మతసామరస్యానికి ప్రతీక.. హనుమాన్ దీక్షలో ముస్లిం యువకుడు, ఫోటో వైరల్

కులమతాల కన్నా మానవత్వం మిన్న అని.. దైవం ఒక్కటేనని చాటిచెప్పాడు ఆ యువకుడు. జగిత్యాల జిల్లా కొడిమ్యాల మండలం పూడూరు గ్రామానికి చెందిన మహమ్మద్ యూసఫ్ మతసామరస్యానికి నిలువెత్తు రూపంగా నిలిచాడు. ఒక ముస్లిం యువకుడై ఉండి హిందూ సంప్రదాయం ప్రకారం అత్యంత నిష్టతో హనుమాన్ దీక్ష చేపట్టి అందరి దృష్టిని ఆకర్షించాడు. నేటి సమాజంలో మతాల మధ్య గోడలు పెరుగుతున్న తరుణంలో యూసఫ్ తీసుకున్న నిర్ణయం ప్రతి ఒక్కరినీ ఆలోచింపజేస్తోంది.

గతేడాది యూసఫ్ ఒక ఘోర ప్రమాదానికి గురయ్యాడు. ఆ యాక్సిడెంట్ నుంచి అతను త్రుటిలో ప్రాణాపాయం నుంచి తప్పించుకున్నాడు. తాను ప్రాణాలతో బయటపడటం వెనుక శ్రీరాముని కృప ఉందని యూసఫ్ బలంగా విశ్వసించాడు. ఆ కృతజ్ఞత భావంతోనే ఈ ఏడాది హనుమాన్ జయంతిని పురస్కరించుకుని మాల ధరించాలని నిర్ణయించుకున్నాడు. మొక్కు తీర్చుకోవడంలో భాగంగా 11 రోజుల పాటు కఠినమైన హనుమాన్ దీక్షను స్వీకరించాడు.

దీక్షా కాలంలో యూసఫ్ కఠిన నియమాలను పాటించాడు. తెల్లవారుజామునే నిద్రలేవడం.. చన్నీటి స్నానం చేయడం.. కాషాయ వస్త్రాలు ధరించి హనుమాన్ నామస్మరణ చేయడంలో నిమగ్నమయ్యాడు. ముస్లిం సంప్రదాయాలను గౌరవిస్తూనే ఈ దీక్షను కొనసాగించడం విశేషం. నియమనిష్టలతో కూడిన యూసఫ్ భక్తిని చూసి గ్రామస్తులు ఆశ్చర్యపోయారు. హనుమాన్ జయంతి రోజున అతను కాలినడకన ప్రముఖ పుణ్యక్షేత్రమైన కొండగట్టు అంజన్న సన్నిధికి చేరుకున్నాడు. అక్కడ స్వామివారిని దర్శించుకుని శాస్త్రోక్తంగా మాల విరమణ చేశాడు.

ఈ సందర్భంగా యూసఫ్ మాట్లాడుతూ సంచలన వ్యాఖ్యలు చేశాడు. మనుషుల మధ్య మతపరమైన విభేదాలు ఉండకూడదని ఆకాంక్షించాడు. అన్ని మతాల సారాంశం ఒకటేనని.. దైవ ప్రార్థన ఏ రూపంలో చేసినా ఫలితం ఒకటేనని పేర్కొన్నాడు. ఆపద సమయంలో తనను కాపాడిన దేవుడికి మొక్కు చెల్లించుకోవడంలో తనకు ఎలాంటి సంకోచం లేదని స్పష్టం చేశాడు. తాను చేసిన ఈ ప్రయత్నం సమాజంలో శాంతిని పెంపొందిస్తుందని ఆశాభావం వ్యక్తం చేశాడు.

ముస్లిం యువకుడు హనుమాన్ మాల వేసుకోవడంపై సోషల్ మీడియాలో సైతం ప్రశంసల జల్లు కురుస్తోంది. మతాలకు అతీతంగా యూసఫ్‌ను అందరూ అభినందిస్తున్నారు. పూడూరు గ్రామస్తులు అతన్ని మతసామరస్యానికి బ్రాండ్ అంబాసిడర్‌గా అభివర్ణిస్తున్నారు. విభజన రాజకీయాలు నడుస్తున్న ప్రస్తుత కాలంలో ఇటువంటి ఘటనలు మానవ బంధాలను బలపరుస్తాయని మేధావులు అభిప్రాయపడుతున్నారు. యూసఫ్ చూపిన ఈ చొరవ నిజమైన భక్తికి.. విశాల దృక్పథానికి నిదర్శనంగా నిలిచింది.

ALSO READ: నన్ను ఉరితీయండి కానీ.. సీఎంకు పాడి కౌశిక్ రెడ్డి భావోద్వేగ సవాల్!