TG Municipal Elections 2026: తెలంగాణ మున్సిపల్ ఎన్నికల పోలింగ్ ముగిసిన నేపథ్యంలో ‘పీపుల్స్ పల్స్’ (Peoples Pulse) సంస్థ ఎగ్జిట్ పోల్ ఫలితాలను విడుదల చేసింది. ఈ ఫలితాల ప్రకారం, రాష్ట్రవ్యాప్తంగా కాంగ్రెస్ పార్టీ స్పష్టమైన ఆధిక్యం దిశగా దూసుకుపోతోంది. మొత్తం 123 మున్సిపాలిటీలకు గాను కాంగ్రెస్ 68-76 స్థానాలను కైవసం చేసుకునే అవకాశం ఉండగా, బీఆర్ఎస్ పార్టీ 29-36 మున్సిపాలిటీలతో రెండో స్థానానికి పరిమితం కానుంది. బీజేపీ కేవలం 3-5 స్థానాల్లో మాత్రమే విజయం సాధించే అవకాశం ఉందని ఈ సర్వే వెల్లడించింది.
ఓట్ల శాతం పరంగా కాంగ్రెస్ పార్టీ 36 శాతం ఓట్లతో అగ్రస్థానంలో ఉండగా.. బీఆర్ఎస్ 29.7 శాతం, బీజేపీ 19.3 శాతం ఓట్లను సాధించే సూచనలు ఉన్నాయి. వార్డుల వారీగా చూస్తే, మొత్తం 2582 వార్డులలో కాంగ్రెస్ 1210-1290 స్థానాల్లో, బీఆర్ఎస్ 860-930 స్థానాల్లో గెలుపొందే అవకాశం ఉంది. సామాజిక వర్గాల వారీగా విశ్లేషిస్తే.. ఎస్సీ (41.2 శాతం), ముస్లిం (44.7 శాతం), ఓబీసీ (33.6 శాతం) ఓటర్లు కాంగ్రెస్ వైపు మొగ్గు చూపగా, ఎస్టీ వర్గం మాత్రం బీఆర్ఎస్ (36.9 శాతం) పట్ల సానుకూలంగా ఉన్నట్లు సర్వే పేర్కొంది.
జిల్లాల వారీగా.. నల్గొండ (14-16), మహబూబ్ నగర్ (13-15) జిల్లాల్లో కాంగ్రెస్ పార్టీ క్లీన్ స్వీప్ చేసే దిశగా ఉండగా, మెదక్ (9-11), వరంగల్ (7-9) జిల్లాల్లో బీఆర్ఎస్ తన పట్టును నిలుపుకుంటోంది. నిజామాబాద్ జిల్లాలో కాంగ్రెస్ 5-7 స్థానాలు గెలిచే అవకాశం ఉండగా, ఆదిలాబాద్లో కాంగ్రెస్ మరియు బీఆర్ఎస్ మధ్య హోరాహోరీ పోరు నెలకొంది. మున్సిపల్ ఎన్నికల తుది ఫలితాలు ఫిబ్రవరి 13న వెలువడనున్నాయి.
Share
Komatireddy Venkat Reddy: నల్లగొండను అభివృద్ధి చేసి ప్రజల రుణం తీర్చుకుంటా : మంత్రి కోమటిరెడ్డి వెంకటరెడ్డి
K.V.Anudeep: వెంకీ మామతో అనుదీప్ మూవీ.. డబుల్ డోస్ కామెడీ పక్కా?
