విద్యుత్ స్తంభాన్ని బలంగా ఢీకొట్టి గాలిలోకి ఎగిరి పక్క రోడ్డులోకి (దుర్గం చెరువు నుండి చెక్‌పోస్ట్ వైపు వచ్చే దారిలోకి) దూసుకెళ్లింది.

పక్క రోడ్డులోకి దూసుకొచ్చిన ఫెరారీ.. ఎదురుగా వస్తున్న మూడు కార్లను ఒకదాని తర్వాత ఒకటి బలంగా ఢీకొట్టింది. ఈ ప్రమాదంలో ఫెరారీ కారు ముందు భాగం పూర్తిగా తుక్కు తుక్కు అయిపోయింది. ఎయిర్ బ్యాగ్స్ అన్నీ ఓపెన్ అయ్యాయి. హెడ్ లైట్స్, విండ్ షీల్డ్ చెల్లాచెదురయ్యాయి. కారు ఢీకొన్న ధాటికి కరెంట్ పోల్ పూర్తిగా వంగిపోయి వైర్లు తెగిపడ్డాయి.

ఫెరారీ కారులో డ్రైవర్‌తో పాటు ఒక మహిళ ఉన్నారు. వీరిద్దరికీ తీవ్ర గాయాలవ్వడంతో వెంటనే అంబులెన్స్‌లో ఆసుపత్రికి తరలించారు. ఈ కారు వెంకట రాజారెడ్డి అనే వ్యక్తి పేరు మీద రిజిస్టర్ అయి ఉన్నట్లు పోలీసులు గుర్తించారు. ఫెరారీ ఢీకొట్టిన మొదటి కారులోని ముగ్గురు వ్యక్తులు తీవ్రంగా గాయపడ్డారు. మరో కారులో ఉన్న కుటుంబం మాత్రం స్వల్ప గాయాలతో బయటపడటం పెద్ద ఊరట.

జూబ్లీ హిల్స్ ట్రాఫిక్, లా అండ్ ఆర్డర్ పోలీసులు వెంటనే రంగంలోకి దిగి పరిస్థితిని చక్కదిద్దారు. క్రేన్ల సహాయంతో ధ్వంసమైన వాహనాలను రోడ్డుపై నుండి తొలగించి ట్రాఫిక్‌ను క్లియర్ చేశారు. డ్రైవర్ మద్యం మత్తులో ఉన్నారా లేక కేవలం అతివేగం వల్లే ఈ ప్రమాదం జరిగిందా అనే కోణంలో పోలీసులు దర్యాప్తు చేస్తున్నారు.