IBomma Ravi: చంచల్ గూడ జైలుకు ఐబొమ్మ నిర్వాహకుడు రవి

గత కొంతకాలంగా ఇమ్మడి రవి కదలికలపై ప్రత్యేకంగా దృష్టి సారించిన సీసీఎస్ పోలీసులు ఆమ్‌స్టర్‌డామ్ నుండి హైదరాబాద్‌కు వచ్చిన రవిని కూకట్‌పల్లిలోని రెయిన్‌బో విస్టాలో ఉన్న అతని నివాసంలో అరెస్ట్ చేశారు. అరెస్ట్ సమయంలో అతని వద్ద నుంచి పైరసీకి సంబంధించిన కీలక మెటీరియల్‌ను పోలీసులు స్వాధీనం చేసుకున్నారు. సినిమా పైరసీకి వ్యతిరేకంగా సినీ నిర్మాతల నుండి అందిన ఫిర్యాదుల మేరకు పోలీసులు ఈ చర్య తీసుకున్నారు.

రవి నిర్వహించిన iBOMMA , BAPPAM వెబ్‌సైట్‌లను పోలీసులు తక్షణమే బ్లాక్ చేశారు. పైరసీ ద్వారా ఆర్జించినట్టు భావిస్తున్న సుమారు రూ. 2.5 కోట్ల నగదును రవి ఖాతా నుంచి స్వాధీనం చేసుకున్నట్టు తెలుస్తోంది. ఇమ్మడి రవి సుమారు 5 సంవత్సరాల క్రితమే తన భార్యతో విడాకులు తీసుకుని ఒంటరిగా ఉంటున్నట్టు సమాచారం.

ఈ కేసులో మరింత లోతుగా దర్యాప్తు జరిపి, పైరసీ నెట్‌వర్క్‌లోని ఇతర వివరాలను తెలుసుకోవడం కోసం ఇమ్మడి రవిని 7 రోజుల పాటు కస్టడీకి ఇవ్వాలని పోలీసులు మెజిస్ట్రేట్‌ను కోరారు. థియేటర్లలో విడుదలైన కొద్ది గంటల్లోనే లేదా ఓటీటీలో వచ్చిన వెంటనే సినిమాలను పైరసీ చేసి ఉచితంగా వెబ్‌సైట్‌లో అందుబాటులో ఉంచడం ద్వారా తెలుగు సినీ పరిశ్రమకు వేల కోట్ల రూపాయల నష్టం కలిగించినట్టు ఆరోపణలు ఉన్నాయి. ఇమ్మడి రవి అరెస్ట్‌తో పైరసీకి వ్యతిరేకంగా పోరాడుతున్న సినీ ప్రముఖులు హర్షం వ్యక్తం చేశారు.

ALSO READ: GlobeTrotter Event : గ్లోబల్ ట్రాటర్ ఈవెంట్ లో నిరాశ, మేనేజ్ చెయ్యలేక సారీ చెప్పేసారు