Bhupalpalli: గర్ల్స్ హాస్టల్ లో దారుణం.. స్టూడెంట్‌ను చితకబాదిన వార్డెన్, భూపాలపల్లి జిల్లాలో ఘటన

జయశంకర్ భూపాలపల్లి జిల్లా కేంద్రంలోని ఎస్సీ గర్ల్స్ హాస్టల్ మరోసారి వివాదాలకు నిలయమైంది. విద్యాబుద్ధులు నేర్పించి.. అండగా నిలవాల్సిన వార్డెన్ కంచే చేను మేసిన చందంగా ఒక విద్యార్థినిపై అమానుషంగా దాడికి పాల్పడ్డారు. డిగ్రీ ఫైనల్ ఇయర్ చదువుతున్న విద్యార్థినిని వార్డెన్ భవాని కర్రతో, చేతులతో ఇష్టారీతిన చితకబాదిన ఘటన కలకలం రేపుతోంది. ఈ ఘటనకు సంబంధించిన పూర్తి వివరాలు ఇలా ఉన్నాయి.

అసలేం జరిగిందంటే..?

గత నెల 24వ తేదీన హాస్టల్‌లో స్వల్ప కారణంతో వార్డెన్ భవానికి, సదరు విద్యార్థినికి మధ్య చిన్నపాటి వాగ్వాదం జరిగినట్లు తెలుస్తోంది. ఈ క్రమంలో సహనం కోల్పోయిన వార్డెన్, విద్యార్థిని అని కూడా చూడకుండా కర్ర తీసుకుని దాడికి దిగారు. తోటి విద్యార్థినులు అడ్డుకుంటున్నా వినకుండా.. బూతులు తిడుతూ కనికరం లేకుండా కొట్టారు. ఈ దారుణాన్ని గమనించిన తోటి విద్యార్థినులు తమ ఫోన్లలో వీడియో తీశారు. అయితే.. వార్డెన్ భయంతో ఈ విషయం బయటకు రాకుండా దాదాపు నెల రోజులుగా గోప్యంగా ఉంచారు. తాజాగా ఈ వీడియో సోషల్ మీడియాలో వైరల్ కావడంతో ఈ ఘటన ఆలస్యంగా వెలుగులోకి వచ్చింది.

వివాదాలకు కేరాఫ్ అడ్రస్‌గా హాస్టల్

ఈ హాస్టల్ వివాదాల్లో చిక్కుకోవడం ఇదే మొదటిసారి కాదు. రెండు నెలల క్రితం ఇదే హాస్టల్‌లో విద్యార్థినులకు కొన్ని వర్గాల మత బోధనలు చేయిస్తున్నారనే ఆరోపణలు కూడా వచ్చాయి. అప్పట్లో ఈ వార్త రాష్ట్రస్థాయిలో సంచలనం సృష్టించింది. ఆ ఘటన మరువక ముందే, ఇప్పుడు ఏకంగా విద్యార్థినిపై శారీరక దాడి జరగడం హాస్టల్ నిర్వహణపై అనేక అనుమానాలకు తావిస్తోంది. వరుసగా జరుగుతున్న ఇటువంటి పరిణామాలతో విద్యార్థినుల తల్లిదండ్రులు తీవ్ర ఆందోళన వ్యక్తం చేస్తున్నారు. ‘మా పిల్లలను చదువుకోవడానికి పంపిస్తే, ఇక్కడ మత బోధనలు, భౌతిక దాడులు జరుగుతున్నాయి. మా పిల్లల భద్రతకు గ్యారెంటీ ఏది?’ అని వారు ప్రశ్నిస్తున్నారు.

నిరసన సెగ.. వార్డెన్‌పై చర్యలకు డిమాండ్

విద్యార్థినిపై దాడి చేసిన వీడియో బయటకు రావడంతో విద్యార్థి సంఘాలు ఆగ్రహం వ్యక్తం చేస్తున్నాయి. ఎస్ఎఫ్ఐ, ఏబీవీపీ, ఇతర దళిత సంఘాలు హాస్టల్ ముందు భారీ నిరసన చేపట్టాయి. వార్డెన్ భవానిని వెంటనే విధుల నుంచి తొలగించడమే కాకుండా, ఆమెపై క్రిమినల్ కేసులు నమోదు చేయాలని డిమాండ్ చేశారు. ఉన్నతాధికారులు జోక్యం చేసుకుని జిల్లాలోని హాస్టళ్లలో ఉన్న పరిస్థితులను సమీక్షించాలని కోరుతున్నారు. బాధితురాలికి న్యాయం జరిగే వరకు తమ పోరాటం ఆపబోమని సంఘాల నేతలు స్పష్టం చేశారు.

ప్రస్తుతం ఈ ఘటనపై జిల్లా యంత్రాంగం విచారణకు ఆదేశించినట్లు సమాచారం. నివేదిక ఆధారంగా వార్డెన్‌పై కఠిన చర్యలు తీసుకునే అవకాశం ఉంది.

ALSO READ: KTR comments: అసెంబ్లీలో కేసీఆర్‌‌కు రేవంత్ షేక్ హ్యాండ్.. కేటీఆర్ షాకింగ్ కామెంట్స్

ఎస్సీ గర్ల్స్ హాస్టల్ లో విద్యార్థినిని చితకబాదిన వార్డెన్
(Sensitive)

జయశంకర్ భూపాలపల్లి జిల్లా కేంద్రంలో ఘటన

కర్ర, చేతులతో ఇష్టారీతిన డిగ్రీ మూడవ సంవత్సరం చదువుతున్న విద్యార్థినిని విచక్షణారహితంగా చావబాదిన హాస్టల్ వార్డెన్ భవాని

వీడియో తీసిన తోటి విద్యార్థినులు

గత నెల 24న… pic.twitter.com/gsa3E4LrRH

— ChotaNews App (@ChotaNewsApp) December 29, 2025