IPS Association On KTR: డీజీపీపై అనుచిత వ్యాఖ్యలు.. కేటీఆర్ కు ఐపీఎస్ అధికారుల సంఘం వార్నింగ్

IPS Association On KTR: బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్‌‌పై తెలంగాణ ఐపీఎస్ అధికారుల సంఘం ఆగ్రహం వ్యక్తం చేసింది. డీజీపీ శివధర్ రెడ్డిపై కేటీఆర్ అనుచిత వ్యాఖ్యలను ఖండించింది. డీజీపీకి పూర్తి మద్దతు ప్రకటించింది. అవసరమైతే కేటీఆర్ పై చట్టపరమైన చర్యలు తీసుకునే హక్కు తమకు ఉందని పేర్కొంది. ఈ మేరకు ఐపీఎస్ అధికారుల సంఘం ఓ ప్రకటన చేసింది. ఇటీవల ఒక ఇంటర్వ్యూలో కేటీఆర్ మాట్లాడుతూ..రాష్ట్రంలో శాంతి భద్రతలు క్షీణిస్తున్నాయని, డీజీపీ ఏం చేస్తున్నారని అవమానకర వ్యాఖ్యలు చేశారు.

పోలీస్ వ్యవస్థ లక్ష్యంగా

డీజీపీ శివధర్ రెడ్డి, మొత్తం పోలీసు వ్యవస్థను టార్గెట్ చేస్తూ కేటీఆర్ అనుచిత వ్యాఖ్యలు చేశారని ఐపీఎస్ అధికారుల సంఘం ఆరోపించింది. పోలీస్ వ్యవస్థ పై అభ్యంతరాలు ఉంటే చట్టబద్దంగా లేవనెత్తాలని కోరారు. అంతే కానీ బహిరంగంగా దూషించడం సరికాదన్నారు. ఇలాంటి వ్యాఖ్యలు పోలీసు వ్యవస్థ నిష్పాక్షికత, వృత్తి గౌరవాన్ని దెబ్బతీస్తాయని హెచ్చరించారు.

రాజకీయ లబ్దికోసం

తెలంగాణ ప్రజల భద్రత కోసం అవిశ్రాంతంగా పనిచేసే వేలాది మంది పోలీసు అధికారులు, సిబ్బందిపై ఇలాంటి వ్యాఖ్యలు సరికాదని అభిప్రాయపడింది. డీజీపీ పరువు నష్టం కలిగించే వ్యాఖ్యలు చేయడమే కాకుండా మొత్తం పోలీసు వ్యవస్థ ప్రతిష్ఠను దిగజార్చేలా కేటీఆర్ మండిపడ్డారని ఐపీఎస్ అధికారుల సంఘం మండిపడింది. రాజకీయ లబ్దికోసం సర్వీసులో ఉన్న అధికారులపై నిరాధారమైన ఆరోపణలు చేయడం సరికాదంది.

Also Read: Revanth Reddy: సీఎం రేవంత్ రెడ్డిపై.. టెక్ దిగ్గజాల ప్రశంసలు

వ్యక్తిగత వ్యాఖ్యలు సరికాదు

ప్రభుత్వ అధికారులపై ప్రజా ప్రతినిధులు, రాజకీయ నాయకులు, మీడియా సంస్థలు బాధ్యతగా మాట్లాడాలని ఐపీఎస్ అధికారుల అసోసియేషన్ కోరింది. రాజ్యాంగ సంస్థలు, సీనియర్ ప్రభుత్వ ఉద్యోగుల గౌరవాన్ని కాపాడాలని కోరింది. డీజీపీ పోలీసు వ్యవస్థకు అధిపతి, అలాంటి వ్యక్తిపై వ్యక్తిగత లేదా పరువు నష్టం కలిగించే వ్యాఖ్యలు సరైనవి కాదని కోరింది.