Gig Workers: గిగ్ వర్కర్లకు చట్టబద్ధ భద్రత.. చారిత్రాత్మక బిల్లుకు తెలంగాణ కేబినెట్ ఆమోదం

Gig Workers: తెలంగాణ ప్రభుత్వం రాష్ట్రంలోని లక్షలాది మంది గిగ్, ప్లాట్‌ఫామ్ కార్మికుల సంక్షేమం దిశగా చారిత్రాత్మక నిర్ణయం తీసుకుంది. సోమవారం జరిగిన కేబినెట్ సమావేశంలో “తెలంగాణ ప్లాట్‌ఫామ్ ఆధారిత గిగ్ వర్కర్స్ (రిజిస్ట్రేషన్, సామాజిక భద్రత మరియు సంక్షేమం) చట్టం, 2025” ముసాయిదా బిల్లుకు ఆమోదం లభించింది. నీతి ఆయోగ్ నివేదిక ప్రకారం, రాష్ట్రంలో 3 లక్షల మంది గిగ్ కార్మికులు (రవాణా, డెలివరీ, గృహ సేవలు) ఉన్నారు. వీరికి ప్రస్తుతం ఉద్యోగ భద్రత, భీమా, బేరసారాల శక్తి లేకపోవడంతో, వారి సంక్షేమం కోసం ఈ చట్టాన్ని తీసుకొస్తున్నట్లు ప్రభుత్వం ప్రకటించింది.

ఈ కొత్త చట్టం ద్వారా గిగ్ కార్మికులకు తొలిసారిగా చట్టబద్ధమైన గుర్తింపు లభించనుంది, వారికి ప్రత్యేక ఐడీ కార్డులు జారీ చేస్తారు. కార్మిక శాఖ మంత్రి ఛైర్మన్‌గా 20 మంది సభ్యులతో (ప్రభుత్వ, కంపెనీ, కార్మిక, పౌర సమాజ ప్రతినిధులతో) కూడిన ‘సంక్షేమ బోర్డు’ను ఏర్పాటు చేస్తారు. ఈ బోర్డు ఆధ్వర్యంలో ఒక ‘సంక్షేమ నిధి’ని స్థాపిస్తారు. దీనికి అగ్రిగేటర్లు (కంపెనీలు) తమ చెల్లింపులపై నిర్ణీత శాతం సంక్షేమ రుసుము, ప్రభుత్వ గ్రాంట్లు, మరియు CSR విరాళాల ద్వారా నిధులు సమకూరుస్తారు. ఈ నిధి ద్వారా కార్మికులకు ప్రమాద మరణ బీమా, ఆరోగ్య ప్రయోజనాలు, వివాహ సాయం వంటివి అందిస్తారు.

ఈ చట్టంలోని మరో ముఖ్యమైన అంశం ‘అల్గోరిథమిక్ జవాబుదారీతనం’. కంపెనీలు తమ అల్గోరిథంలు కార్మికుల అసైన్‌మెంట్‌లు, రేటింగ్‌లు, ఆదాయాలను ఎలా ప్రభావితం చేస్తాయో పారదర్శకంగా వెల్లడించాలి. దుష్ప్రవర్తన మినహా, కార్మికులను తొలగించాలంటే 7 రోజుల ముందస్తు నోటీసు ఇవ్వాలి. ఫిర్యాదుల పరిష్కారానికి ప్రత్యేక అధికారిని, అప్పీలేట్ యంత్రాంగాన్ని నియమిస్తారు. సంక్షేమ రుసుము చెల్లించని కంపెనీలకు ₹50,000 నుంచి జరిమానాలు విధిస్తారు. రాజస్థాన్, కర్ణాటక వంటి రాష్ట్రాలతో పోల్చితే, రిజిస్ట్రేషన్, సంక్షేమం, పారదర్శకతను కలుపుతూ తెలంగాణ తెచ్చిన ఈ బిల్లు దేశంలోనే అత్యంత సమగ్రమైనదని ప్రభుత్వం పేర్కొంది.

Read Also: GHMC: గ్రేటర్ అసెంబ్లీ సెగ్మెంట్‌లో పెరిగిన కాంగ్రెస్ బలం