ఆఫీస్‌లో నీచమైన పని.. బాత్రూంలో ఫోన్ పెట్టి వీడియోలు తీసిన అటెండర్!

Secret Filming: ఆఫీస్ బాత్రూంలో రహస్యంగా సెల్ ఫోన్ అమర్చి మహిళా ఉద్యోగినుల వీడియోలు చిత్రీకరించిన అటెండర్ ఉదంతమిది. ఉద్యోగుల్లో తీవ్ర కలవరాన్ని సృష్టించిన ఈ సంఘటన కవాడీగూడలోని పవర్ గ్రిడ్ కార్యాలయంలో వెలుగు చూసింది. వివరాలు ఇలా ఉన్నాయి.

టేప్‌తో అతికించి..

పవర్ గ్రిడ్ కార్యాలయంలో వాష్ బేసిన్ కింద డబుల్ సైడెడ్ టేప్‌తో ఓ మొబైల్ ఫోన్ అతికించి ఉండగా ఇదే కార్యాలయంలో పని చేస్తున్న ఓ మహిళా ఉద్యోగిని చూసింది. ఫోన్‌ను బయటకు తీసిన ఆమె సెల్ ఎవరిదని ప్రశ్నించగా ఇదే ఆఫీస్‌లో అటెండర్ గా పని చేస్తున్న భరత్ దాన్ని లాక్కుని పారిపోవటానికి ప్రయత్నించాడు. అయితే, సహోద్యోగులు, సెక్యూరిటీ సిబ్బంది అతన్ని పట్టుకున్నారు. ఫోన్ లోని వీడియోలను పరిశీలించేందుకు ప్రయత్నించగా పిన్ లాక్ ఫోల్డర్ కనిపించింది.

బండకేసి కొట్టిన భరత్..

లాక్ ఓపెన్ చేయమని భరత్‌కు ఇవ్వగా అతను దానిని నేలకేసి కొట్టి కాళ్లతో తొక్కి ధ్వంసం చేశాడు. ఈ మేరకు మహిళా ఉద్యోగిని ఫిర్యాదు చేయగా గాంధీనగర్ పోలీసులు కేసులు నమోదు చేసి భరత్‌ను అరెస్ట్ చేశారు. అనంతరం హైదరాబాద్ సైబర్ క్రైం పోలీస్ స్టేషన్ కు కేసును బదిలీ చేశారు. భరత్ నుంచి స్వాధీనం చేసుకున్న సెల్ ఫోన్‌లోని డేటాను రిట్రీవ్ చేయటానికి ఫోరెన్సిక్ లేబోరేటరీకి పంపించారు.

Also read: సీఎం రేవంత్ రెడ్డికి హరీశ్ రావు లేఖ.. ఆ పరీక్షను వాయిదా వేయండి?